Hechos 17:13-32

¹³Ikaxbi Bereainxon Pablon, Diossen joi jato yoiribiai ninkataxa Tesalónicainoa judíobo jain bokana iki. Boxonra jain ikana jonibo meskóakinbo yoixon jaton shinanbo tsokásmaribakana iki.

¹⁴Jaskákanaitian, ja joi akaibaon ishtonbires Pablo aniparo kexá iokana iki. Jatian Silas betan Timoteobiribi Bereainbi banékana iki.

¹⁵Ja Pablora Atenas kamanres iokana iki, jain potabeirani beribakanaitian, Silas betan Timoteoki Pablon joi bomaa iki, ishton joxon oinni bekanti.

¹⁶Jatian ja Atenas jeman nokóxon, Silas betan Timoteo manaai iikin, ja jemamea ikonma diosbo oinyaketanax, Pablo sinata iki.

¹⁷Jaskarabo ointaanan, tsinkíti xobo meran kaxon, judíoboyabi ja Dios rabiai wetsaboribi, ja Diossen joi onantishamanhakin netetiibi jato yoia iki. Jaskáribiakin ja plazain beax tsinkíkanaboribi, onantishamanhakin jato joi yoikatitai.

¹⁸Jatian jainribi ikana iki, jawetii ja Epicúriosbaon itan ja Estoicobaon shinan chibanaibo, jabora jato betan join iananani neskákana iki: —¿Jawe jawéki yoiikayaki, nato yoyo ikas joni jaskatai? —ikibo. Jatian wetsabobiribi ikana iki: —Jaton diosbiribi yoiira ibirakanai —ikibo. Jaskatibora yoyo ikana iki, ja Jesúskiriti iká joibo itan ja mawábo jiritikiri iká joibo Pablon jato yoiaitian.

¹⁹Jaskáxon, ja Areópago akin akanainko Pablo iokana iki, jain onan jonibores tsinkíxon joi benxoakanainko. Jainxonra neskáakin yokákana iki: —¿Minki noa onanmati atipana, jawerin nato bená joi min noa yoia?

²⁰Ja min noa yoiabo riki, non ninkáyosma joibo. Jaskara kopíra non onankasai, jawe yoiiki mia jaskáwana ixon —ikibo.

²¹Ja Atenas jemamea jonibora jawéki ayamakinbi, bená joibores ninkáxon, ja joibores jato yoitinin keenbo ikanai, jainoax ja wetsankoniax jain jaai bekanaboribira jaskarabo ikana iki.

²²Jatian jaskákanaitian, ja Areópago akin akanainkoniax weítaanan Pablon jato yoia iki: “Mato Atenas jonibo riki en oinna, maton diosbo ayorakin shinannaibo.

²³Ja jainxon ja maton diosbo rabiaibo oinni kawantankinra, en merake, ja jaanxon Dios yoina menoxontiain, westíora wishá: ‘Westíora onankanama dios’, iki iká. Ja onanyamaxonbi maton rabiai riki, já yoikin en mato aatai.

²⁴Ja Diossenra jatíbi ja neno iká jawékiboyabi, nato nete jonia iki. Jara nai betan mai ibo iki, jaskara ikaxa, jonin xoboaxonaton Dios jayamake.

²⁵Jara tsonbi jawéki axontinin keenyamai, jabicho riki noa jan jamaa itan jatíbi jawékibo noa jan meniai.

²⁶Janra westíora jonimeabicho, jatíbi nato netemea jonibo aká iki, jatíbi nato mai rebestani jakanon ixon. Jainxonra jain ikantibo itan jatio basi jakantiboribi jato yoia iki.

²⁷Diossenra jaskaa iki, jatíxonbi já benakanon ixon, jara noo pataxbi iki. Jakopira benakin non nokoti atipanke.

²⁸Ja Dios kopíresa noa jake, noa koshiai, itan noa jishti itinke. Jaskara yoiira inike maton kaibo ja yoyo iti onan shinanya ikax neskati: ‘Noabora Diossen chiní rarebobo iki’, iki.

²⁹Jaskara ikon Diossen chiní rarebobo ixonra, ja jonibaon jatonbi shinanxon oro akana, koríki akana itan makan akanabora dios iki ixon non shinanyamai.

³⁰Jaskarabo moatian onanama inontianra, jonibo Diossen jaweayamakin jato oinresa iki. Ikaxbi ramatianbiribi jatíbiainoabo Diossen jato yoiai, jakonma jawékibo jenetaanan jares rabikanti.

³¹Diossenbi moa yoia nete senenketianra, jatíbiainoa jonibaon aka jawékibo onantiakin jato yoixonoxiki, jawen katota westíora joni meranxon, ja iki Cristo. Jan jato jaskáati ikenra jatíbi jonibaon onankanon ixon, mawákenbi Diossen jirimaa iki”, akin.

³²Jaskáakin ja mawábo jiriti jato yoia ninkatax, jatíribi jonibo shiroreskana iki. Jatian jatíribibobiribi neskákana iki: —Wetsatian joxon ja joi min noa yoiaitian mia non ninkáxononpari —ikibo.