20Miakeh tonatijmeh otlamixtentoka iwa amo otiktakeh nion tonati nion sítlalteh, iwa ika neká chikaktik kiawiejekatl non topa owetsia otikmolijkeh timikiskiah.
21Kemi ya miak tonati amo otitlakuayah, Pablo omóketski tlatlajkotia iwa okijto: —Tlakah, okachi kuali nonnechkakiskiah iwa amo tikisaskiah de Creta. Ijkó amo titlaijyowiskiah nion nonkipoloskiah itlamamal n barko.
22Pero amo ximosotlawakah, porke maya tikpoloskeh n barko, nion se de nomejwah mikkis.
23Porke nin yúali onechmonextili se iángel Dios, akin niteaxka inawak iwa niktekitilia.
24N ángel onechili: “Amo ximawi Pablo, porke tikpia de timoteixpantiti inawak n César, iwa por te Dios amo kikawas mamikki nion se non kateh mowah itech nin barko.”
25Yika, ximoyolchikawakah tlakah, porke ne nikneltoka Dios, iwa kuali nikmatok Ye kichiwas nochi tlan iángel onechili.
26Pero moneki matechtlamotlati n ejekatl inakastla n isla.
27Ijkuak opanokeh májtlaktli iwa nawi tonati, non yúali n ejekatl otechwiwikaya itech weyi atl non itoka Adriático. Iwa kemi ik tlajko yúali akimeh okinejnemitiayah n barko, okimachiliayah ya onajsiah kan onka tlali.
Hechos 27
Hechos 27:20-27