Hechos 16:31-40

³¹Pablo, Silas gerudu kwian skage mananga ole: —Ba mo ta gbadale Chugagwalla Jesu gai ulia ene ba kaire ba bitalla be tien gitiru ji chugege ba agedu me no gdale.

³²Pablo, Silas geru Jesu giti ketu amage kaire ama bitalla ulita kle toi gwa ama olege,

³³gire blike Pablo kwian skage mananga kaire ama bitalla ulita ñeu chiske Jesu kalla giti. Chui amañage ngajrege kwian skage mananga e amaña Pablo, Silas sola gligu chidi gdege gbu solage.

³⁴Kwian e amaña Pablo, Silas du mo ullage, ama Pablo, Silas ullu bligdadi. Ama ulita Jesu gerua gau ulia malen ama ulitadi nga suga no no Jesu giti.

³⁵Nga chku ju ngabebitabi kwian gerunga daba giti jiske o me jiske guardia donga gweale kagu gerule kwian skage mananga ole kwian skage mananga Pablo skajwennga Silas skajwennga kage.

³⁶Kwian skage mananga gerudu Pablo ole: —Kwian gerunga daba giti jiske o me jiske geru kagu cha alin cha ba boke skajwennga kage siere, nege ba ñage joge siere aini ta no giti —kwian skage mananga gerudu ene Pablo, Silas ole.

³⁷Agwa Pablo me tadu jogekalin kwian skage mananga gerudu kare ama ole, malen Pablo gerudu guardia donga kagaba ole: —Cha boke kwian nga Romamu me jo geru kadaba chage taingwli ngeru cha jo kwabatabage glita giti kwian ulita gwa giti, cha bonate tkere skage uñale kwian ulitage, ¿mineade nege ba ta cha skajwankalinnga skwlenre kwian ulitage? Ma no ba me cha skajwennga gballa, kwian bai guardia donga kagu cha tke skage aini ama agali chiedale cha skajwennga.

³⁸Pablo, Silas me mo chugu ngwadi mo skajwennga guardia dongage, Pablo gerudu ulita guardia donga ole, guardia donga joni Pablo gerudu kare trage kwian gerunga daba giti jiske o me jiske ole. Kwian gerunga daba giti jiske o me jiske geru e keruchugu gire kwachiu tanre, chku uñale amage guardia donga giti Pablo, Silas kwian nga Romamu, malen ama kwachiu, uñadu amage ama me ñage kwian nga Romamu tke skage ngeru ama geru kade ama agedu mine gitige.

³⁹Kwian gerunga daba giti jiske o me jiske jo Pablo, Silas kle skage ngwadi, ama gerudu Pablo ole Silas ole: —Cha agedu me no ba ole, cha agedu giti ba e talla mlienga. Kwian Pablo, Silas kagu tkale skage ama Pablo, Silas skajunnga, kwian e gerudu ama boke ole: —Ma no ba joge siere una aige.

⁴⁰Pablo, Silas skajunlenga gire ama bonate jo muinga kada Lidia kle toi ngwadi, jo chke Lidia ngwadi kwian tanre nu Jesu gerua gaba kledu mo litaba, Pablo, Silas kwian e ulita nu Jesu gerua gaba ta gbu chage gwangerugu Jesu geruadi gire Pablo, Silas jo siere una Filipoge.