HECHOS 2:12-30

¹²ꞌBa ngatsiꞌi kuakunre ꞌba bi be mé= xi sikjaꞌetsjen. —¿Jó tsunire kibi? —kitsure xinkjin.

¹³—Chꞌi=ni nchjabiu —kitsu yakꞌa xi tu tsejnuke.

¹⁴ꞌBa ꞌbatsaꞌen Pedro tsakasen nduju ko nchja apóstol xi ngitejngu, ꞌba ꞌñu kinchja nga kitsure xuta naxinando: —Jun nchja judío ko ngatsiꞌu xi tetsubo naxinanda Jerusalén, ngatjaꞌyo ꞌba tasen ñojon mé= xi xin_nuu̱.

¹⁵Bi chꞌi nchjabi jotsaꞌen tenikjaꞌetsjion, ngatꞌa saꞌe= chuba ñajan nga tajñu.

¹⁶Kui=bi xi kitsutitjun xuta chinga profeta Joel:

¹⁷ꞌBi= ku̱an nixtjin xi fetꞌani, sja_ra̱ Isennixtjinna̱ ngatsiꞌi xuta, kitsu Naꞌenchana. Kiꞌndi xiꞌinnu ꞌba kiꞌndi yanchjinnu kuinchja ngatꞌana̱ joni jngu profeta, ꞌba nchja nistinu sꞌejñatsejenre mé= xi tijñaꞌmo, ꞌba nchja chinganu kuaꞌere chini xi kjuakixi.

¹⁸Kui nixtjinbiu sja_ra̱ Isennixtjinna̱ nchja chuꞌndana̱ ꞌba ko yanchjin chuꞌndana̱. ꞌBa kuinchja ngatꞌana̱ joni jngu profeta.

¹⁹Saꞌaa̱n kjuakun ngankꞌaa ꞌba chu̱ba̱ xi kuakutsejen kjuajena̱ tꞌanangiu, ꞌba sꞌe̱ jin ko ndiꞌi ꞌba ko niꞌndi xi yufi ni.

²⁰Tsuꞌbiu ku̱ajñu ꞌba naꞌenso ini ku̱an joni jin, kionga kje faꞌejín nixtjin nga kjuaꞌe Naꞌenna, nixtjin xi je ꞌba xi tjinre kjuaje.

²¹ꞌBa kꞌuangi ngatsiꞌi xi kuinchja jaꞌenre Naꞌenna.

²²’ꞌBamani jun naꞌen xi Israel tsojon, tasen ñojon mé= xi xin_nuu̱. Jesús xi Nazaret tseꞌe, kui jngu xuta xi Naꞌenchana yaku chuya ngajinnu. Ngatꞌa Naꞌenchana kitsjare kjuaꞌñu nga kitsaꞌen ngajinnu kjuaje ko kjuakun ko chuba xi yakutsejen kjuaꞌñure Naꞌenchana jotsaꞌen jun nda ꞌyo.

²³Kui Jesús xi kuangantsja, jotsaꞌen tjun kitsikjaꞌetsjen ꞌba kuamejénre Naꞌenchana ꞌndani nga ꞌetutsꞌinre. ꞌBa jun kjindubo ꞌba kjinikꞌion, kionga kjiningantsjo ngaya ntsja nchja chꞌokun tuxi sꞌetꞌani kru.

²⁴Tunga Naꞌenchana kitsikjaꞌaya nganire ꞌba ꞌejñatꞌaxinre kjuaꞌonre kjuabeya, ngatꞌa kjuabeya bi kuánre kitsikꞌejñaꞌñu.

²⁵Ngatꞌa ꞌba kitsu David nga kinchja ngatꞌare Jesús: Tsaꞌbia̱ nga Naꞌenna ngantsjai tijña ngixkuaa̱n. Ngatꞌa ngate kixina̱ sejñatꞌa, kui kjua bi kjuatseni inimana̱.

²⁶Kui kjuañu kuatsjanire inimana̱, ꞌba en xi tsja tsu ꞌetjuni ndsuꞌbaa̱, ꞌba kaꞌnda yojona̱ tikuyare nga sa̱kure mé= xi nda.

²⁷Ngatꞌa bi sikumanaa̱ ngaꞌndere mikꞌen, ꞌba bi kuaꞌeꞌnde tsa kjueꞌndu Xuta Tsje xi tsiji.

²⁸Kikakutsejennaa̱ ndiya xi fi ña kꞌuendukun xuta, ꞌba sitsenaa̱ kjuatsja nga kuatejñaa̱ ngixkuin.

²⁹’Jun ntsꞌia̱ xian, ma mixan ko kjuakixi ngatꞌare xuta chingana David nga kꞌen ꞌba kisꞌeyanijin, ngatꞌa kaꞌnda nixtjin ngandaꞌe tijñajin ngisana tsjure.

³⁰Kui= xi jngu profeta kuán ꞌba tsabe nga Naꞌenchana jaꞌba je= kitsjare en ngatꞌare jaꞌenre nga ntje xi tseꞌe stjujin xi kꞌuejñasun ngaꞌndere ña batexuma rey.