HECHOS 19:2-21

²Lex wnabdiiz Pabel lo men, re Pabel: ―¿Pe wkakwent de Espíritu Sant chene wlaleedx de Jesucrist? Wke men re men: ―Ni gardet gon noo ne nuu Espíritu Sant.

³Lex wnabdiiz Pabel lo men ste, re Pabel: ―¿Pezee nak gyelrobnis ne wrobnis de yra de bes? Wke men re men: ―Gyelrobnis ne wneluu Xwa.

⁴Lex re Pabel lo men: ―Wtxobnis Xwa mén ne wsaan xgyelmal, per re Xwa lo men ne rap men degne ylaleedx men men ne gyed zëëd; laa mén guin nga nak Jesucrist.

⁵Chene wluzhse won men neree, wrobnis men por la Jesucrist.

⁶No chene wxob nya Pabel xtoo men, waknonen Espíritu Sant men yra men, lex wzelo men wnii men ste klas diiz no wzëët men diiz ne wguu Dëdyuzh lextoo men.

⁷Zeg chibtxup nak yra mgyeey guin.

⁸Tson mëëw wa Pabel lenxeydoo men-Israel, wkazëët Pabel xdiiz Dëdyuzh lo men sin ne wdxedet Pabel; wye Pabel gan pezee ylaleedx men logne rkyeen Dëdyuzh.

⁹Per wakndíp lextoo men gwrol men, nadet men nlaleedx men xdiiz Jesucrist, lel wzelo men rnii men dizmal por xdiiz Jesucrist nes lo yra mén. Orguin wruu Pabel lad men yra Pabel men ne che rlaleedx xdiiz Jesucrist, wano Pabel men lenxyulowskwel te mén ne la Tiranno. Nga wzëët Pabel xdiiz Jesucrist lo men yzaandxee dxe.

¹⁰Zenga wkaa Pabel txup iz, ne le yra mén ne nuu Asia won xdiiz Jesucrist, nigle men-Israel, nigle mén ne nakdet men-Israel.

¹¹No por xpoder Dëdyuzh wlaa Pabel gyelmilaguer ne nzoon.

¹²Axtegue bayles o lër ne rdee led Pabel, reey méno por mengyiz no ryaken mengyiz no rruu menzab ne nuu lextoo men.

¹³Lex neguin no tebëd men-Israel ne zad ka rboo menzab lextoo mén wlaan nkyiinen la Jesus, re men lo menzab: ―Por la Jesus ne rzëët Pabel, ykyeen noo de ne yruu de lextoo ménree.

¹⁴Laa yra guedx xpee te men-Israel ne la Esceva ne nak te fxuz ne rnebééy lo yra fxuz nak ne wlaa neree.

¹⁵Per te chene kalaa men neree, wke te menzab, re menzab lo yra mén guin: ―Rnebeey noo Jesus, no nan noo gan txu nak Pabel, per laa de yra de, ¿txu nak de?

¹⁶Orguin wyab mgyeey ne nuu menzab lextoo led yra mén guin; kom kesentyent ndíp men, wun men gan lo yra mén guin; kesentyent wdee men xkwent men; por neguin wruu yra mén guin ruyuu guin, noze rzhoon men, noze bëël men, noze nloo men ren.

¹⁷Kesentyent wdxe yrandxee mén ne nuu Efeso ne waknan men neree, nigle men-Israel, nigle mén ne nakdet men-Israel; wzelo men wzaknon men Jesucrist.

¹⁸No ndalyaa mén ne che wlaleedx Jesucrist wa wxobdol nes lo yrandxee mén yra ne mal ne wlaa men.

¹⁹No ndal ke mén ne wseed gyelebruj wdxiin wdxinneey xliber, lex wzeey meno nes lo yrandxee mén. Chene wboo men kwent, non yra liber guin zeg txupchiimil med plat.

²⁰Zenga wrëëtsre xdiiz Jesucrist no waknyoo ne rapo poder.

²¹Chene che wluzh wak yra neree, wzoob xtoo Pabel ne tsa Pabel Jerusalén, per primer tsa Pabel Macedonia no le Acaya. No re Pabel ne chene che wa Pabel Jerusalén, rap Pabel degne tsa Pabel no Roma.