Text copied!
CopyCompare
Xtidxcoob Dios ni biädnä dad Jesucrist - Hechos - Hechos 16

Hechos 16:8-38

Help us?
Click on verse(s) to share them!
8Ni'c gudejdtireni stelaad estad Misia, bidzujṉreni guedx Troas.
9Te yääl si'c lo te bacaḻ bahuii Pabl suga' te beṉ Macedonia. Canabduxh niguiiga lo Pabl, räjpni: ―Gudaa ladxä, estad Macedonia, te gacnäjlu nuunu.
10Che bara yääl ni gunixcaḻ Pabl, gudilgajcnu te barcw te chonnu estad Macedonia, sa'csi gucbeenu Dios najc nani caguxhaḻ nuure te guluiini xtiidxni lo rebeṉ Macedonia. Narä, Lucas, ni cagucuaä rediidxre, gusanää Pabl näjza Silas.
11Biu'tinu neṉ barcw ro' guedx Troas. Bidzuṉnu Samotracia, te yuj ni ṟe' neṉ nisdoo. Che bara yääl bidzuṉnu guedx Neápolis. Ro'c biriinu neṉ barcw,
12bionnu guedx Filipos, guejdx nani sajcru lo estad Macedonia. Guedx romanni. Ro'c bia'nnu tiop choṉ dxej.
13Che gojl sabd, dxej ni rusilajz rexpejṉ Israel, biriinu guejdxga bionnu ro' te gueuu, sa'csi biennu xhigab ro'c jiääd rexpejṉ Israel te guininäjreni Dios. Ro'c gurejnu, guniinu lo renane' nani bire' ro'c.
14Lojreni nadxaag te nane' ni laa Lidia, te beṉzijt ni digac xpejṉ Israel. Guedx Tiatira siäädni. Ruto'ni ladmuraad ni sacduxh. Rajṉ gunaaga Dios si'c rajṉ rexpejṉ Israelni. Bacuadiajgni xtidx Jesucrist ni cagusule' Pabl. Gucnäj Dios nane'ga te huililajzni xtiidxni.
15Birobnisni, näjza guiraa reni rbäjz rolijzni. Dxejc guniini loonu: ―Palga ruhuiitu guliä rililazä xtidx Dios, coḻtaa rolizä te ro'c cuääztu. Lacti gunab nane'ga nuunu, ni'c huijia'nnu rolijzni.
16Te dxej cheni sionnu cadro rninäj bejṉ Dios, bidxaagnu te dxa'p nani yu' te beṉdxab neṉ lastooni. Rajp rexpaxhuaanni melduxh sa'csi rusule' dxa'pga recos ni gajd gac.
17Birinajl dxa'pga Pabl näjza nuure. Rbedxa' dxape'ga, räjpni: ―Reniguiire najc xmos Dios nani rnibee guideb guedxliuj. Ruluiireni loonu xho ḻaanu lo xtojḻnu ―räjp dxape're.
18Balti dxej birinajl dxape'ga nuure, entis caniini rediidxga lo rebejṉ. Lacti basieed dxape'ga Pabl, ni'c gubiréni, räjpni lo beṉdxab ni yu' neṉ lastoo dxape'ga: ―Xcuent xcäḻrnibee Jesucrist rniä lojlu: “Birii neṉ lastoo dxape'ga.” Lagajc dxejc birii beṉdxab neṉ lastoo dxape'ga.
19Che bahuii rexpaxhuaan dxape'ga diru dxape'ga gun gaan melro, gunaazreni Pabl näjza Silas. Dxejcti gudobxhajxhreni guiro'preni nez roguii cadro suga' reguxhtis.
20Che bidzuṉnäjreni Pabl näjza Silas lo reguxhtis, räjp rexpaxhuaanni lo reguxhtis: ―Reniguiire najc xpejṉ Israel. Cayujnreni biejy lo guejdxre.
21Caguluiireni garenca leii nani digacdi gusoobnu sa'csi najcnu beṉ roman.
22Dxejcti bidxechnäj rebejṉ Pabl näjza Silas. Gunibee rejuejz gulääreni xhajb Pabl, näjza xhajb Silas, te batiäjḻreni baar guideb tiejxh guiro'preni.
23Che gulujx gudinduxhreni Pabl näjza Silas, biäureni neṉ latzguiib. Dxejcti räjp reguxhtis lo reguixhajg: ―Coḻgapdzu'tzreni, di gusaantu guiriireni.
24Basäḻ guixhajgreni neṉ latzguiib. Guyu' ni'reni neṉ te baräjd ni sojb gueed te di guxuṉreni.
25Garolyääl guninäj Pabl näjza Silas Dios, gusloj cayoḻreni dij ni rliä'p xpala'n Dios. Biejn diajg guiraa rebejṉ ni yu' neṉ latzguiib cayoḻreni.
26Chela gujc te xuduxh, basniib guideb latzguiibga. Bixal guiraa repuert, birucya' guiraa recadeṉ, bixal ro' rebaräjd cadro naaz ni'reni.
27Che gubajṉ guixhajg ni canäj latzguiib, bahuiini naxhal latzguiib, gulääni spaad xtenni, te rlajzni nugu'tni lagajc laani, sa'csi naani abadxuṉ reni niäu neṉ latzguiib.
28Dxejc guredxa' Pabl, räjpni lo guixhajgga: ―Na'c gunlu si'c. Bahuii, guiraliinu suga'nu ree.
29Dxejc gunibee guixhajg biääd te bajl te biu'ni neṉ latzguiib. Racsejsni biäädni bazuxhijbni nez loj Pabl näjza nez loj Silas.
30Dxejcti gulää guixhajgreni neṉ latzguiib. Gunabdiidxni räjpni lojreni: ―¡Coḻguinii, dade'! ¿Xhini'c nanab gunä te gusḻaa Dios narä lo dojḻ?
31Räjp Pabl näjza Silas lo guixhajg: ―Huililajztis xtidx Dios xcuent Jesucrist, luj näjza guiraa reni yu' rolijzlu, te gusḻaa Diostu lo dojḻ.
32Basule' Pabl näjza Silas rextidx Dios lojni näjza loj guiraa rebejṉ ni yu' rolijzni.
33Lagajc dxejc, garol yääl, huinä guixhajgreni gudiibni dejtzreni cadro batiuug baarreni. Dxejcti batiobnisreni guixhajg näjza guiraa reni yu' rolijzni.
34Dxejc huinä guixhajgreni rolijzni, ro'c badeedni xhi gudajwreni. Laani näjza guiraa reni yu' rolijzni bibalazduxhreni sa'csi huililajzreni xtidx Dios.
35Che bara yääl, baxhaḻ reguxhtis stiop guixhajg räjpni lo guixhajg nani cuanäj latzguiib: ―Basḻaa reniguiiga.
36Dxejcti huiye'tz guixhajgga lo Pabl, räjpni: ―Anaj reguxhtis gusḻaä́tu. N̲aj coḻchäj, gacnäj Dios la'tu, saru chäätu.
37Niluxh räjp Pabl loj reguixhajg: ―Nuure najczanu beṉ roman. Batiäjḻreni baar detznu nez loj guiraa rebejṉ. Nicla niniabdiidxreni la yu' xhi dojḻ biennu. Basäureni nuure neṉ latzguiib. Leii xten roman di gusaan gac rebeṉ roman si'c. Luxh ṉaj rlajzreni gusḻaareni nuure xhiga'tz. ¡Dinu guirii si'c! Lagajc laareni sujiädsḻääreni nuunu.
38Che huiye'tz reguixhajg diidxga lo reguxhtis, bidxebduxhreni che biejn diajgreni beṉ roman najc Pabl näjza Silas.

Read Hechos 16Hechos 16
Compare Hechos 16:8-38Hechos 16:8-38