Hechos 21:1-40

¹Jatian jainoa joi akaibo jato potabaini wapóronin nanetaanan pontékaini kaax, noa Cossain nokota iki. Jatian nete xabáketian, Rodas jeman noa nokota iki. Jainoax kaax Pátara jemanribi noa nokota iki.

²Ja Pátarainxon westíora wapóro Feniciain kaai meraax, noa naneta iki.

³Kakin non mexkao, Chipre nasi ochóxonres oinbaini kaax ja Siria main iká, Tiro jeman noa taxnata iki, ja wapóronin boá jawékibo maanhakanaitian.

⁴Jainoara nobé joi akaibo non nokoa iki. Jain banetaxa, kanchis nete noa jato betan iká iki; jatian jabo moa Diossen Shinanman keshana ixon, moa Jerusalénhain katima Pablo yoikana iki.

⁵Ikaxbi moa kanchis nete senenketian, tekíkaini noa karibaa iki. Jatíbi jainoa joi akaibaonra, jaton awinboyabi itan jaton bakeboyaxonbi, ja paro kexá iká mashi kaman noa chibankana iki, jainxonra chirankooxon jatíxonbi non orankana iki.

⁶Jainoaxa, jato kabánon ataanan, noa wapóronin naneta iki. Jatian jabobiribi jaton xobon moa boribakana iki.

⁷Ja Tironkoniax kaxa, Tolemaida jema senenres noa wapóronin kaa iki. Jatian jainoa joi akaibo non jato meshakona iki. Jainra westíora neteres noa jato betan iká iki.

⁸Moa nete xabáketian kaax ja Cesarea jeman noa nokokana iki. Jain nokotax ja joi yoiai Felipen xobon noa kaa iki. Jara iká iki, ja kanchis ikainoa jan ja raanabo akinairibi.

⁹Jatian Felipen chosko bake xontakobo ikana iki benoomabo, jabo ikana iki, *profeta ainbobo.

¹⁰Jatian noa jain moa basi nete iketian, westíora *profeta Agabo janeya, Judeainoax joá iki.

¹¹Ja joninra noiba joxon, Pablon cintora bitaanan tanexetax menexeetaanan noa yoia: —Ja Diossen Shinanmanra yoiai, nato cintura ibora yatanhanan Jerusalénhainxon judíobaon neskáakin nexakanti iki. Jaskáaxonra ja wetsankonia jonibo menikanti iki ixon —akin jato aká iki.

¹²Jaskáakin noa yoiketian jain ikáboyaxonbi Pablo Jerusalénhain raankashamakin non tea iki.

¹³Ikaxbi Pablon noa yoia iki: —Winiamakanwe, matonra ea onísmai, nokonara jawemabi iki, nexakantibichora ea keenyamai, ja non Ibo Jesús kopí Jerusalénhainxon retekantiribira ea jawemabi iki —akin.

¹⁴Jatian Pablo chiteti atipanyamaxon non jenea iki, jainxon non yoia iki: —Ja non Ibon shinanxona keskatires ibanon —akin.

¹⁵Jaskata pekáo, non jawékibo benxoakin senenhax, noa Jerusalénhain kaa iki.

¹⁶Jain noa kaaitian Cesareankonia jatíribi joi akaibo nobé bokana iki. Jatian jabaonra noa ioa iki, Chipreainoa iká Mnasón janeya jonin xobonko, ja iká iki moatianbi joi akai, itan jaiba noa nokoti kaai.

¹⁷Jatian moa noa nokóketian, ja Jerusalénhainoa joi akaibaon raroshamanhanan noa bikana iki.

¹⁸Moa nete xabáketian, Pablo nobébi Jacoboiba merati kaa iki, jainribi ikana iki, jato ikinai ancianobo.

¹⁹Moa jato saludana pekáo, judíomabo xaranxon Diossen jaskara tee amaabo, Pablon onantishamanhakin jatíbi jato yoia iki.

²⁰Jaskáakin yoia ninkáxon, Dios iráke ataanan, Pablo yoikana iki: —Non wetsá; minra onanke, jawetii waranka judíobaonki joi ikonhakana ixon; ikaxbi jabo riki ja Moiséssen eséki kikini menikaatabo.

²¹Jainxonra ninkákanke, minki ja judíomaboiba ikana jatíbi judíobo, ja Moiséssen esébo jenekanon ixon min jato yoiai. Jainxon jaton bakebaon jakina rebichi xatexontimaakin itan, ja non axéboribi moa jenekanon ixon, min jato yoiaibo.

²²Jatian jaskara ikenki ¿Rama non jaweakai? Ayamaama arakanai, onankin ja mia neno joá.

²³Jakonra iti iki, non yoiai keskáakin min ati; noibara jake chosko joni, jabora Dios jawéki senenhaxonox yoyo ikanabo iki.

²⁴Ja jonibo ioax, jato betanbiribi ja axé senenhai, Dios bebon jakon inox chokítanwe. Jainxon jatíbi ja jayá, maxkoroonoxon biti jawékibo, jatonayabiakin kopíatanwe. Mia jaskáketianparira, jatíxonbi onankanti iki ja mia yoii ikanabo ikonma, itan minribi ja esekan yoiaibo senenhai.

²⁵Ja joi ikonhaa judíomabora, kirika neskáakin wishaxon moa non bomaa iki: Ja ikonma dios yoina nami menikana moa pikantima, jimi bomaama yoinabo pitima, joinman retea yoinabo pitima, wetsabo betanbires yorantibo atima —iki iká.

²⁶Jatian moa nete xabáketian, ja chosko joni ioax jato betanbi Pablo, Dios bebon jakon inox chokita iki. Jaskata pekáo, Dios rabiti xobo meran jikia iki. Jainxon jato yoia iki; jatiankaman ja axekan ikí chokíti nete senenai, itan ja senenketianpari jato westíorabo kopí, Dios jawéki meniti.

²⁷Jatian moa kanchis nete iti senenaitian, ja Asiainoa jawetii judíobaon, Dios rabiti xobo meranoa Pablo oinkana iki. Jatian jaskáakin ointaanan jaki sinákin jatíbi jain ikana jonibaon shinan tsokasmakana iki, jaskáaxonra yatankana iki.

²⁸Jainoaxa neskati saa ikana iki: “¡Noa akinkanwe *Israelita, jonibo! Nato joninra jatíbiain jato ésekin jakonmabires noa ninkakaamai. Jainxon ja Moiséssen eséribi jakonmabires imai itan nato Dios rabiti xoboribi jakonma ninkakaamai. Jainxon ja griego joniboribi jato jikimaxon, nato xobo, Dios bebon jakonma banémake”, ikibo.

²⁹Jaskatibora yoyo ikana iki, moabi ja Efesoainoa Trófimo betan jeman oinpachokanai ikax, ja Dios rabiti xobo meran Pablon jikimaa shinannax.

³⁰Jaskákinra jatíbi ja jemamea jonibo jato jakonma shinanmaa iki. Jatian ja jonibo ishtobeiranxon Pablo yatanhanan, Dios rabiti xobo meranoabi ninipatanboxon jeman pikokana iki. Jaskáaxon ishtonbires ja xobo xepokana iki.

³¹Moa Pablo retekasi ikanainbi, ja romano sontárobaon joni koshi comandante keshankana iki, ja jatíbi Jerusalén jemamea jonibo meskóbo shinannax moa tsokaskana.

³²Jatianbi jawen sontároboyabi jawen oficialbo tsinkiax ja jonibo tsamatain ishto bokana iki. Jatian jaton koshiyabi sontárobo bekanaitian oinxon, moa Pablo rishkikin jenekana iki.

³³Nokóxon, ja sontárobaon joni koshi comandanten, Pablo jato yatanmaxon, rabé cadenanin jato nexamaa iki. Jaskáaxon yokata iki, tsoarin itan jawe jawéki akárin ixon.

³⁴Ikaxbi jonibo meskotibo yoyo iki saa ikana iki. Jaskákanaitian ja comandanten, jakopíshaman jaskákanai ikon onanti atipanyamaxon, jawen sontárobo yoia iki, ja *cuartelain Pablo bokanti.

³⁵Jatian moa xobo tapitiain nokóxon, sontárobaon Pablo iabainkana iki, jonibo jaki tsokasi jakonmaakanaitian oinxon.

³⁶Ja jatíbi jonibo Pablo chibani beaibo ikana iki, neskati: “¡Moa retekanwe!” ikires saa iki.

³⁷Jatian ja xobo chiteain moa jikimai bokanaitian, Pablon ja sontárobaon coshi comandante neskáakin yokata iki: —¿Eaki mibé jawetii joishoko yoyo iti atipanyamaa? —akin. Jaskáa ja comandanten neskaa iki: —¿Minki griego join yoyo iti onanna?

³⁸Jaskara ikaxa ¿Mia iki ja Egipto joni, ja apoki jakonmaakin ja chosko waranka retemis joni, jain joni jayamainko jato boyantana? —akin.

³⁹Jatian Pablon yoia iki: —Eara ja Cilicia main iká kikin jema ninkakaatai, Tarsoainoax pikota judío joni iki. Eapari jawetii joi ja jonibo yoimawe —akin.

⁴⁰Jatian ja comandanten jen aka, tapitinin nixon, Pablonin jato meken chankanxona netékanketian, arameo join jato neskáakin yoia iki: