Hechos 23:18-31

¹⁸Tiquiro sa nigʉ̃ tʉhoro surara pehe Pablo pacjʉ̃nore tiquiro pʉhtoro cahapʉ ne sa, yahuahye: —‍Peresupʉ ijiriquiro Pablo pehe yʉhʉre pijio, ahriquiro wahmʉnore mʉhʉ cahapʉ ne cã dutiri. Ahriquiro mʉhʉre yahuro taro niñohti, niahye surara tiquiro pʉhtorore.

¹⁹Tiquiro sa nigʉ̃ tʉhoro pʉhtoro pehe wahmʉno omocare ñehe tʉã cã, masa marienopʉ tiquirore sinituahye: —‍¿Dʉhse nigʉ tʉʉ niari mʉhʉ yʉhʉre? niahye tiquiro Pablo pacjʉ̃nore.

²⁰Tiquiro sa sinitugʉ̃ tʉhoro ohõ saha ni yahuahye: —‍Judio masa ihcãno mehna “Ohõ saha yeihna”, ni, ñamiapʉ judio masa bʉcʉna cahapʉ mʉhʉre Pablore nea dutieta. “Bʉcʉna Pablore pari turi sinitu duare”, ni mehoeta.

²¹Sa niepegʉ̃ta cuarenta bui cjũno masa tiquirore wejẽ duayequina duhti, cohte duare. Tiquina tiquirore wejẽato pano ihyayere ihyasi. Sa ye sihnisi. “Tiquirore mari wejẽdagʉ̃ Cohãcjʉ̃ marine wejẽahdo”, nidi tiquina basi. Sa ye yojopʉre mʉhʉre Pablore ne cãhta dutiye tiquina pehe duhti, cohte tuhasari, Pablore wejẽñe tehe. Sa yegʉ tiquina yahuye wihigʉ̃ tiquinare yʉhtieracãhña mʉhʉ, ni yahuahye wahmʉno surara pʉhtorore.

²²Tiquiro sa nigʉ̃ tʉhoro surara pʉhtoro ohõ saha niahye: —‍Yʉhʉre mʉhʉ yahurire apequinare yahueracãhña, ni yahuahye wahmʉnore. Sa ni tuhasa wahmʉnore “Waharĩsa”, niahye tiquiro.

²³Sa yero surara pʉhtoro pʉaro tiquiro yequina cien surara pʉhtoare piji cã, tiquinare dutiahye: —‍Dos cientos surarare, setenta caballoa bui pesayequinare, dos cientos doqueye cjʉ cʉoyequina mehna Cesareapʉ wahatiquinare tiquina yere quehno dutina wahaya. Sa yena mʉsa mia ñami nueve ijigʉ̃ mʉsa wahatore cohteya.

²⁴Sa yena Pablore caballoare tiquiro pesatiquinare quehno basaya. Pʉhtoro Feli cahapʉ, Cesareapʉ, quehnoano soya tiquirore, niahye surara pʉhtoro.

²⁵Sa ni tuhasa papera ojoahye. Ohõ saha ni ojoahye tiquiro:

²⁶“Yʉhʉ Claudio Lisia mʉhʉre tutuagʉ pʉhto Felire quehnoa dutiaja.

²⁷Judio masa ahriquiro Pablore ñehe, wejẽmedi. Sa yegʉ Roma cjʉ̃no tiquiro ijigʉ̃ masigʉ, yequina surara mehna tiquirore yedohou esaʉ.

²⁸Sa yegʉ tiquirore tiquina yahusãrire masi duagʉ judio masa bʉcʉna cahapʉ ne saʉ tiquirore.

²⁹Sa yegʉ tiquiro judio masa ye dutiye dihitare tiquiro yʉhdʉdʉcagʉ̃ mari ye dutiyere tiquiro yʉhdʉdʉcaeragʉ̃ ihñagʉ, tiquirore peresupʉ cũ duerʉ. Yabe buhiri yariaro mariedare tiquirore.

³⁰Sa yero judio masa tiquirore wejẽ dua, tiquina bʉca quehegʉ̃ ihñano apequiro yahuri yʉhʉre. Tiquiro sa yahuri bato Pablore yojopʉre mʉhʉ cahapʉ ohogʉ niaja. Sa yegʉ tiquirore yahusãriquinare tiquiro ñañe yerire mʉhʉre yahu duti tuhasaʉ yʉhʉ”, ni, ojoahye surara pʉhtoro.

³¹Sa ye surara tiquina pʉhtoro tiquiro dutiriro sahata yeahye. Ti ñamine Antipatri wame tiri macapʉ Pablore ne sahye.