Hechos 21:12-20

¹²Coo højts jaduhṉ nmädooyy, møødä mäbøjpädøjc‑hajxy, mänit højtsä Pablo nja nämaayy coo jim̱ quiaꞌa nǿcxät Jerusalén.

¹³Mänitä Pablo yhadsooyy: ―Tii hajxy coo mjøꞌøy coo mxuuc̈h. Tiic̈h hajxy coo xyagjootmayhaty. Cabä cueentä jaduhṉ cooc̈hä hänaꞌc jaduhṉ jim̱ xquiøꞌøxots xtiecyxiódsät Jerusalén. Cabä cueentä jaduhṉ cooc̈h hänaꞌc jim̱ xyaghóꞌogät jaꞌa Jesúscøxpä, jaꞌa hajxy nWiindsøṉhájtämbä ―nøm̱ä Pablo miänaaṉ̃.

¹⁴Coo højts jaduhṉ nhijxy coo jaꞌa Pablo hänajty quiaꞌa mäbøgaꞌañ, mänit højts nmänaaṉnä: ―Ween jaduhṉ jiadyii nebiä Dios tøø miänaꞌañän. Mänit højts nhamooṉnä.

¹⁵Mänit højts nhadsøøm̱bøjcy, høøc̈h møødä Pablo. Mänit højts jim̱ nnøcxy Jerusalén.

¹⁶Näjeꞌe højtsä mäbøjpädøjc jim̱ xpianøcxy, jaꞌa hajxy hänajty jim̱ tsohm̱bä Cesarea. Coo højts jim̱ nmejch Jerusalén, mänit højts hoy xñajtswowøꞌøy maa jaꞌa Mnasón jaꞌa tiøjcän. Jim̱ä Mnasón hänajty jecy tøø chohṉdaꞌagy Chipre. Tøø hänajty jiegøꞌøy coo jaꞌa Mnasón jaꞌa Diosmädiaꞌagy hänajty tøø miäbøcy. Jim̱ højts nmejtstaacy maa jaꞌa Mnasón jaꞌa tiøjcän.

¹⁷Coo højts jim̱ nmejch maa jaꞌa mäbøjpädøjc‑hajxiän, mänit højts xquioñdymooyy xooṉdáacäp.

¹⁸Cujaboom højtsä Pablo jim̱ xmiødhajty maa jaꞌa tsajtøjcän. Jim̱ä Santiago hänajty møødä tsajtøjwiindsøṉhajxy nägøx̱iä.

¹⁹Mänitä Santiagohajxy miøødniyajpooꞌxä jaꞌa Pablo. Mänitä Pablo tiägøøyy mädiaacpä nebiatiä Diosmädiaꞌagy hänajty tøø yajwaꞌxiän maa jaꞌa cajpa judíoshajxiän, cooc jaduhṉ quiapxy miädiaacy jaꞌa Dios miäjaahaam.

²⁰Coo jaꞌa Santiagohajxy jaduhṉ miädooyy, mänitä Dios hajxy wyiingudsähgøøyy. Mänitä Pablo hajxy ñämaayy: ―Mäguꞌughajpä Pablo, mnajuøøby miic̈h jaduhṉ coo jaꞌa judíos jaꞌa Jesús jaꞌa miädiaꞌagy hajxy nämay tøø miäbøjcä. Jaduhṉ hajxy nägøx̱iä miänaꞌañ coo jaꞌa cuhdujt hajxy tsipcøxp ngudiúuṉämät, jaꞌa Moisés jecy yhanéhm̱äbä.