Hechos 1:10-25

¹⁰Tsal niꞌ tuꞌyúëꞌ luzxbál catiꞌ niꞌ buëpëꞌ Jesús, gululuíꞌ lauquëꞌ ga naꞌ nacuꞌë chopëꞌ gbaz laꞌy, nácuquëꞌ lariꞌ chguichdauꞌz.

¹¹Glëꞌ lequëꞌ chopëꞌ ni, taꞌnë́ꞌ: ―Bönniꞌ Galilea, ¿bizx quië ruyuliꞌ luzxbál? Lëczëꞌ Jesús ni ziꞌa gzëꞌë ga zoaliꞌ, buëpëꞌ yehuaꞌ yubá, lëzcaꞌ cni huödëꞌ leyúbl ca naꞌ chbléꞌiliꞌ‑nëꞌ zhuöjëꞌ yehuaꞌ yubá.

¹²Niꞌr gulazë́ꞌë guíꞌadauꞌ naꞌ nazíꞌ lei Guiꞌa Ga Röꞌgac Yag Olivo, yhuöjquëꞌ Jerusalén. Dë gal‑laꞌz ga dë Jerusalén guíꞌadauꞌ ni, tsca naziꞌquëꞌ latj taꞌzë́ꞌë dza laꞌy quequëꞌ.

¹³Catiꞌ guludxinëꞌ yödz niꞌ, gulabenëꞌ ga nac buróp cuia lu yuꞌu, ga niꞌ taꞌcuꞌë Pedro len Jacobo len Juan len Andrés len Felipe len Tomás len Bartolomé len Mateo len Jacobo, zxiꞌnëꞌ Alfeo, len Simón, bönniꞌ naꞌ ruiꞌ ladxëꞌë ladzëꞌ, len Judas, böchëꞌë Jacobo.

¹⁴Tsazxö́n tuꞌlidzëꞌ Dios yúguꞌtë bönniꞌ ni, atiꞌ nunquëꞌ lequëꞌ tsazxö́n yuguꞌ böchëꞌë Jesús, len María, xnëꞌë Jesús, len yelaꞌcnu ngul caꞌ.

¹⁵Laꞌ dza naꞌz gzuinëꞌ Pedro gatsj lahuiꞌl ga nacuꞌë böchiꞌ lzaꞌruꞌ naꞌ taꞌyejlëꞌë Cristo. Glac gdu ca xoplalj bunách nup nudubgac niꞌ.

¹⁶Gudxëꞌ lequëꞌ Pedro, rnëꞌ: ―Böchiꞌ lzaꞌadauꞌ. Ben bayúdx butság le nayúj lu guich laꞌy, ca naꞌ gnëꞌ zíꞌatël Dios Böꞌ Laꞌy, le buzujëꞌ lu guich David, ca guc queëꞌ Judas, bönniꞌ naꞌ bchëꞌë nup niꞌ gulazö́n Jesús.

¹⁷Gbáblenëꞌ rëꞌu Judas naꞌ, len bénlenëꞌ rëꞌu tsazxö́n dxin ni.

¹⁸Gulaziꞌnëꞌ tu laꞌ yël lazxj qui döꞌ naꞌ biꞌë bönniꞌ ni. Gbixëꞌ brözaꞌ lëꞌë Judas ni, atiꞌ gularúj yúguꞌtë le dzöꞌ lëꞌë.

¹⁹Catiꞌ gulayöni lë ni bunách nacuáꞌ Jerusalén, gluꞌë lei laꞌ yël naꞌ Acéldama, tu didzaꞌ hebreo le rna lu didzaꞌ xidzaꞌ: “Laꞌ Yël Qui Rön”.

²⁰Cni guc queëꞌ Judas, ca naꞌ nayúj lu guich laꞌy nazíꞌ lei Salmos, le rna: Ugáꞌn caꞌz lidxëꞌ, Len cutu gdzöl nu soa yuꞌu naꞌ. Rna caꞌ: Nu yubl tsaz xlatjëꞌ.

²¹’Run bayúdx naꞌa cöruꞌ‑nëꞌ bönniꞌ gunëꞌ rëꞌu tsazxö́n quië gunëꞌ lnaꞌ lau queëꞌ Jesús, ca guc, bubanëꞌ lu yöl‑laꞌ gut. Ral‑laꞌ gaquëꞌ bönniꞌ nutsëꞌë ladj bönniꞌ niꞌ gulacuáꞌlenëꞌ rëꞌu dza niꞌtë catiꞌ niꞌ gdálenëꞌ rëꞌu Xanruꞌ Jesús, gulazú lauquëꞌ nacuáꞌlenëꞌ rëꞌu catiꞌ niꞌ buquilëꞌ bunách nis Juan, ga bdxintë dza buëpëꞌ Jesús yehuaꞌ yubá, gzëꞌë ga zoaruꞌ.

²³Niꞌr gululuꞌë chopëꞌ, José len Matías. José naꞌ lëꞌ caꞌ Barsabás, len zoa yetú lëꞌ Justo.

²⁴Niꞌr gululidzëꞌ Dios, taꞌnë́ꞌ: ―Xantuꞌ Dios, núnbëꞌczuꞌ icj ládxiꞌdauꞌgac yúguꞌtë bunách. Buluíꞌi netuꞌ nulquëꞌ chopëꞌ ni chgröczuꞌ Liꞌ

²⁵quië tsaziëꞌ lu dxin ni quië gaquëꞌ gbaz quiuꞌ, tsaziëꞌ xlatjëꞌ Judas, bönniꞌ niꞌ bnitiëꞌ xlatjëꞌ le benëꞌ dul‑laꞌ, atiꞌ gyijëꞌ xlatjczëꞌ latj chul.