Hechos 19:20-27

²⁰Jekꞌuriꞌlaꞌ xukich wubꞌi ribꞌ ri Utzilaj Tzij re ri Qanimajawal y xeꞌek uqꞌalajisaxik rukꞌ unimal chuqꞌabꞌ; yey lik katajin kikꞌiyarik ri kekojow re.

²¹Ikꞌowinaq chi taq waꞌ, ri Pablo xutik pa ranimaꞌ keꞌek pa ri tinamit Jerusalem echiriꞌ ikꞌowinaq chi pa taq ri luwar re Macedonia y re Acaya. Jewaꞌ xubꞌiꞌij: «Echiriꞌ inikꞌowinaq chi chupa ri tinamit Jerusalem, lik chirajawaxik chwe kinopon pa ri tinamit Roma.»

²²Xebꞌutaq kꞌu bꞌi pa taq ri luwar re Macedonia kebꞌ chike ri ketoꞌw re, waꞌ e ri Timoteo y ri Erasto. Yey rire xkanaj chi kan jujun qꞌij pa taq ri luwar re Asia.

²³Chupa taq kꞌu laꞌ la qꞌij, pa ri tinamit Éfeso xkijeq ketukuk ri winaq chirij ri Kꞌakꞌ Bꞌe re ri Dios y na xa ta jubꞌiqꞌ ri xkiꞌano.

²⁴Waꞌ e ruma jun achi Demetrio rubꞌiꞌ, aj chakunel rukꞌ chꞌichꞌ re plata. Rukꞌ waꞌ wa chꞌichꞌ re plata kuꞌan raltaq ko ja, ukꞌaxwach ri rocho ri kitiox Diana. Yey chwach waꞌ, na xa ta jubꞌiqꞌ ri kakichꞌak janipa ri kechakun rukꞌ.

²⁵Ekꞌu waꞌchi xebꞌumol wa raj chak, kukꞌ jujun chik aj chakibꞌ junam ri kichak y xubꞌiꞌij chike: «Alaq achijabꞌ, ralaq etaꞌam alaq e ruma wa jun chak lik kꞌo qabꞌeyomalil.

²⁶Pero ilom kꞌu alaq y tom alaq ri uꞌanom lo ri Pablo. Ri kuꞌano e kukoj pa kijolom ukꞌiyal tikawex na e ta dios ri xa e ꞌanom rukꞌ kiqꞌabꞌ ri tikawex. Yey na xew ta kukꞌut waꞌ pa ri qatinamit Éfeso, ma ya laj kumaj ronoje pa taq ri luwar re Asia.

²⁷Ruma kꞌu waꞌ, kꞌo ne pa saq na kaloqꞌ ta chi ri qakꞌay, yey laj kuꞌana ne riꞌ chikiwach ri winaq na jinta chi uqꞌij ri rocho ri nimalaj qatiox Diana. Jekꞌulaꞌ, kujeq na jinta chi uwach ri qatiox, ri kaloqꞌox uqꞌij pa taq ronoje ri luwar re Asia y che ronoje ruwachulew» xchaꞌ.