Hechos 16:24-39

²⁴Chin bihn madxiohra chi dxyiꞌdxyi chi bazaꞌhla ba laꞌh Pahblu cun Silas laꞌn lahtsi dxiꞌba nin nuu tuhbi yahga barehda nin zohba guiꞌdxiu tin laꞌn guiꞌdxiu chi guyuuꞌ ñaaꞌ raꞌ ba tin adxi gulluꞌhn raꞌ ba.

²⁵Per chin guhca garoolda gueꞌla cabwihdxyi-canaaba raꞌ Pahblu cun Silas Dxiohs, nee cun neezaa cayuꞌlda raꞌ ba cantu xteenn Dxiohs para laꞌh Ñiꞌh ya snuhn bwiinn nin ñieꞌw raꞌ riigacaꞌdxiahga raꞌ cantu raꞌ nin cayuꞌlda raꞌ ba.

²⁶Ya hohra chi guhca tuhbi lluh duxa, bañiꞌbin gaduhbitiiꞌ lahtsi dxiꞌba chi, billaala raꞌ garaatiiꞌ rwaaꞌ pweerta raꞌ, cun cadehn raꞌ nin nuuxaꞌta yahga raꞌ nin nuu ñaaꞌ raꞌ bwiinn nin ñieꞌw gubihyi raꞌn.

²⁷Ya chin babahn madxiohra chi, bwaꞌha ba zohballaala rwaaꞌ lahtsi dxiꞌba, lwehgu guleꞌhe ba spahda ba tin ñidxiinn ba laꞌh gahca ba laasii nastoꞌ ba balluꞌn raꞌ nin ñeꞌw raꞌ laꞌn lahtsi dxiꞌba.

²⁸Chiꞌchi guñiꞌ Pahblu jweersi roo, rahbi ba loh madxiohra chi: ―¡Ayi guunn luꞌh ziꞌca, garaa gahca nu laꞌhnu dxuu riiꞌ!

²⁹Chiꞌchi gunaaba madxiohra chi tuhbi biaꞌñih tin baziaꞌñihin laꞌn lahtsi dxiꞌba chi, chiꞌchi guyuuꞌtii galluꞌhn ba tantu nin bidxyihbi ba.

³⁰Tin babweꞌhe ba laꞌh raꞌ Pahblu cun Silas, chiꞌchi rahbi ba loh raꞌ ba: ―Daada raꞌ, ¿xa niꞌca nahpaa guꞌnnahn tin gutaꞌh Dxiohs naꞌh loh duhlda?

³¹Ya chiꞌchi rahbi raꞌ ba: ―Bwiꞌhnn pur chechii stoꞌ luꞌh xchiꞌdxyi Jesucristu tin taꞌh luꞌh loh duhlda, cun neezaa garaa xfamihyi luꞌh.

³²Ya baluuꞌyi raꞌ ba xchiꞌdxyi Jesucristu laꞌh madxiohra chi cun garaa za nin rii rwaaꞌ yihdzi ba.

³³Ya hohra gueꞌla chi gahca gwanee madxiohra chi laꞌh raꞌ Pahblu cun Silas tin gudxiꞌbi ba hasta bidxeeldxyihdxyi tihxi raꞌ ba pur bahra, ya chin guyaꞌloh guhca raꞌ ba rramwehdxi chiꞌchi guroꞌbañihsa madxiohra chi cun garaa xfamihyi ba.

³⁴Ya seguihdu gwanee ba laꞌh raꞌ Pahblu cun Silas yihdzi ba tin gudahw raꞌ ba, ya biahxi duxa madxiohra chi cun garaa xfamihyi ba laasii gwachii stoꞌ raꞌ ba xchiꞌdxyi Jesucristu.

³⁵Chin barah gueꞌla, guxeꞌhla raꞌ guxchiisi chiohpa xguixaꞌga raꞌ ba bagañiꞌ loh madxiohra tin gutaꞌh ba laꞌh Pahblu cun Silas.

³⁶Chiꞌchi rahbi madxiohra chi loh Pahblu: ―Bieꞌnaa raꞌ guixaꞌga agutaꞌhn laꞌhtu; cheezah tu xneziuh tu nasaa.

³⁷Chiꞌchi rahbi Pahblu loh raꞌ guixaꞌga chi: ―Laꞌhnu bwiinn Roma nu, nee bacaꞌyahga tu laꞌhnu delanta loh raꞌ bwiinn guihdxyi nee nin ayi gunaaba dxyiꞌdxyi raꞌ ba gu nuu xi xtuhlda nu, sino que lwehgu basieꞌw raꞌ ba laꞌhnu laꞌn lahtsi dxiꞌba; ¿yannah gutaꞌh raꞌ ba laꞌhnu ralaꞌn? ¡Gulgahbi loh raꞌ guxchiisi raꞌ chi laꞌh gahca raꞌ ba dxieꞌgabweꞌhe raꞌ ba laꞌhnu!

³⁸Chiꞌchi gwaguihtsii raꞌ guixaꞌga dxyiꞌdxyi raꞌ chi loh raꞌ guxchiisi, ya bidxyihbi duxa raꞌ ba chin bihn raꞌ ba bwiinn Roma raꞌ Pahblu cun Silas.

³⁹Chiꞌchi gwaganaaba guxchiisi raꞌ chi pardohn loh Pahblu cun Silas, chiꞌchiyi babweꞌhe raꞌ ba laꞌh Pahblu cun Silas laꞌn lahtsi dxiꞌba chi, ya seguihdu gunaaba raꞌ ba bariaꞌh Pahblu cun Silas guihdxyi chi.