Hechos 2:13-29

¹³Ax je̱mpa tseꞌe juuꞌ veꞌe du̱nu̱xiiktu du̱tukxiiktu je̱ jaanchjaꞌvivata̱jk. Jidu̱ꞌu̱m tseꞌe vyaandi: ―Mookju̱dup xa ya̱ꞌa̱ veꞌe. Ta̱ xa ya̱ꞌa̱ veꞌe du̱ꞌoknaxta je̱ tsaaydum paꞌajk na̱a̱j.

¹⁴Vanꞌit tseꞌe je̱ Pedro tyeni ma̱a̱t je̱ viijnk kuká̱tsivada juuꞌ veꞌe nu̱maktoꞌk ijttu, je̱tseꞌe ma̱kk du̱muka̱jts je̱ jayu. Jidu̱ꞌu̱m tseꞌe vyaajñ: ―Miitsta, nmuꞌisraeejlit jáyuda, nu̱jom pa̱n pa̱n jatyeꞌe yájada Jerusalén, amo̱tunaxta o̱y juuꞌ a̱tseꞌe nko̱tsuvaampy.

¹⁵Kaꞌa xa ya̱ꞌa̱ veꞌe myoꞌokjada ax joꞌn miitseꞌe mvinmayda, ajó̱pum xa̱a̱jnumeꞌe u̱xyam.

¹⁶Ya̱ꞌa̱ juuꞌ veꞌe u̱xyam toojnjup ko̱jtsjup, ya̱ꞌa̱ts je̱ꞌe̱ veꞌe juuꞌ veꞌe je̱ Nteꞌyam je̱ yꞌayook ko̱jtsnajxpa Joel jyaay je̱p Kunuuꞌkx Jatyán ku̱jxp. Jidu̱ꞌu̱m tseꞌe du̱jaajy:

¹⁷Vaamp xa veꞌe je̱ Nteꞌyam: “Ku veꞌe tyá̱minit je̱ ita̱ka̱x, mpá̱mupts a̱tseꞌe je̱m jyaꞌvin ka̱jxmda je̱ nꞌEspíritu nu̱jom je̱ jayu juuꞌ veꞌe toꞌk it toꞌk naxviijn tsu̱u̱nidup, kyo̱jtsnáxtap tseꞌe a̱ts je̱ nꞌayook je̱ mmajntkta̱jkta je̱ts je̱ mna̱a̱xta̱jkta, nyakꞌíxtapts a̱tseꞌe juuꞌ a̱tseꞌe ntsa̱jkp je̱ mmuutskit ónu̱kta, kumaꞌajtap tseꞌe je̱ mmú̱jit jáyuda.

¹⁸Mpá̱mupts a̱tseꞌe je̱m jyaꞌvin ka̱jxmda je̱ nꞌEspíritu pa̱n pa̱n jaty a̱tseꞌe xmutoondup xmupa̱jktup, je̱ yaaꞌtya̱jk je̱ts je̱ ta̱ꞌa̱xta̱jk, je̱tseꞌe du̱ko̱jtsnáxtat a̱ts je̱ nꞌayook.

¹⁹Nyakjé̱japts a̱tseꞌe je̱m tsajviinm juuꞌ jatyeꞌe yaktukꞌatú̱vap, mpá̱mupts a̱tseꞌe je̱ nu̱jaꞌvin je̱m naxviinm: je̱ nu̱u̱ꞌpu̱n je̱ts je̱ ja̱a̱jn, je̱ts o̱o̱y je̱ jo̱k.

²⁰Vinko̱o̱ꞌtsinup tseꞌe je̱ aampa xa̱a̱j, je̱tseꞌe nu̱u̱ꞌpu̱n joꞌn je̱ aampa po̱ꞌo̱ cháptsinit, kaꞌana veꞌe du̱paaꞌty vye̱ꞌnat je̱ xa̱a̱j ku veꞌe je̱ Ma̱ja̱ Vintsá̱n kya̱daaknit, je̱ xa̱a̱j juuꞌ veꞌe du̱nu̱má̱jap je̱tseꞌe du̱nu̱vinkó̱pkat.

²¹Nu̱jom tseꞌe pa̱n pa̱n jatyeꞌe je̱ Ma̱ja̱ Vintsá̱n du̱jaanchjaꞌvidup, je̱ꞌe̱ tseꞌe tso̱ꞌo̱ktap.” Jidu̱ꞌu̱m tseꞌe je̱ Kunuuꞌkx Jatyán vyaꞌañ.

²²Vanꞌit tseꞌe je̱ Pedro jyaaꞌkvaajñ: ―Nmuꞌisraeejlit jáyuda, amo̱tunaxta ya̱ ayook. O̱y miitseꞌe xnu̱jávada je̱ ma̱jin je̱ts je̱ mú̱jit atu̱va je̱ts je̱ mú̱jit nu̱jaꞌvin juuꞌ veꞌe je̱ja miits mvinkujkta je̱ Nteꞌyam je̱ kyutojku̱n ka̱jx tyoon je̱ Jesús, je̱ nazarétit jayu.

²³Je̱ Nteꞌyam tseꞌe du̱nu̱pa̱a̱jmtki juuꞌ veꞌe je̱ Jesús játjup náxjup, ñu̱jaꞌvits je̱ꞌe̱ veꞌe je̱ts yakpá̱mup je̱ꞌe̱ veꞌe je̱m je̱ jayu kya̱ꞌm juuꞌ veꞌe tsoꞌoxpa̱jkju̱dup. Miits xa je̱ꞌe̱ veꞌe myakjayꞌo̱o̱ꞌkju̱du. Ko̱ꞌo̱y jáyuts je̱ꞌe̱ veꞌeda juuꞌ veꞌe yakcruuzpe̱jtju̱du. Je̱ꞌe̱ tseꞌe tyoondu juuꞌ miitseꞌe mtso̱jktu.

²⁴Ax je̱ Nteꞌyamts je̱ꞌe̱ veꞌe du̱yakjoojntykpa̱jknuva, je̱ o̱o̱ꞌku̱neꞌe tuknu̱vaatsjinu, ku̱x kaꞌa veꞌe je̱ o̱o̱ꞌku̱n je̱ kutojku̱n du̱jayep je̱tseꞌe a̱a̱ꞌk du̱tunyaktánu̱t.

²⁵Veꞌem xa je̱ꞌe̱ veꞌe ax joꞌn ju̱jpani je̱ David du̱ko̱jtsnajxy je̱ Jesús je̱ yꞌayook. Jidu̱ꞌu̱m tseꞌe vyaajñ: Nxa̱ꞌmaꞌíxp a̱tseꞌe je̱ Ma̱ja̱ Vintsá̱n je̱ja a̱ts nvinkujk, je̱ꞌe̱ ma̱a̱tts a̱tseꞌe nꞌit, veꞌemts a̱tseꞌe nkativinmay,

²⁶je̱ꞌe̱ ka̱jx tseꞌe xyo̱o̱ndu̱k a̱ts ya̱ njo̱o̱t ya̱ njaꞌvin je̱ts a̱ts mitseꞌe nyakma̱ja nyakjaancha. Je̱ꞌe̱ ka̱jxts a̱tseꞌe toꞌk jo̱o̱t nꞌit, ku̱x ó̱yam a̱tseꞌe nꞌo̱o̱ꞌku̱t, joojntykpa̱jknuvapts a̱tseꞌe.

²⁷Kaꞌats mitseꞌe a̱ts ya̱ njo̱o̱t ya̱ njaꞌvin xmaso̱ꞌo̱ku̱t je̱m je̱ o̱o̱ꞌku̱n kya̱ꞌm, kaꞌa veꞌe xyakjajtpat je̱tseꞌe myaꞌatu̱t a̱ts ya̱ nniꞌkx ya̱ nko̱pk, a̱ts, mits je̱ mVaꞌajts Jayu.

²⁸Xtukꞌix a̱ts mitseꞌe je̱ tooꞌ juuꞌ a̱tseꞌe nyo̱ꞌo̱yup je̱ts a̱tseꞌe xa̱ꞌma ka̱jx njoojntykinit, xyakxo̱o̱ndu̱kupts a̱ts mitseꞌe ku a̱tseꞌe nꞌijtnit mits ma̱a̱t. Jidu̱ꞌu̱m tseꞌe je̱ David du̱ko̱jtsnajxy je̱ Jesús je̱ yꞌayook.

²⁹’Nmuꞌisraeejlit jáyuda, vaꞌajts xa veꞌe nnu̱jaꞌvimda je̱ts o̱o̱ꞌkeꞌe je̱ nju̱jpit jáyuvamda David, je̱tseꞌe ñaxta̱jkini, ku̱x je̱e̱na veꞌe je̱ it joma veꞌe ñaxta̱jki.