Hechos 2:10-28

¹⁰kwen Frigia-tol, kwen Panfilia-tol, kwen Egipto-tol, kwen Libia-Cirenezhikid-tol, kwen Roma-akar-tanimalad.

¹¹(Tenal tulemal-chogbo nonimalmo, kwen Judio-chunnad, kwen tule-Judio-igalgin-togzhamalad.) Tegin anmal kwen Creta-tol, tegin Arabia-tolgan itobukmalmo. Tenal we tulemal anmal-kaka-ilbal Pab-immal-taktijulmaladgin chunmananimal.”

¹²Al tulemal-itobukmalad weob pakal pesmal, tegin tulemal mag itojul-pesmalbal. Tegin tulemal-kwénna-kwénna, aga emal-emal chunmakalmalbal: —¿Wegidde, ibi chogle-wede, tule-kaka-ilbal chunmakeddé?

¹³Tegin tule-pimalad tule-Jesúsgin-turdananimaladgin todoalmal chogalmal: —We tulemal vino kobnanimal, al mumurmal.

¹⁴Tegin Pedro Jesús-e-chapingan-walambe-kakagwenchak-abalgin okwichial. Tegin Pedro tulemal-itobukmaladga sapejul chunmakal, chogal: “Nabirdo. Imi pemal anmal-tulemal, tegin Jerusaléngin-pel-kwapa-pukmalad, imis an pemalga chogneed, pe nuekwa itomalo. Imi an pemalga wisgal chogdo:

¹⁵imi pemal ebinzhemal anmal-chunmasmaladde mumurmal. Chulá. Anmal kwen mumurzhulmal. Imi neg ampa wachilbakebak nai, ¿tede, anmal igi mumurgumalo? Keg kue.

¹⁶“Imi pe imis-immalmal-takchad, akpene Pab-kaka-palchoged-Joel-chogzhadyob kusdo:

¹⁷Imi Pab Tummad chogdo: ‘Imi neg-tuku omodanikil, antin tulemalgin pel-kwapa An-Purpa-Nued-odeo. Tegin pe-machimal, tegin pe-punamal an-kaka palchogmalo. Tegin machimal imia-akpuredgin immal takmalo. Tegin tule-chelegan kabdakedgin immal taknonimalmogo.

¹⁸Imi an pemalga chogbal: an te ibegin mos-machergangin tegin mos-omegangin An-Purpa-Nued-odeo. Tegin we tulemal an-kaka palchogmalo negde igi kujal kunoniko.

¹⁹Tegin an mogilbal immal-taktijulmalad oyogo. Tegin an iti-napkin immal-taktijulmalad oyomogo; abe, cho, tegin wa pél neg-kao.

²⁰Tegin tadgwa akinnoniko, neg-chichidbi pél peio. Tegin nidin abeyob kunoniko. Tegin we immalmal-kujad-cholbal kep Pab-ibe noniko; ibe-pul-chunchoged, pul-yer-takleged.

²¹Tenal meke-ibi-tule Pab-abingejogalidgin Pabzhe kolalil, we tule abonolenoniko.’ ”

²²Tegin Pedro chogalbal: “Israel-tulemal, pemal nuekwa an-itomalo, imis an pemalga immal chogneed. Imi pemal nued wismal, Jesús-Nazaretkined pemal-abalgin Pab-Tummad-nug-kannalegedgin immal-taktijulmalad imas, pemal mag takegal ede toa-tule. Tegin Jesús-immal-taktijulmalad-imajadbal Pab Tummad oyos, Jesús-immal-chogzhad ib-chunchunnad, ib-kakanzhul.

²³“Imi Pab Tummad akpene igal-mezhis, Jesús purkweenab. Al Pab Tummad iktualeba wiis, Jesúsgin igi kunoniko. Al Jesús pemalga ukles. Tegin tule-iskana-pemal-pentajadbal pemal nakrusgin-Jesús-piokchamaladgin, Jesús-mechamal.

²⁴Tenal Pab Tummad purkwaled-nunmaked-akar Jesús-otulos. ¿Tenal Jesús ibiga kannan tulles pe ebinzhe? Nabir. Imi Jesúsgin tule-purkwed keg nakwe-kujadbal weob kusdo.

²⁵“Tenal Errey-David akpene Jesúsgin chogzhagusdo: An pane-pane Pab-Tummad-taktigu an-nuedzhik chii, an-pentagal. Al an ulubgin akalzhul-ito.

²⁶Al an ulubgin weligwal-itogedbal, an namakalda. Pab Tummadye, imi an wisdo

²⁷pedin uangin an-chan-kwen-ebeojul, tegin pe igal-kwen-ukojulbal, Pe-Tule-Napírragwad-e-chan nungugalye. Tegin an kwen penzhulbal, an purkoedgin an-chan kwen pelguojulye.

²⁸Tenal pedin igal-nued-wisgugal an-imas, an melle pulzhuli purkwegalye. Teginbal, an pe-assapin pela-pela yer weligwal-itogalbalye.”