Hechos 16:7-23

⁷Jain boax, Misia ochóma nokókana iki. Jainxon ja Bitinia main kati shinankana iki, ikaxbi ja Jesussen Shinanman jato kamayamaa iki.

⁸Jaskara iketian, ja Misia mainbi winóbaini boax, Troas jeman nokókana iki.

⁹Jain nokota yamé, Pablon namá keska meran oinna iki, ja Macedoniainoa westíora jonin chankataanan yoiai: “Neke Macedoniain shitáxon noa akini jowé”, akin akai.

¹⁰Jatian Pablon namá keska meran oinxon noa yoiketian, Macedoniain kanox noa benxokaata iki, Diossenbi jain jawen jakon joi yoii kati noa kenamaa onanax.

¹¹Jaskatax, Tróassainoax pishítaanan, Samotracia nasinko ponté kaini noa kaa iki. Jatian nete xabáketian, Neápolissain noa nokota iki.

¹²Jainoax tekíkaini kaax, noa Filipoain nokota iki. Ja iká iki romanobaon boxon jemaakana, itan ja Macedonia main, kikin ninkakaatai jema. Jainra noa jawetii neteres iká iki.

¹³Jatian ja tantiti netenra jemameax pikókaini, paro kexa noa kaa iki, ja judíobaon jainxon oranaira jabirake, ixon shinannax. Kaxon jain tsinkíkana ainbobo non jato jakon joi yoia iki.

¹⁴Jainribi iká iki westíora ainbo Lidia janeya; Tiatira jemamea. Ja ainbo iká iki amí keskatonin pokoa chopan maroai. Jara iká iki Diossakin shinannairibi. Jaskara ikenra non Ibon akinna iki, ja Pablon joi yoiaitian kikinhakin ninkataanan onannon ixon.

¹⁵Jatian jatíbi jawen rareboyabi Diossen bautizanmeeta pekáo, noa yoia iki: —Maton oinna, en akonkin non Ibo ikonhai iketian, nokon xobonkopari ikí bokanwe —akin. Jaskáakin teaxon, jawen xobon noa imaa iki.

¹⁶Iitira, jainxon orantiainko orani kaai noa iitaitian, yoshinman iboaxon onanmisti shinanya imaa, xontakonin noa bechia iki, jara iká iki westíora yonoti xontako, shinanmanres jato onanxon, jawen ibobo icha koríki kananmai.

¹⁷Jatian ja xontako Pablo betan noa chibani nopekao joí, koshin saí iikirani neskata iki: —¡Nato jonibo riki, ja ani Diossen tee axonaibo. Jabaonra, jaskatax kishpinti joibo mato yoiai! —iki.

¹⁸Jawetii netebires ja xontakonin jaskáakin moa Pablo jatsanmaa iki. Jatian bechiakekainxon ja xontako meran iká yoshin, neskaa iki: —Jesucriston janenkora en mia akai ja xontako meranoax pikówe —akin. Jaskáatianbi, ja xontako meranoax yoshin pikota iki.

¹⁹Jatian ja xontako yonoaibaon onankana iki, ja kopishaman jabaon koríki biti yama, jaskáxonra Pablo betan Silas yatanxon, plazain joni koshiboiba bokana iki.

²⁰Jatoiba boxonra, neskáakin ja joni koshibo yoikana iki: —Nato judío jonibaonra, nato jeman noa jakana jonibo, jakonma shinanmai.

²¹Ja romano jonibo ixon non jaskáati ikenmabira, wetsaresibi axébo noa yoikanai —akin.

²²Jaskatax ja jonibo jatoki sinákana iki. Jatian ja joi benxoai joni koshibaon jato yoia iki, chopa jopemaxon ja joni rabé rishkikanti.

²³Ja akonbireskin jato rishkimaa pekáo, cárcel meran jato niamataanan, jan cárcel koirannai joni kikinhakin jato koiranti yoia iki.