Hechos 15:8-33

⁸Ri Dios, ri retaꞌam saꞌ ri kꞌo chupa ri kanimaꞌ ri tikawex, e xkꞌuluw ke ri na e ta aj judiꞌabꞌ kikojom rubꞌiꞌ ri Cristo. Yey xukꞌut waꞌ echiriꞌ xuya lo ri Santowilaj Ruxlabꞌixel chike rike jelaꞌ pachaꞌ xuꞌan qukꞌ riꞌoj.

⁹Y junam xeril rike qukꞌ riꞌoj, ma xujosqꞌij ri kanimaꞌ che ri mak ruma ri kubꞌulibꞌal kikꞌuꞌx.

¹⁰»Ekꞌu woꞌora, ¿suꞌchak kapetisaj alaq royowal ri Dios ruma ri keya alaq chuxeꞌ ukꞌiyal taqanik ri na e ta aj judiꞌabꞌ kikojom rubꞌiꞌ ri Cristo? Waꞌ e pachaꞌ eqaꞌn kakoj alaq chikiqul. Yey wa eqaꞌn, na xkichꞌij tane rukꞌaxik ri qatiꞌ-qamam ojertan y na qachꞌijom tane rukꞌaxik riꞌoj.

¹¹Noꞌj kꞌu riꞌoj e kaqajikibꞌaꞌ uwach waꞌ: Xa ne ruma ri unimal rutzil ukꞌuꞌx ri Qanimajawal Jesús kojkolobꞌetaj riꞌoj jelaꞌ pachaꞌ rike —xchaꞌ.

¹²Konoje kꞌu riꞌ rukꞌiyal tikawex xetzꞌinkaꞌnik y xkiya kixikin chike ri Bernabé y ri Pablo, ma kakitzijoj ri nimaq taq kꞌutubꞌal re chuqꞌabꞌ uꞌanom ri Dios kuma rike chikixoꞌl ri na e ta aj judiꞌabꞌ.

¹³Echiriꞌ xkikꞌis kechꞌaꞌt rike, ri Jacobo jewaꞌ xubꞌiꞌij: —Hermanos, chinta na pe alaq:

¹⁴Ri Simón xutzijoj puwi ri nabꞌe laj echiriꞌ ri Dios xuqꞌalajisaj ribꞌ chikiwach ri na e ta aj judiꞌabꞌ chaꞌ chikixoꞌl rike kebꞌuchaꞌ janipa ri kebꞌuꞌana utinamit.

¹⁵Y waꞌ kuꞌana xaqi jun rukꞌ ri kitzꞌibꞌam kan ri qꞌalajisanelabꞌ puwi ri ubꞌiꞌim lo ri Dios:

¹⁶Ikꞌowinaq kꞌu waꞌ, kintzelej loq y kanyak tanchi ri rocho ri rey David wuluwubꞌinaq bꞌi, kankꞌojoj kꞌu ri tzaqinaq bꞌi che y kanꞌan kꞌakꞌ che.

¹⁷Kanꞌan waꞌ chaꞌ ri nikꞌaj chik tikawex kakitzukuj ri Dios, waꞌ e taq ri tinamit na e ta aj judiꞌabꞌ, konoje ri e nuꞌanom nutinamit chike ma kikojom ri nubꞌiꞌ.

¹⁸E waꞌ ri xubꞌiꞌij ri Dios Qajawxel, yey e ri uqꞌalajisam chi lo ojertan.

¹⁹Ruma kꞌu laꞌ, chinuwach riꞌin na utz taj we kaqasachisaj kinaꞌoj ri na e ta aj judiꞌabꞌ kikojom rubꞌiꞌ ri Qanimajawal.

²⁰Ri qaꞌanaꞌ e chojtzꞌibꞌan pan chike y qayaꞌa pan kinaꞌoj chaꞌ kakesaj kibꞌ che taq ri kachꞌulan re junoq pachaꞌ taq ri ikꞌowisam chwa juna tiox, chaꞌ na kaketzꞌabꞌej ta uwa kiqꞌij kukꞌ jujun chik na kikꞌulel taj, chaꞌ na kakitij ta tiꞌij ke awaj xa ejitzꞌam y chaꞌ na kakitij ta kikꞌ.

²¹Ma xex wi chwi lo ojertan, ronoje qꞌij re uxlanibꞌal pa taq sinagogas e kꞌo ri kebꞌajilan re y ketzijon puwi ri Tzij Pixabꞌ tzꞌibꞌital kan ruma ri Moisés —xcha ri Jacobo.

²²E taq ri e taqoꞌn y ri jujun chik e aj wach re riglesia kukꞌ konoje ri hermanos, xukꞌul kikꞌuꞌx ri kechaꞌ jujun achijabꞌ chikixoꞌlibꞌal re ketaq bꞌi pa ri tinamit Antioquía rukꞌ ri Pablo y ri Bernabé chaꞌ kakikꞌam bꞌi jun carta re pixabꞌanik chike ri na e ta aj judiꞌabꞌ kikojom rubꞌiꞌ ri Cristo. Ekꞌu xekichaꞌ ri Judas ri kabꞌiꞌx Barsabás che y ri Silas, ma lik chom ilitajinaq ri kibꞌinik kisilabꞌik chikiwach ri hermanos.

²³Xyaꞌ kꞌu bꞌi ri carta pakiqꞌabꞌ, jewaꞌ kubꞌiꞌij: E riꞌoj oj taqoꞌn re ri Cristo kukꞌ ri e aj wach re riglesia y konoje ri hermanos wara Jerusalem, kaqaya pan rutzil wach alaq hermanos, ri kꞌo alaq chupa ri tinamit Antioquía y pa taq ri tinamit re Siria y re Cilicia. Kaqatzꞌibꞌaj kꞌu che ralaq, ri na alaq ta aj judiꞌabꞌ yey kojom alaq rubꞌiꞌ ri Cristo.

²⁴Riꞌoj qatom e kꞌo jujun ebꞌelinaq chiqaxoꞌl riꞌoj, tobꞌ na oj ta xojtaqaw bꞌi ke; yey rike ketajin che ukojik ri na utz taj pa jolom alaq rukꞌ ri kichꞌaꞌtem y jekꞌulaꞌ kisachisam ri naꞌoj alaq.

²⁵Ruma kꞌu laꞌ, xojchꞌaꞌt riꞌoj chiqawach puwi waꞌ, y ri xojkanaj wi e keqachaꞌ achijabꞌ y keqataq bꞌi ukꞌ alaq junam kukꞌ ri hermanos lik kꞌax keqanaꞌo, waꞌ e ri Bernabé y ri Pablo.

²⁶Waꞌ waꞌchijabꞌ kiyaꞌom kanimaꞌ tobꞌ ne kekam ruma ri kakitzijoj rubꞌiꞌ ri Qanimajawal Jesucristo.

²⁷Yey keqataq bꞌi ri Judas y ri Silas. Chikichiꞌ kꞌu rike kaqꞌalajin wi chiwach alaq ronoje wa xqataq ubꞌiꞌxikil che alaq.

²⁸Ma chwach ri Santowilaj Ruxlabꞌixel ri Dios y chiqawach riꞌoj, na utz taj kaqakoj juna chik eqaꞌn pawiꞌ alaq, xew kꞌu chirajawaxik taq waꞌ:

²⁹Matij alaq ri ikꞌowisam chi chikiwach ri tiox; matij alaq kikꞌ, matij alaq tiꞌij ke awaj xa ejitzꞌam; y metzꞌabꞌej ne uwa qꞌij alaq kukꞌ jujun chik na alaq ta kꞌulan kukꞌ. We kesaj kꞌu ibꞌ alaq che ronoje waꞌ, katajin alaq riꞌ che uꞌanik ri jusukꞌ. Chila kꞌu ibꞌ alaq.

³⁰Ekꞌu ri echaꞌtalik xkimaj bꞌi kibꞌe pa ri tinamit Antioquía. Ekꞌuchiriꞌ kimolom chi kichiꞌ ri kikojom rubꞌiꞌ ri Cristo, xkiya ri carta chike.

³¹Echiriꞌ ri hermanos e kꞌo Antioquía xkajilaj wa carta, lik xekiꞌkotik ma ri tzꞌibꞌital chupa xukubꞌaꞌ kikꞌuꞌx.

³²Ekꞌu ri Judas y ri Silas, ruma e eqꞌalajisay runaꞌoj ri Dios, lik naj xechꞌaꞌt kukꞌ ri hermanos, xekipixabꞌaj chaꞌ lik kakichuqꞌubꞌej kibꞌ y jelaꞌ xkinimarisaj kikꞌuꞌx.

³³Xkikꞌowibꞌej kꞌu jujun qꞌij chiriꞌ. Tekꞌuchiriꞌ, xetaq bꞌi chi utzil chomal kuma ri hermanos chilaꞌ, chaꞌ jelaꞌ ketzelej tanchi kukꞌ ri etaqayom lo ke.