Hechos 19:13-24

¹³Jatian jainribi ikana iki, ja jato yoshin pikoxoni jatíbiain kawantanai jawetii judíobo. Jabaonra, ja non Ibo Jesussen janenko yoshinbo píkoshokokaskin jato neskáakana iki: “¡Ja Pablon yoiai Jesussen janenkora en mato yoiai yoshinbó, pikókanwe!” akin.

¹⁴Jaskáakin akaibora ikana iki, Esceva janeya judío jonin kanchis bake. Ja Esceva iká iki *sacerdotebaon koshi.

¹⁵Ikaxbi yoshinman jato yoia iki: “Enra ja Jesús betan Pablo onanke, ikaxbi ¿Matokan tsoabo iki?” akin.

¹⁶Jaskátaanan, ja yoshinman iboa jonin, jabákawanxon jato yatantaanan, ramiayoxon moa jatoaresa iki. Jato jaskáa chopaomabo itan xatébiresbo ja xobomeax jabákana iki.

¹⁷Jato jaskáa ninkatax, jatíbi ja Efesoain ikana judíobo, itan judíomabo ikonbiresi ratékana iki. Jaskaxon ja non Ibo Jesussen jane, moa iresama jatíbiainxon onankana iki.

¹⁸Jainoax ja joi ikonhaa icha jonibaonribi, jaton jakonma jawéki akátiaibo, joni icha bebonxonbo Dios keshankana iki.

¹⁹Jatian icha ja yobé jawékiki koshia ikátiaibaonra jaton yobéti kirikabo bexon, jatíbi jonibo bebonxon menokana iki. Ja menokana kirikabaon kopí tsekakana iká iki, pichika chonka waranka koríkibira.

²⁰Jaskataxa ja non Ibon joi jatíbiain pextina iki, itan jawen atipana koshiribi jato oinmaa iki.

²¹Jaskarabo iká pekáo, Pablon shinanna iki, Macedonia betan Acaya main iká jemabaon jato oinni kaax, Jerusalénhain tekíti. Jatian Jerusalénhain katanax joáx, Roma jemanribi kati shinanna iki.

²²Jaskáxon jan akinnai joni rabé, Timoteo betan Erasto Macedonia main jato raanax, Pablobiribi jawetii neterespari ikí, Asiainbi baneta iki.

²³Ja netebaonra Efesoain, ja non Ibon joi yoiaiboki kikini sinákana iki.

²⁴Jan jato jaskáaibora ikana iki, Demetrio janeya jonin jato ikinaibo. Ja Demetriora iká iki, *platanin teetai ixon, ja dios ainbo Diananin xobo jisáshokobo axon, ja jabé teetai jonibo icha koríki jato kanankiinai.