Hechos 17:7-15

⁷Jatian jabora Jasónman jawen xobon jato imake! ¡Ja jonibora, ja icha mai iboaa romamea apon eséboki yoitimakanai. Wetsa apo Jesús janeyaronki jake ikibora ikanai! —ikibo.

⁸Jaskákanaitian ninkatax, ja joniboyabi jaton koshibo ratetax, sinákana iki.

⁹Jatianra Jasón betanbi ja wetsa joi akaibo, jayá pikonoxon jato kopí yokákana iki.

¹⁰Jainxon ja yamébi ja joi akaibaon, Pablo betan Silas Bereain raankana iki. Jain nokótaanan, ja judíobo jain tsinkíti xobonko jikibekona iki.

¹¹Jainoa judíobora, ja Tesalónicainoa judíobo bebonbires jakon shinanyabo ikana iki. Jaskarabo ixon, keenshamankin Diossen joi bixon, netetiibi Diossen kirika meranoa wishábo yoyo akana iki; Jaskarakonmein iki, ja noa yoiai joibo ixon onanshamannoxon.

¹²Jaskáaxonra icha judíobaon Diossen joi ikonhakana iki. Jainxon ja Griego join yoyo ikai kikin ainboboyaxonbi benbobaonribi Diossen joi ikonhakana iki.

¹³Ikaxbi Bereainxon Pablon, Diossen joi jato yoiribiai ninkataxa Tesalónicainoa judíobo jain bokana iki. Boxonra jain ikana jonibo meskóakinbo yoixon jaton shinanbo tsokásmaribakana iki.

¹⁴Jaskákanaitian, ja joi akaibaon ishtonbires Pablo aniparo kexá iokana iki. Jatian Silas betan Timoteobiribi Bereainbi banékana iki.

¹⁵Ja Pablora Atenas kamanres iokana iki, jain potabeirani beribakanaitian, Silas betan Timoteoki Pablon joi bomaa iki, ishton joxon oinni bekanti.