HECHOS 17:18-24

¹⁸ꞌBa nde Pablo jako nijmi yakꞌa nchja nkjin kakun xi epicúreo ꞌmi ko yakꞌa xi estoico ꞌmi. —¿Mé= xi mejénre kuetsuna ngandaꞌe xutabi xi tuxkia nga mare en? —kitsu yakꞌa. ꞌBa kjaꞌere kitsu: —Tibeꞌe=ru nijmi ngatꞌare kjaꞌe naꞌen. ꞌBi kitsu nchjabiu ngatꞌa Pablo titsikjaꞌaxtiuyare en ndare Jesús ꞌba nga xuta kjuaꞌaya nganire ngajinre mikꞌen.

¹⁹ꞌBa ꞌbatsaꞌen nchjabiu kiko ngaꞌnde xi Areópago ꞌmi ꞌba tsiningiyare: —¿A ku̱an xie̱ mé= en xatse xi tebakuyanii̱? —kitsure—.

²⁰Ngatꞌa techukonii̱ en xi kje nuꞌyajíi̱n. Kui= kjuañu mejénnini̱ xianii̱ jó tsunire kibiu.

²¹ꞌBi kitsu ngatꞌa ngatsiꞌi xuta xi Atenas tseꞌe ko xuta xi xin nangire xi kio tjindu, kui xi tu matsjare nchja nijmi asa minya ñojon jngu en xatse.

²²ꞌBa ꞌbatsaꞌen Pablo tsakasen nduju nga masenre nchja xi kuañajan ngaꞌndebiu xi Areópago ꞌmi ꞌba ꞌbi kitsure: —Jun, xi Atenas tsojon, ngu teꞌbeña̱ nga jun ne ꞌñu ꞌyakun naꞌen xi tjin ngasunꞌndebi,

²³ngatꞌa kionga tsuꞌbaa̱ ngajin naxinandanu, tsaꞌbia̱ nga nkjin mani naꞌen xi ꞌyakun. ꞌBa nde tsaꞌbia̱ jngu altar kioña ꞌbitsaꞌen kuaꞌindutꞌa: “Ngatꞌare naꞌen xi bi ꞌyare.” ꞌBamani, Naꞌen xi ꞌyakun xi bi ꞌyo, kui ngatꞌare tebeꞌenuu̱ nijmi.

²⁴’Kui Naꞌen xi kitsaꞌen ngasunꞌndio ko ngayéje tsajmi xi tjinre ꞌba kui= xi batexumare ngankꞌaa ko tꞌanangiu. Kui bi ꞌbejñaya ningu xi xuta tsinda.