Hechos 19:8-19

⁸Xok kꞌu ri Pablo pa ri sinagoga, yey oxibꞌ ikꞌ kꞌu riꞌ xutzijoj ri Utzilaj Tzij y na xuxiꞌij ta kꞌana ribꞌ che uꞌanik waꞌ. Kꞌolik kakichapalaꞌ kibꞌ kukꞌ raj judiꞌabꞌ puwi ri kukꞌutu y lik xutij uqꞌij chaꞌ kukoj pa kijolom ri usukꞌ puwi rutaqanik ri Dios.

⁹Pero e kꞌo jujun chike xkiꞌan lik ko che kibꞌ y na xkaj ta kꞌu xkikoj rubꞌiꞌ ri Cristo; xkijeq kꞌu riꞌ tzel kechꞌaꞌt chirij ri Kꞌakꞌ Bꞌe re ri Utzilaj Tzij e laꞌ chikiwach rukꞌiyal winaq. Ekꞌu ri Pablo xresaj bꞌi ribꞌ chikixoꞌl y xebꞌukꞌam bꞌi ri kikojom rubꞌiꞌ ri Cristo. Chujujunal qꞌij kꞌut, ri Pablo katzijonik y lik kachꞌaꞌt chwi taq rukꞌutunik chikiwach, pa ri luwar pa kakꞌutun wi jun achi Tirano rubꞌiꞌ.

¹⁰Pa kebꞌ junabꞌ e riꞌ jelaꞌ xuꞌan ri Pablo, kakꞌutunik. Ruma kꞌu laꞌ, konoje ri e aj judiꞌabꞌ y ri na e ta e aj judiꞌabꞌ e kꞌo pa taq ri luwar re Asia, xkita ri Utzilaj Tzij re ri Qanimajawal Jesús.

¹¹Yey ruma kꞌu ri Pablo, ri Dios xuꞌan nimaq taq milagros na jinta kꞌana ilitajinaq wi.

¹²Xuꞌana ne riꞌ, kakꞌam bꞌi suꞌt o kꞌul ikꞌowisam chirij ri Pablo y kayaꞌ chike ri yewaꞌibꞌ, y jelaꞌ kekunutajik yey ri itzel uxlabꞌixel kebꞌel bꞌi chike tikawex.

¹³Pero e kꞌo jujun aj judiꞌabꞌ xa ebꞌikꞌowel pa taq tinamit yey e kiwach kekesaj itzel uxlabꞌixel chike ri tikawex. Rike xkitij uqꞌij kakesaj bꞌi ritzel taq uxlabꞌixel chike ri winaq pa rubꞌiꞌ ri Qanimajawal Jesús, jewaꞌ kakibꞌiꞌij: «Chupa rubꞌiꞌ ri Jesús ri kutzijoj ri Pablo, kintaqan piwiꞌ chaꞌ kixel bꞌi» kechaꞌ.

¹⁴Jujun chike ri kakiꞌan waꞌ e ri wuqubꞌ ukꞌajol jun achi Esceva rubꞌiꞌ. Rire e kukꞌil raj judiꞌabꞌ yey e kukꞌil ri nimaq e aj chakunel pa Rocho Dios.

¹⁵Kꞌo kꞌu jun qꞌij, jun itzel uxlabꞌixel xukꞌul uwach chike ri wuqubꞌ ukꞌajol ri Esceva: «Wetaꞌam uwach ri Jesús y wetaꞌam china ri Pablo; noꞌj riꞌix, ¿ix chinoq?» xchaꞌ.

¹⁶Ekꞌu rachi, ri kꞌo puqꞌabꞌ ri itzel uxlabꞌixel, xukꞌaq ribꞌ pakiwiꞌ y rukꞌ unimal uchuqꞌabꞌ xebꞌuchapo, yey ekꞌu riꞌ rire ri xuchꞌij kichuqꞌabꞌ y lik xuꞌan kꞌax chike. Jekꞌuriꞌlaꞌ, rike echꞌanalik xebꞌanimaj bꞌi chupa ri ja e kꞌo wi.

¹⁷Y konoje ri ejeqel chupa ri tinamit Éfeso xketaꞌmaj waꞌ. Ekꞌu ri e aj judiꞌabꞌ y ri na e ta aj judiꞌabꞌ lik xkixiꞌij kibꞌ che; jekꞌuriꞌlaꞌ, waꞌ xeꞌeloq re yakbꞌal uqꞌij rubꞌiꞌ ri Qanimajawal Jesús.

¹⁸Lik kꞌu e kꞌi riꞌ chike ri kikojom rubꞌiꞌ ri Cristo, xekꞌunik e laꞌ chiwachil kakiqꞌalajisaj taq janipa ri na utz taj kiꞌanom.

¹⁹Lik kꞌu e kꞌi chike ri ebꞌuꞌanom aj itz y aj qꞌij, xkikꞌam taq lo ri kiwuj re majbꞌal itz y xkiporoj chikiwach konoje. Xajilax kꞌu riꞌ janipa kuꞌana ri rajil waꞌ y xuꞌana cincuenta mil chi saqil puaq re plata.