10sa'csi narä suganää́ luj. Rut gacdi gun latsiajlu. Aguleä xhidalduxh bejṉ lo guejdxre te gacreni xpeṉä ―räjp Dios.
11Ni'c bia'n Pabl ro'c tebizgarol. Baluiini xtidx Dios lojreni.
12Che gujc Galíon gubernadoor xten Acaya, tejsi xhigab bejn rexpejṉ Israel bidojpreni te gunaazreni Pabl. Sanäreni Pabl jusgaad cadro yu' Galíon.
13Räjpreni lo Galíon: ―Niguiire caguluii rebejṉ gaṉreni Dios garenca mood, xhet si'cti ni caj lo xleiinu ―räjpreni.