Hechos 23:5-31

⁵Jayave Pablo jei: —Cherɨqueɨ reta, aicuaa'ã jae co sacerdote tenondegua. Echa'ã uyecuatía oĩ: ‘Ndereta'ã ñee icavi mbae vae nderuvicha cotɨ’ —jei.

⁶Jare Pablo uecha yave amocue jae reta saduceo reta jare amocue fariseo reta, iñeeãta reve jei mburuvicha reta ipɨte pe: —Cherɨqueɨ reta, che co jae penti fariseo, jare cheru vi co jae penti fariseo. Che arovia umanocue vae reta icove yeta co. Cua jeco pegua pe reta cherãa peĩ —jei.

⁷Jare cua jei yave, uyembɨyao uyugüi yatɨ vae reta, jare fariseo reta uyeaca saduceo reta ndive.

⁸Echa'ã saduceo reta jei umanocue vae reta ndarau ma icove ye. Jei vi mbaetɨ co oĩ ángel jare espíritu. Ẽrei fariseo reta güɨrovia ime co.

⁹Jare uyeaca reta uyupii. Jare upũa amocue fariseo pegua mboroyocui re oporomboe vae reta jare jei: —Ore nuvãe'ã etei teco cua cuimbae re. Aramoi penti espíritu ani ángel imiari chupe. Agüɨye yayovaicho Tumpa ndive —jei reta.

¹⁰Jare jeiete uyeaca reta uyupii yave, sundaro reta juvicha itenondegua ipɨa pe uyemɨngueta aramoi uyucata reta Pablo, jare oyocui sundaro reta yugüeru vaerã güɨraa Pablo jae reta ipɨte güi sundaro reta yugüɨreco vae pe.

¹¹Jare pɨareve pe pɨ̃tu yave yandeYa uyecuaa Pablo pe jare jei chupe: —Iñemɨatangãtu, Pablo. Chemɨmbeu ma Jerusalén pe. Chemɨmbeuta vi co Roma pe.

¹²Jayave pɨareve pe amocue judío reta uyemboemboe, jare uyepɨpeyu reve iyee jei ucaruta'ã jare jouta'ã ɨ, uyuca regua Pablo.

¹³Jare cuimbae cua jei uyepɨpeyu reve iyee vae reta cuarenta uasa.

¹⁴Jayave jae reta yugüɨraa sacerdote reta itenondegua reta jare tenta guasu pegua reta itenondegua reta pe jare jei chupe reta: —Ore ndoe ma nduyepɨpeyu reve oriyee nducaruta'ã, nduyuca regua Pablo.

¹⁵Jáeramo pe reta ĩru mburuvicha reta ndive pemɨmbeu sundaro reta juvicha itenondegua pe tugüeru Pablo peve pɨareve. Jae ipɨa pe uyemɨngueta tẽita pe reta pipota pepɨrandu cavi ete chupe mbae uyapo vae re. Jayave ore nucuatɨ̃rota noĩ jese nduyuca vaerã, ndei ou uvãe mbove —jei reta.

¹⁶Ẽrei Pablo jindɨ imembɨ cuimbae vae uicuaa yave jae reta ucuatɨ̃rota Pablo re vae, oo uique sundaro reta yugüɨreco vae pe, jare umɨmbeu Pablo pe.

¹⁷Jayave Pablo ueni sundaro reta juvicha jare jei chupe: —Eraa cua cunumi nderuvicha pe. Echa'ã uipota mbae umɨmbeu chupe —jei.

¹⁸Jayave sundaro reta juvicha güɨraa cunumi juvicha tenondegua vae pe, jare jei chupe: —Pablo uyepɨsɨ oĩ vae chereni, jare chemɨñera aru vaerã ndepɨ cua cunumi. Echa'ã uipota mbae umɨmbeu ndeve —jei.

¹⁹Jayave sundaro reta juvicha itenondegua uipɨsɨ cunumi ipo pe, jare güɨraa ĩru vae reta ñugüɨnoi vae güi. Jayave upɨrandu chupe: —¿Mbae pa nemɨmbeuta cheve?

²⁰Jayave cunumi jei chupe: —Judío reta uyemboemboe ma, jare nemɨñerata Pablo nderaaca vaerã curiye mburuvicha reta pe. Uipota nde ndepɨa pe ndiyemɨngueta tẽi vaerã jae reta upɨrandu cavi eteta chupe mbae uyapo vae re —jei—.

²¹Ẽrei agüɨye erovia. Echa'ã judío reta ucuatɨ̃rota jese. Jae reta cuarenta uasa. Jei reta uyepɨpeyu reve iyee ucaruta'ã jare jouta'ã ɨ, uyuca regua Pablo. Jare añave uãro ñugüɨnoi, aramoi nderaaca pegua —jei chupe.

²²Jayave sundaro reta juvicha itenondegua jei cunumi pe: —Agüɨye emɨmbeu quía pe cua nemɨmbeu cheve vae. Jayave omondo cunumi.

²³Jayave sundaro reta juvicha itenondegua ueni mocui sundaro reta juvicha jare jei chupe reta: —Piyapɨcatu cavi doscientos sundaro reta, jare setenta sundaro cavayu re opo vae reta, jare doscientos sundaro güɨraa uɨ vae reta, yugüɨraa vaerã Cesarea pe nueve ora ma pɨ̃tu yave.

²⁴Jare peeca Pablo opo vaerã, peraa cavi vaerã mburuvicha guasu Félix pe —jei chupe reta.

²⁵Jayave jae uicuatía penti tupapire pe cuarãi:

²⁶“Félix. Nde co jae mburuvicha guasu uyembutuichaca vae. Che co jae Claudio Lisias. Numbɨsaluda.

²⁷Judío reta uipɨsɨ cua cuimbae, jare uyucata tẽi. Jayave che aa sundaro reta ndive aepɨ chugüi reta. Echa'ã jerãcua cheve jae romano co.

²⁸Jare aipota aicuaa maera ra jae reta umbɨjeco. Jáeramo araa judío reta juvicha reta upuruãa vae pe.

²⁹Joco pe aicuaa jae reta umbɨjeco iporoyocui re. Ẽrei jae uyapo'ã teco umano vaerã ani oĩ vaerã peresorɨru pe.

³⁰Ẽrei jerãcua cheve judío reta ucuatɨ̃rota jese. Jáeramo jupivoiño amondo ndecotɨ. Jare ayocui umbɨjeco vae reta uñeapo vaerã jese ndeve teco uyapo chupe reta vae re. Jaeño ma.” Jucuarãi uicuatía.

³¹Jayave pɨ̃tu yave sundaro reta güɨraa Pablo tenta guasu Antípatris pe, juvicha oyocui rami.