Hechos 28:4-31

⁴trendø truyu warab misaamerabe ul Pabloi tasku tsacha megai ashabe, kangurrin kangurri trenchibelø køn: —I møøbe chiguen kømø kweechaitøwein kuinrrun cha. Maryugurrimbe chindiimíig ka øsig webarrindøgucha, tru maig kønrrabigwan asha mariibe pinab ashmíig kuabe, øsig uñbashmønrrab asønan— chibelø køn.

⁵Inchen Pablobe ulwan nagu pabørrgøbene, chigucha inchimíig køn.

⁶Inchen nømbe parab mendøtashchab, kabe møi møi kwain tsumbutashchab ashib muniirab købelø køn. Inchendø tru chindashchab truba yaana ashib køben, chigucha inchimui ashabe, katøbe peemaytø isua, Pablone ‘kan tius køn’ chib mendabelø køn.

⁷Inchen tru warainug trugatanbe Publio taigweim pirømera købig køn, tru pi tøbøtag pirø pasrabigu misagwan ashib karubigwei. Truibe namun truba tab wamab uta, pøn kwaløm ørøba truba tab inchib kørrømisringarubig køn.

⁸Inchen tru Publioi møskaimbe pachiibaig, ani larraibiibaig camayu kwanrrø tsuben, Pablobe ashchab ya, Tiusba wamincha, tasigwan kwanrriigweim pala estsarene, tammisrøbig køn.

⁹Inchen trugurrimbe katøgan kwanrreeløgucha tru pi tøbøtag pirø pasrabigu warabeløbe Pabloimay amrrua, tamariilø købelø køn.

¹⁰Incha chigøben truba ketiiløtøga namun truba truba tab incha, nam amrrab barcoyu nebammøwatø, ambamig chi palønrrabigwan nømbe chishtø tranøbelø køn.

¹¹Incha tru pi tøbøtag pirø pasrabigu pøn pøl warøwabe, kan barco alejandríasriig tru srebub pølmera chab purayamne, truyu pasrabigu ambubelø ker. Tru barcobe Cástorwanba, Póluxwanba marig tøgaig købig køn, chiyuilø kui asamig kønrrai.

¹²Incha barcos puinug Siracusasrø puabe, truyu pøn kwaløm warabelø ker.

¹³Trugurrimbe pirø puluwandø purørrub amrrua, Regio ciudasrøngatig amben, katø kwalømbe sursrøngurri, isig ichib kurrøben pa kwaløm kønrrabyube Puteolisrø pubelø ker.

¹⁴Incha trusrømbe nunelø warabelø kuin kui wetørrabelø ker. Inchen nømbe namun truyu kørrømisray chiben nambe kan trune lincha kørrømisrøbelø ker. Incha øyeeg amba Romasrø pubelø ker.

¹⁵Inchen Romasrø nuneløbe nam amrrunrrab kui wammøraguen kua, Apio ciudasrø misag amrrua tulundzuniisrømba, katø tru Tres Tabernas taisrømba namun wamab utønrrab amrruin købig køn. Inchen Pablobe nømun ashabe, Tiuswan ungwa, ungwa cha, chi kømui lataig katøle truba tab kui mørøbig køn.

¹⁶Incha nam Roma chab pubene, Pablone trusrømbe nuin kui nøørø yau tsubashibig køn, kan suldauwan nun ashchai pasra.

¹⁷Incha tru puig pøn kwalømyube judíosmeran ashib karubelan Pablobe linchab amrrunrrai eshkangarua, yandø truyu chab tulundzunøbene, trenchibig køn: —Nai nunelø, nabe judíosmeran tsalø køb chi kaig marmøwei, katø namui kølli misaamera nømui trendø chigøben marøb tøgagúilan treelane marmumig køn chib pasrømøwei inchendø, Jerusalénsrøwei nane merrarrawa, romanosmerai tasku tranig køn cha.

¹⁸Inchen truiløbe nan maig kuigwan tab ashabe, elatchab inchibelø køn cha, kwanrrai maramdiig nainug chigucha chi kalø marig kaaben.

¹⁹Trune judíosmerabe nan elachimønrrai søtølulen, nane treeg marøg kømuindøgucha nan maig punrrabigwan César asha martrai nane miamig nebuig køn cha, kabe na naim pirau, nai misaameraimburab chi køn chinrrab isua kømøtø.

²⁰Inchawei øyeeg puikkurri ñimun ashchappa, waminchappa nabe wamig køn cha. Nam israelitasmera muniiraigwan muniirabikkurri møi yu i cadenastøga merrarraig pasrar— chibig køn.

²¹Inchene nømbe Pablon trenchibelø køn: —Nambe Judeagurri ñuimburab eshkabig chi kilga pøra ørig utømøwei, katø namui misag judíosmera trusrøngurri amrrubelø møikkucha ñi kalø maran chib ñuimburab namune chigucha waminchimøwei indig køn cha.

²²Inchendø ñi maig isuigwan wamindi mørinrrabna kuin ker cha. Kaguende tru i søtø Tiusweiwan srøig peemay kusrenanøb marigwane chutøgucha ‘kaig køn’ chib, wamindi ashibelø ker— cha.

²³Incha nømbe kan ø kwaløm Pabloba tulundzunønrrab cha wesrawa pasra, tru Pablo ya peba tsuinuumay truba nu amrruben, løtsøgurri maabengatig ‘Tius tru nø ashib karub wainuguigwan øyeeg, øyeeg køn’ chib eshkab, nøbe maig kuigwan waminchibig køn. Jesucristoimburab ke treegwei købig kuin kønmab nøm nebua isumne inchib, tru maig maramigwan martrai Moisés pøriilan pølbasra, Tius maig karuigwan eshkabelø pøriilanbañau waminchibig køn.

²⁴Inchen kan utueløbe Pablo wamindigwan treegwein købig kuin kui isuben, trune kan utueløbe køremeelø køn.

²⁵Incha nømbe nømui ututøwei lata kandø isumuig køppe, tarømisra ambub køben, yandø ke srabe Pablobe trenchibig køn: —Espíritu Santobe tru Tius maig karuigwan eshkabig Isaíaskurri tru merrabsrø ñimui kølli misaameran øyah chib, waminchippe, sølwei wamindin køn cha:

²⁶“I misaameran iigwan waminchab inrrø cha: Ñimbe mørøppe, mørendø, managuen chigúi mørmønrrun chib. Ashippe ashendø, chigúinguen nebua ashchaamøn chib.

²⁷Kaguende i misaamerai manrrømerabe nasrkwailø, katø mørøppe, mørendø, tab chigúinguen mørmeelø køn chib. Nømui kabmerabe kasrailø køn cha, kabmeratøga ashmøwei, nømui kalumeratøga mørmøwei inchai. Katø nømui manrrøtøga mandø kuinguen mørmøwei, katø naimay lliramøwei, katø na tamariilø kømøwei kønrrun chinrrig,” taimbala.

²⁸’Pøs øyeeg købene, ñimbe isua kuy cha. Judíos kømø misaameran tru kaigyugurri wesrabig Tiusweiwane wammørøsrailø køben, truiløbe mørtrun— chibig køn.

²⁹Inchen Pablo øyeeg chibene, judíosmerabe nømdø truba truba payiyab waminchib ambubelø køn.

³⁰Inchen Pablobe tru an pagarawa pebi yau pa pila ørøba kørrømisra, nun ashchab ambubelane mundøgucha wamab utab wabig køn truyu.

³¹Tius nø ashib karub wainuguigwan waminchib, Señor Jesucristoimburabigwan eshkab kusrenanøb inchibig køn, mui malautøgucha trurrigu chi søtø luliimíikke.