Hechos 1:3-14

³Nach gwde gosot beṉe' mal ca' Jesúsen' na' gwde bebane' ladjo bene' guaten' nach jalo'elagüe' postlw c̱he' ca'. Na' da' zan da' bene' cont goseṉezde' mbanczen'. Na' gwdalene' ḻegaque' c̱hoa ža na' bzejni'ide' ḻegaque' can' chnabia' Diosen'.

⁴Na' šlac ṉe' zoa Jesúsen' len postlw c̱he' ca' gože' ḻegaque' cbi yesyežaše' ciuda Jerusalénṉa'. Gwne': ―Ḻe yega'aṉ ḻe cueze gac can' gwna X̱a' Diosen' gac, ca dan' bzejni'ida' le'e.

⁵Da' zaque' ben Juan da' bzoe' beṉe' nis, perw yeto c̱hope ža da' zaca'ch gac c̱hele dan' yedesoa Spiritw c̱he Diosen' ḻo' yic̱hjlažda'olen' ṉabi'an le'e.

⁶Na' ža na'teze šlac ṉe' zjandop zjanžague' len Jesúsen' gose'ene': ―X̱anto' ¿ba bžin ža gono' cont yechoj nación Israel c̱hechon' ḻo na' beṉe' zito' ca'?

⁷Jesúsen' gože' ḻegaque': ―Bitw naquen ṉezele bi ža bi hor gon X̱acho Diosen' da' ca' toze' ba bžie' bia' gone'.

⁸Perw na' cate' yedesoa Spiritw c̱he'na' len le'e, gaclenen le'e len yeḻa' guac c̱henṉa' cont güe'le xtižan' ciuda Jerusalén ni, na' doxen ga mbane distritw Judean', na' distritw Samarian', na' doxen yežlion'.

⁹Beyož gwna Jesúsen' ca', cheseṉa'te beṉe' ca' chesejnilaže' ḻe', beyepe' yaba to ḻo' bejw na' bich besele'ede' ḻe'.

¹⁰Na' ṉe' cheseṉa'te beṉe' ca' ḻe'e yaban' gan' besele'ede' beyepe', cate'cze gosacbe'ede' ba zjazecha c̱hope angl len ḻegaque' beṉe' zjanyaz lache' šiš.

¹¹Na' beṉe' ca' c̱hope gose'e ḻegaque': ―Beṉe' Galilea, ¿bixc̱hen' chṉa'le ḻe'e yaban'? Can' ble'ele beyep Jesúsen' yaban' caten' bechoje' ladjwlen', can' le'eczele yide' da' yoble.

¹²Na' nite' ya'a dan' nzi' Ya'a Olivos na' jaya'aque' Jerusalénṉa'. Jerusalénṉa' naquen gaḻa'ze con ca'te' de ḻsens yesa'aque' ža c̱he Dios can' ža ley c̱he beṉe' Israel ca'.

¹³Na' cate' besyežine' Jerusalénṉa' postlw ca' šnej na' beṉe' ca' zjanžague' gosegüe' gan' nite'na' ḻo' cuart zoa yic̱hjen'. Postlw ca' šnej beṉe' quinga: Pedro, Jacobo, Juan, Andrés, Felipe, Tomás, Bartolomé, Mateo, Jacobo xi'iṉ Alfeo, na' Simón ben' chon txen partid dan' nzi' cananista, na' Judas ben' nac beṉe' biše' Jacobon'.

¹⁴Na' gosenita'teze postlw ca' šnej chosoḻ güiže' Diosen' txen len beṉe' ca' zjanaque' biše' Jesúsen' na' len María xṉa' Jesúsen' na' len yezica'chle no'ol ca' zjanžag.