HECHOS 17:19-24

¹⁹dzigo rëb zho lo Pabl: ―Bzhiguieḻ mazd, së luu guio ne lozh sodiidz luu lo no dieṉ zha nac wseed ne ziaadnie luu,

²⁰sac wlaltaa gard dzion no grë ncuaaṉe rnee luu i.

²¹No zho liaadz gacnaṉ zho pe rnee Pabl, sac sca nac grë zha Aten, niiclegaa grë zha ne quiadziṉ ga, rdziladz zho rded-dze zho rzodiidz zho dieṉ zha nac grë diidz cub ne griiṉ ron zho.

²²Bdziṉ zho ti guic gui win ne rnee zho Areópago, bzo Pabl glowtaa zaatne rcaalsa zho ga, bnee me lo zho rëb me: ―Grëse to ne nac to meṉ Aten, raṉ naa ne nligaa rioxco to rleynie to grë meṉ ne rzac to nac Dios;

²³sac leṉ dze rii biateed naa zaatne zob grë xdios to, haxta no zaatne niaa ti lo pcoog quia chop lan diidz ne znu rnee: “MIṈ RII NIAA PAR DIOS NE RDZIUUṈBEYD NE.” Goḻgacnaṉ sca gaṉle, Dios ne ruṉbeyde to ga, ruṉbey naa me ni lëë zhiwseed me none naa lo miech leṉ dze rii.

²⁴’Dios co bzaa guidzliu, me bzaa grëtaa ncuaaṉe no lo guidzliu; gacd ne guiab miech zha gzaa ti zaatne cuëz me, sac meṉ nroob meṉ rnabey nac me, me rnabey gbaa, me rnabey guidzliu.