Hechos 20:24-32

²⁴Jaskara onanaxbira, ea mawátiki rakéyamai. Ea keenaikaya riki, ja Diossen noixon jato jakonhai joi yoikin senenhaax, raroshaman iti, non Ibon ea ati yoini keská.

²⁵Jatian ramara en moa akonkin onanke. Ja Diossen ikinaton jatikiriakin mato xaranxon en yoiaitian ea oinnabaonra moa ea oinwetsayamanoxiki.

²⁶Jakopíra en mato onantiakin yoiai, enra mato jawebi akinyamaa iki ixonra, en rama shinanyamai.

²⁷Ja jatíbi Diossen anoxon shinanna jawékibo joneyamakinra, en moa mato yoia iki.

²⁸Jaskara iken, matonbinix rama koiranmeeananbi, wetsa joi akaiboribi koirankanwe. Jabo ikínon ixonra, Diossen Shinanman mato *ancianobo imaa iki. Ja joi akaibora jawen Baken jimi kopi jato kishpinmaa iki.

²⁹Jainxonra en onanribike, ea kaa pekáora, pimís yoina keská jonibo benóxikanai, mato joi akaibo iketian, wetsa keskáakin yoixon mato joi jenemakasaibo.

³⁰Jawekeska ikaxa, ja mato xaran iká joi akaibaonbi, janso joibo jato yoinoxikanai, jato chibankanon ixon.

³¹Jaskara iken, koiranmeekanwe, shinankanwe kimisha baritiara, yaméyabi, netén winiananbi en mato esekin jeneyamaa iki.

³²Jaskara ikenra, rama Dioski itan jan mato noia jawen joiki en mato jeneai. Ja joira mato jan bebonbires jaki koshimati, itan jatíbi jawen joni ikaibo jato meniti yoini, meniti atipana koshia iki.