HECHOS 1:9-26

⁹Blozhse sca bnee me lo zho, zowique zho lo me, dzega, dzega laa me bzoquia gbaa. Glaale ziequia me zeeṉe znuse bdop tib xcow, laa me biongueetsse leṉ xcow co, goṉdraa zho me.

¹⁰Laa zho bii quiawique zhan gbaa zaatne goṉ zho biongueets me ga, tibaque zeeṉe bdziṉ chop mgui zaatne zo zho ga, dib nquitsbiese rna xab grop mgui co;

¹¹rëb me lo zho: ―¿Pe nacne squitaa quiawi to zhan gbaa? Zigne goṉ to i nagoṉ zey me gbaa niina, squique guiet me gbaa gaḻ dze ne laa me guiaad stib.

¹²Blozh ga dzigo laa zho wbi guic gui co (lëë Gui Oliv ga). Zhisaque bzë zho laa zho bdziṉle Jerusalén, lalse ne rzë zho dze ne rdziiladz zho lo dziin.

¹³Bdziṉ zho zaatne rbëz zho, biep zho leṉ yu ne riaaṉ glaa; sac leṉ yu glaa co ga no zho. Ga rbëz Pedr, rbëz Ndrés, Jacob, Juan, Lip, Mazh, Bartol, Matew, ni Jacob ne nac xingan Alfé; Simón Zelot, ni Judas meṉlidz Jacob.

¹⁴Grëse zho tibaque rcaalsa zho rzodiidznie zho Dios grë zho zha bets Jesús, xniaa me Marí, ni grëraa meṉ wnaa ne nacgrë zho.

¹⁵Tib dze pcaalsa maase tib gayoo gaḻ zho, dzigo guso Pedr bnee me lo zho, rëb me:

¹⁶―Grëse to bets, grëse to bzian, goḻgacnaṉ gaṉle, miṉe beeṉ Judas zeeṉe sca güeyto me Jesús, nole ne sca gaca. Lo Xtiidz Dios zhobneew, lëë miṉ co pquiaa rey David zeeṉe psiaab Espíritu Santa guic me.

¹⁷Ye Judas gocgza no, ye me nac diidz niuṉ dziin ne nodziuuṉ no niina.

¹⁸’Ni nligaa laa ne niuṉ me dziin co, leḻ beeṉ me guieḻntseeb pto me Jesús, ni blozh ga lëëque lo liu ne bziuu dimi ne bdiizh zho me ga, ga güeytsobe me bzob guic me lo liu, wbiḻgazh me, nëzrii nëzrec bliaaḻ leṉ me.

¹⁹Miṉ co nacne zeeṉe laa grë zha Jerusalén gocnaṉa, dzigo bleelë zho liu co “Liu Ren”.

²⁰’Zigne rneque naa ga ―rëb Pedr―, ible lo Xtiidz Dios sca zhobnee; ni lëë miṉ co ga raquiet zaatne znu rnee: Ible ziaaṉdets lidz zho, ni stib choot gbandraa zaatne bio zho. Ni rneequew: Zhaale zha ne guiaaṉnie dziin ne no niuṉ zho.

²¹’Miṉ co nagoṉ, ible nonguieḻa so tib zha ne guiaaṉ xlugar Judas, gacgza zho no guioxobneṉ no ne nli brieeban Jesús. Nana sca, lo grë zha ne nacgrë no psilo bzianie no me zeeṉe pchoobnis Juan me, haxta goḻ dze ne laa me zey gbaa, lad co goḻgotsaa cue ne tib zha ne so gacgza no.

²³Dzigo ble zho tib meṉ ne lë José Barsabás (lëëque me ga rnee zho Just), ni stib meṉ ne lë Matí.

²⁴Blozh ga, bnab zho lo Dios, rëb zho: ―Dios, ndioṉ no luu nac meṉ ne rnabey no; ndioṉ no luuse nac meṉ ne ruṉbey zdoo tib tib miech, gane niina laa no rnab lo luu, luu blu dieṉ cho tib zha rii racladz luu so

²⁵guṉ dziin ne psaan Judas; sac laa Judas zeyle zaatne rieguiaḻ Judas.

²⁶Blozhse bnab zho lo Dios, laa grop zha co bio rif. Nacne brieequia meṉ ne lë Matí ga, dzigo dze cotaa laa me gocgza stsiiptib zha poxtl co.