11Yey wa aj judiꞌabꞌ e kꞌo Berea na tzꞌapil ta ri kinaꞌoj pachaꞌ ri e kꞌo pa ri sinagoga re Tesalónica, ma xkiya kixikin che ri xtzijox chike y lik xkikꞌulu. Ronoje qꞌij kꞌut lik kakiya kinaꞌoj chwi Ruchꞌaꞌtem ri Dios tzꞌibꞌital kanoq, ma e kakaj kakimaj usukꞌ we qatzij janipa ri tzijom chike.
12Lik e kꞌi chike waꞌ xkikoj rubꞌiꞌ ri Cristo. Yey chike ri e aj Grecia, e kꞌi xkikoj rubꞌiꞌ ri Cristo, na xew ta achijabꞌ ma chikixoꞌl e kꞌo ixoqibꞌ lik kꞌo kiwach.