HECHOS 19:1-15

¹Katen' wzóa Apolo ḻo yež Korinto, wdé Pablo gan zej nnita' yež ka' zej žen' yelate' ža'le, na' bḻe'e ḻo yež Éfeso. Ḻo yežen' bejx̱ake'e baḻe benne' ka' žejḻé'gake' che Benne' Criston'.

²Pablon' wnnable' ḻégake', na' wnné': —¿Bedjsoaḻen Dios Be' La'y ḻe'e katen' bejḻe'le che Benne' Criston'? Belyi'e ḻe': —Bi na' yenlto' cha' zoa Dios Be' La'y.

³Naž Pablon' wnnable' ḻégake', na' wnné': —¿Nakx̱ gok da' bezoale nis? Na' wnnágake': —Kan bezóa Ẕwa benách ka' nis.

⁴Pablon' wnné': —Ẕwan' bezóe' benách ka' nis, benne' ka' beyát ḻáže'gake', na' Ẕwa na'kzen' gože' ḻégake' žaḻa' chejḻé'gake' che Bennen' za' ze'e ka ḻe', Bennen' lie' Jesús, na' nake' Ḻe' Benne' Criston'.

⁵Kate' benne' ka' béngekle' da' ni dan' ẕnna Pablon', bezóagake' nis dan' ba žejḻé'gake' che X̱anžo Jesús.

⁶Kate' Pablon' bx̱oa ne'e ḻégake', na' wnnable' Dios ḻo wlázgake', na' Dios Be' La'y bedjsóaḻene' ḻégake', na' bcháḻjgake' diža' yoble, na' bcháḻjgake' ḻo wláz Dios.

⁷Gokgak benne' ki chežinnoe'.

⁸Wzóa Pablon' ga na' ka chonne byo', na' žó'oteze' ḻo yo'o gan ẕdobgak benne' judío ka' nich yéngekle' x̱tiža' Dios, na' ḻo yeḻa' wechóg ḻaže' bchaḻje' ḻáwgake'. Bcháḻjḻene' ḻégake', na' gónele' wḻoe'ele' ḻégake' nak da' li da' ẕnne' kan ẕnna bia' Dios.

⁹Baḻe' ben chóchgake' yichj ḻáẕdo'gake', na' bi bejḻé'gake' che Benne' Criston', na' wnnégake' che x̱tiža' X̱anžon' gan zej nnita' benne' zan ka'. Naž Pablon' bekwase' ḻen benne' judío ka', na' bebeje' benne' ka' na'le, benne' ka' žejḻé'gake' che Benne' Criston'. Tža tža bcháḻjḻene' benne' ka' žejḻé'gake' chie' Ḻe' gan ẕdóbgake' ḻo yo'o gan žsedle Tiranno benách ka'.

¹⁰Ki bénteze Pablon' ka chopiz, na' ka' goken, yógo'te benách ka' nníta'gake' ḻo yež ka' gan nbab Asia, benne' judío ka', na' benách zi'to' ka', béngekle' kan nak che X̱anžo Jesusen'.

¹¹Dios bene' da' zan yeḻa' wak ẕen ḻo na' Pablon'.

¹²Ka' goken, baḻe benne' ka' béx̱wgake' láže'do' ka' da' bchej Pablon' yichje', na' laže' cheḻá'a ka' da' bde'e ḻi'e, na' yjwá'gake' ḻégaken gan zej nnita' benne' yižwé' ka'. Beyákgake' kan zej nak yižwé' ka' che chégake', na' bežojgak be' x̱iwe' ka' zej yo'o benne' ka'.

¹³Naž baḻe benne' judío, benne' wdá žag ka', benne' ẕbéjgake' be' x̱iwe' ka', gónegekle' wkóngekle' žin la X̱anžo Jesusen' nich yebéjgake' be' x̱iwe' ka' zej yo'o benách ka', na' wnnágake': —Ni'a che la Jesús, Bennen' ẕchaḻj Pablon' kan nak chie', že'to' ḻe'e yežojle.

¹⁴Ki bengak gaže benne' byo ẕi'n Eseba, to benne' judío, benne' blo ládjwgak bx̱oz wnná bia' ka'.

¹⁵Beží'i be' x̱iwen', na' wnnán: —Nónbi'a Jesusen', na' nnezla' no benne' nake' Pablon', san ḻe'e, ¿noẕ benne' ḻe'e?