Hechos 16:2-38

²Inchen Timoteobe tru Listrasrø, Iconiosrø nunelai utu, chigucha tamgaig tabig købig køn.

³Inchen Pablobe Timoteowan nøba lincha attrai incha, tru trusrø warabelø judíosmeragurri nune asru circuncidamigwan marøbig køn, kaguende mayeeløba møskaimbe griego kui ashibelø kuimba.

⁴Incha nømbe tru pueblomerawan puraambub ambimørig, Cristo nøashib karua øriiløba, Tiusweimburabelan pera marøb pønrrabelø tru Jerusalénsrø purrabelø, maig marøb kønrrai karuilane isua mørøb kønrrai eshkab ambubelø køn trusrø Tiuswei ureemeran.

⁵Inchen trusrø tru iglesiamera pønrrabeløbe nømui isubigwan Tiusweinug pasra pønrramigu, kullaaramø, mur pønrramisren, misaabe kwalømmørig nemisrøb ibig køn.

⁶Incha nømbe Frigia pirøwanba, Galacia pirøwanbabe ka purab ambubelø køn, kaguende Asia pirausrømbe Espíritu Santo Tiuswei wamwan waminchibashmuben.

⁷Incha Misia linderosrø puabe, Bitinia pirausrø kebamrrab inchen, Jesúswei Espíritube trusrø kebambashmuben,

⁸Misia pirø puluwan yabwandø puraamba, Troassrø kørraambubelø køn.

⁹Indig trusrø Pablobe yem kan piab lataig asig tøgagúig køn. Truyube kan møg Macedonia pirausriig pasramisra trenchib miab pasrai ashibig køn: “Macedoniasrømay larraamø cha, namun purugunrrab.”

¹⁰Inchawei Pablobe tru piab lataigu treeg asin køben latatø, nambe Macedoniasrømay amrrab inchibelø ker, namun Tius nui tabig srø wamwan eshkab kusrenanrrai wamitamaptøwei isua.

¹¹Indiibe Troaskurri barcoyu nebamba, Samotraciasrømay kanmaytø ke purab amba, katø kwalømbe Neápolissrø pua,

¹²truyugurrimbe Filipossrø pubelø ker. Tru ciudabe Macedonia pirau mas nuig køb, katø kan søtø Roma misaamera truyube kebamba warab inchibelø køn. Incha tru ciudayu nambe mam kwaløm køsrøn kørrømisrøbelø ker.

¹³Inchen kan isrin kwaløm tru ciudayu nu yaskabu wambiisrø webambubelø ker kan pi mendasrømay, truyube judíosmera Tiusba waminchab tulundzuninug kuitamab isua. Incha nambe truyu purramisra, ishumburmera tulaamba purrabelan waminchibelø ker.

¹⁴Inchen tru utube kan ishug, Lidia taig mørig waben, Señorbe nui manrrøwan kurøbig køn Pablo chi chitamørtrab ke tab mørig wanrrai. Truibe, Tiatira ciudasriig, yalø pigø llensumera purø tabig yanøbig, trurrigu Tiuswan køriibala tabig waminchib megabig købig køn.

¹⁵Incha nøba, nui yaueløba piu umbu ulsrailø kørrømisra, ke tiusmanda chib namune trenchibig køn: —Na, Señorwan cierton kørein kui ashabe, trube, ñim nai yamay amrrua, kørrømisrtrigay— cha. Incha namune ke kørrømisramne inchibig køn.

¹⁶Nam Tiusba wamindinuumay ambub købene, kan srusrø karuindiig megabig, kebasra tranøb kwaimandzig tøgaig namun katønrrab arrubig køn. Truibe tru nun karub pera købelane truba nørrø an asingarubig købig køn, nø misagwan kebasra ketiiløtøga.

¹⁷Incha tru srusrøbe Pablonba, namunba wendautø trenchib trashib arrubig køn: —¡I møgueløbe Tius Mayeelaim Pala Pasrabigwei karuindiig melabelø, kaigyugurri wesrailø køm maywan ñimun eshkab kusrenanøbelø køn!— chib.

¹⁸Inchen ke treetø treetø purø yam kwaløm uñen, yandø Pablon ke pesriikken inchen, nøbe keesha, tru kwaimandzigwane trenchibig køn: —Jesucristoi munchiyu i srusrainukkurri nabe webinrrø tamønrrun— cha. Inchen tru urastø kwaimandziibe elachibig køn.

¹⁹Inchen tru karub pera købelø tru treeg an marøb pønrramibe yandø patsi asha, Pablonba, Silaswanba kemøra, misag tulundzuninuumay ke paluunchib waram srua ambubelø køn, tru misagwan ashib karubelaisrømay.

²⁰Incha merrab pønsrabe, trenchibelø køn: —¡Kan i møgueløbe ya judíoskøleelø købendø, namui ciudawane ke chi maringuen asamgaig marøb amrrun! cha.

²¹Nøm waminchib kusrenanøppe ke peemaytø mariilø nam uta tøgagømig kømøwei, katø treegwan marøb kømig kømøwei inchai namune meriilan kusrenanan cha, nam ya romanosmeran.—

²²Inchen misaabe mayamba kanbalatø misra namig kurrøben, maig kønrrabigwan asha marøb purrabeløbe, Pablomera kewagúilan tsakkandø wesrawabeta, tsiitøga itchai karubelø køn.

²³Incha nømune truba yam ichabeta, kailan keeri yau kebusra, truyu ashib pasrabigwane webamrraingaig purø may ashib tøgagungarubelø køn.

²⁴Inchen tru treeg martrai karuigwan mørabe, truyu ashibiibe katøguchi umbusrø keera, srøbmeran cepoyu kegwana, purrønnøbig køn.

²⁵Inchen yem tøbøtasrømbe Pabloba, Silasbabe Tiusba waminchib, Tiusweyasig cantab køben, katøganelø truyu keerig pønrrabeløbe mørøbelø køn.

²⁶Inchene ¡katø! møin kagúitø mur pirøgønabig arruptinchen, tru kailan keeri yawan niga pasrabigwan truilanguen punø panrrø sruaguchen, ¡katø! tru urastø truyu maya yaskabmeraba kurig pønrramisren, tru keerig pønrrabelai cadenasmerabe mayeelaimba picha kørrabelø køn.

²⁷Inchen truyu keeriilan ashib pasrabig kiagasrøbene, møimbe tru kailan keeri yau yaskabmerabe kurim pønrraptindi ashabe, nui espadan wesrawa, ¡katø! nøasiitø ke yandø kwanrrab inchibig køn, kaguende truyu pønrrabelø chab wegørra chab lulitamab isua.

²⁸Inchene Pablobe mur trashib trenchibig køn: —¡Ñiguen øyeeg kaig marmøtø kagøbash! cha. ¡Søtøba nambe yu ka purrer!— cha.

²⁹Inchene tru kailan keeri yawan ashib pasrabiibe kan pela piløgaig miawa, umbusrø luløb kebya, Pabloimba, Silasweimba merrab itønab tømbønsrøbig køn.

³⁰Incha wambig pera webyabe, payibig køn: —¡Au kasukumera! ¿na kaigyugurri wesraig kømibe chi maramig palønrrerah?— cha.

³¹Inchene nømbe trenchibelø køn: —Señor Jesucriston køreu cha. Incha ñiba, ñui yaueløbañau kaigyugurri wesrailø kønrrabguen— cha.

³²Inchen nømbe Señorwei wamwan nunba, nui yau purrabelø søteelanba waminchibelø køn.

³³Incha nømun ichabeta tru pisrø mariilan tru yemdøwei tre uras pillmawa, tru urastø nøba, nui yauelø kerrigueløba piu umbu ulsrailø købig køn.

³⁴Incha trugurrimbe Pablonba, Silaswanba nui yamay pera ya, manna, nøba, nui yaueløbañau Tiuswan køreikkurri truba kasraarabelø køn.

³⁵Indiibe tør-rrabene, tru maig maramigwan asha marøb purrabeløbe tru policíameran karua ørøbelø køn, tru kailan keeri yawan ashib pasrabigwan, trenchinrrai: “Pablonba, Silaswanbabe elatchain” cha.

³⁶Inchen tru yawan ashib pasrabiibe Pablone trenchibig køn: —Tru maig kønrrabigwan asha marøb purrabeløbe yandø ñimun weeriilø kønrrai karua ørin køn cha. Pøs treeg købene, webamba, chi isumøtø, ka ambay— cha.

³⁷Trune Pablobe trenchibig køn: —Nam ya Roma pirausrø kal-lawar køb lataitøwei kal-lawarwan, namun maig kuitashchab payaguen ashmubendø, maya misagwei merrab namun ichabeta, namun kailan keeri yau kebusra ¿møingan mugucha wammøriimøzhig namun nilø wertrab inditarru? cha. ¡Pøs chi treeg kønrraamøn! chibig køn. Pøs truiløtøwei namun wesrunrrab amrrubash— cha.

³⁸Inchen tru policíamerabe tru maig kønrrabigwan asha marøb purrabelan tru treeg taigwan eshkabene, truba kwaarøb kørig kui inchibelø køn, truiløbe Roma kal-lawar lataitøwei kal-lawar kuin kui wammørøppe.