Hechos 20:1-13

¹Echiriꞌ xtaniꞌ ri ketukuk ri winaq, ri Pablo xebꞌusikꞌij ri kikojom rubꞌiꞌ ri Jesús. Xebꞌupixabꞌaj kꞌut y xebꞌulaqꞌapuj. Echiriꞌ xukꞌisbꞌej kan uchꞌaꞌtem kukꞌ, xel bꞌi y xeꞌela pa taq ri luwar re Macedonia.

²Xikꞌow kꞌu pa taq wa luwar chaꞌ rukꞌ ukꞌiyal pixabꞌanik kunimarisaj kikꞌuꞌx ri kikojom rubꞌiꞌ ri Cristo. Tekꞌuchiriꞌ, xeꞌela pa taq ri luwar re Grecia.

³Oxibꞌ ikꞌ xkanaj kan ri Pablo chiriꞌ. Uchꞌobꞌom chi kꞌut keꞌek Siria pa barco; pero raj judiꞌabꞌ xkiꞌan tzij chikiwach chaꞌ kakiꞌan kꞌax che echiriꞌ kuꞌkojo bꞌi ri barco. Ekꞌu ri Pablo xretaꞌmaj ri kinaꞌoj na utz taj chirij; ruma kꞌu riꞌ, xujalkꞌatij ruchꞌobꞌom chaꞌ katzelej pa taq ri luwar re Macedonia.

⁴E kꞌo hermanos xkachbꞌilaj bꞌi kꞌa pa taq ri luwar re Asia. Waꞌ e: ri Sópater aj Berea, ri Aristarco, ri Segundo aj Tesalónica, ri Gayo aj Derbe, ri Timoteo, yey ri Tíquico y ri Trófimo, ri e aj Asia.

⁵Ekꞌu rike xenabꞌej bꞌi y xojkoyꞌej chupa ri tinamit Troas.

⁶Yey riꞌoj, echiriꞌ ikꞌowinaq chi ri nimaqꞌij echiriꞌ katij ri pam na jinta levadura che, xojel pa barco chiriꞌ Filipos y pa woꞌobꞌ qꞌij xojopon kukꞌ pa ri tinamit Troas. Chiriꞌ xojkanaj kan wuqubꞌ qꞌij.

⁷Ri nabꞌe qꞌij re ri semana xqamol qibꞌ kukꞌ ri kikojom rubꞌiꞌ ri Cristo chaꞌ kaqatij ri cena re ri Qanimajawal. Ekꞌu ri Pablo kakꞌutun chikiwach konoje. Yey ruma chirajawaxik kel bꞌi rire chukaꞌm qꞌij, xnajtir che ri kꞌutunik kuꞌano. Xtikꞌoj kꞌu riꞌ raqꞌabꞌ y kꞌa kachꞌaꞌtik.

⁸Yey pa ri qamolom wi qibꞌ e chupa ruroxleꞌ ja chikaj y ukꞌiyal aqꞌ e tzijitalik.

⁹Kꞌo kꞌu jun ala Eutico rubꞌiꞌ tzꞌul chupa ri ventana yey okinaq lo jun uqusil waram che ruma ri lik naj kachꞌaꞌt ri Pablo. Bꞌenaq kꞌu riꞌ ruwaram, xtzaq lo che churox leꞌ ja kꞌa pulew y kaminaq xeꞌyakoq.

¹⁰Ekꞌu ri Pablo xqaj loq, xjupiꞌ puwi rala, xulaqꞌapuj y jekꞌuwaꞌ xubꞌiꞌij: «Maxiꞌij ibꞌ alaq, ma kꞌaslik» xchaꞌ.

¹¹Tekꞌuchiriꞌ, ri Pablo xaqꞌan tanchik y xujach ri cena re ri Qanimajawal. Ekꞌuchiriꞌ utijom chi ri cena, xujeq tanchi kachꞌaꞌtik y xukꞌisbꞌej waꞌ kꞌa pa rusaqribꞌal. Tekꞌuchiriꞌ, xumaj bꞌi ubꞌe.

¹²Ekꞌu ri Eutico e laꞌ kꞌaslik xkikꞌam bꞌi chirocho; ruma kꞌu waꞌ lik xbꞌochiꞌitaj kikꞌuꞌx konoje.

¹³Ri Pablo xraj keꞌek chiraqan pa ri tinamit Asón. Yey riꞌoj xojnabꞌej bꞌi pa barco chaꞌ keꞌqakꞌama bꞌi ri Pablo chiriꞌ. Jelaꞌ xqaꞌano ma e oj kanajinaq kan wi rukꞌ rire.