Hechos 18:15-27

¹⁵Ikaxbi matora ja maton onanna join paranan, jainoax janebaon paranan, itan ja maton esekan parananbores, ikí iitai. Jaskara joibora maton ebé benxoati yamake. Matonbikaya, mato jaskataibo betan benxoakanwe —akin.

¹⁶Jaskáaxon ja joi benxoati xobonkonia jato pikoa iki.

¹⁷Jatian Sóstenes iká iki ja tsinkíti xobomea jaton koshi. Ja joni jatíxonbi yataanan, joni koshi Galión bebonxonbi rishkionkana iki. Jainxonra abákanon ixon Galiónman jato oinresa iki.

¹⁸Jatian Pablo basichaapari, Corintoainbi iká iki. Jain iitibi moa wetsanko kakin, ja joi akaibo yoitaanan, moa Siriain kaai wapóronin naneta iki. Kaitian Priscila betan Aquilan chibana iki. Kaax Cencreas ikain nokotax, wetsanko kaai tekitamabi, jaskánoxon Dios yoia ikax, ja senenhai Pablo maxtani maxkoroota iki.

¹⁹Jatian boax, Efesoain nokóxon, ja tsinkíti xobonko jikii kakin, Pablon ja Priscila betan Aquila potabaina iki. Jatian moa jikiax, jain tsinkíkana judíobo betan yoyo ika iki.

²⁰Jatian ja judíobaon yoikana iki, basichaapari jain jato betan iti, ikaxbi Pablo keenyamaa iki.

²¹Jaskáxon Pablon jato neskáakin yoia iki: “Dios keenketianra, ea jakiribi joríbati iki mato oinni”, akin. Jato jaskáabaini ja Efesoainoax wapóronin nanetax moa kaa iki.

²²Jainoax ja Cesareanko nokotax, ja Jerusalénhainoa joi akaibopari jato oinni kaa iki. Jain basichaa ikax, moa tekíkaini Antioquíain kaa iki.

²³Jain basichaa itaanan, moa jakiribi banékin, Galacia betan Frigia main iká jemabotiibi jainoa joi akaibo joi yoianan jato koshi shinan bimaboa iki.

²⁴Ja netebaonribi Efesoain westíora judío joni nokota iki. Jawen jane iká iki Apolos, Alejandría jemameax pikota. Ja iká iki, kikinhakin joi yoiti onan itan kikinbiresakin Diossen kirika meran iká joibo onanna.

²⁵Já iká iki, non Ibon joi onanmakana kikinshamani axea. Jaskara ixon keenshamankin, onantishamanhakinbo ja Jesúskiriti iká joibo jato yoia iki. Juanman jato bautizankatiai joibores onanna ixonbi.

²⁶Jaskara ixonbi, ja tsinkíti xobo meranxon Apolosnin, onsatanyamakin jato yoia iki. Jato jaskáakin yoiwana ninkáxon, Priscila betan Aquilanin jabichobiribi kenaxon, jaton xobon iwekana iki; jainxon onantishamanhakin jato Cristo kiri iká joibo yoixon jato onanmanon ixon.

²⁷Jatian ja Acaya main Apolos kakasaitian, ja joi akaibo jakon ikana iki. Jaskaxon jayá kati kirika wishaxonkana iki, kaketian jakonhakin bikanon ixon. Ja Acayain nokóxon, ichabiresakin jato akinna iki, ja Diossen jakon shinanman akinatonres jawen joi ikonhakabo.