HECHOS 15:2-41

²Ti Pabloe, ti Bernabee tsots lic stsac sbaic ta cꞌop schiꞌuc ti viniquetic taje. Tsꞌacal to un, ivaꞌanatic ti Pabloe, ti Bernabee, schiꞌuc jayib schiꞌiltac, yoꞌ jech ta xbatic cꞌalal to Jerusalén, yoꞌ jech ta xchapanic ti cꞌop taje. Ta xichꞌ chapanel schiꞌuc ti jcholcꞌopetique schiꞌuc ancianoetic yuꞌun ti jchꞌunolajeletic ti tey ta jteclume.

³Jech o xal ti jchꞌunolajeletic ta Antioquíae laj staquic batel ti jchapanejcꞌopetique. Cꞌalal jech ta xbatique, tey iꞌechꞌic ta Fenicia, ta Samaria banomil. Tey ta xalic batel scꞌoplal ti jyanlumetic ti laj xa yictaic comel ti cꞌu sꞌelan xchꞌunojic to ox ta baꞌyele, yoꞌ jech ta stsꞌacliic ti Diose. Cꞌalal jech laj yaꞌiic ti jchꞌunolajeletique, xmuyubajic xa.

⁴Cꞌalal jech icꞌotic ta Jerusalén ti Pabloe, ti Bernabee, ichꞌbilic ta mucꞌ icꞌotic yuꞌun ti jchꞌunolajeletique schiꞌuc ti jcholcꞌopetique, schiꞌuc ti ancianoetique. Lic yalic ti cꞌu sꞌelan iꞌabtej ti Dios ta stojolique.

⁵Pero oy tey jun chib jfariseoetic ti jaꞌ jchꞌunolajeletic xae tey ivaꞌiic. Jech laj yalic: ―Qꞌuel avilic, ti jyanlum jchꞌunolajeletique tsots scꞌoplal acꞌo yichꞌic ti circuncisione. Jaꞌ jech xtoc acꞌo spasic ti cꞌu sꞌelan ta xal smantal ti Moisese ―xiic.

⁶Jech ti jcholcꞌopetique schiꞌuc ti ancianoetique lic stsob sbaic yoꞌ ta scomonchapanic ti cꞌop taje.

⁷Cꞌalal jech jal xvulajetic ta scomonopele, tey ivaꞌi ti Pedro ti jech laj yale: ―Quermanotac, ti voꞌoxuque anaꞌojic lec ti oy xa sjabilal ti laj stꞌujun ti Dios ti liꞌ ta atojolique, yoꞌ jech ta xcal ti lequil achꞌ cꞌop ti jaꞌ colebale ta stojol ti jyanlumetique, yoꞌ jech ta xchꞌunic.

⁸Ti Dios ti ta xojtiquin ti coꞌntontique laj yacꞌ ta ilel ti lec ta xil ti jyanlumetique. Jech o xal laj yacꞌbe yichꞌic ti Chꞌul Espíritue jech chac cꞌu chaꞌal laj yacꞌbotique.

⁹Ti Diose mu snaꞌ jeltos yoꞌnton ta jtojoltic. Ti jyanlumetique pocbat xa yoꞌntonic yuꞌun ti Dios eque ta sventa ti laj xchꞌunic ti Cajvaltique.

¹⁰Avi tana un, ¿cꞌu chaꞌal xanaꞌetic to yuꞌun ti cꞌusi laj xa spas ti Diose? ¿Cꞌu chaꞌal ta xavacꞌbeic ol yicats ti jyanlum jchꞌunolajeletique cꞌalal ti voꞌotique schiꞌuc ti jmolmucꞌtotique muꞌyuc xuꞌ cuꞌuntic yicatsinel?

¹¹Yuꞌun ti voꞌotique laj xa jchꞌuntic ti ta matanal colemotic ta sventa yutsil yoꞌnton ti Cajvaltic Jesuse. Jaꞌ jech ta xcol ti stuquique ―xi.

¹²Cꞌalal jech laj yaꞌiique, tsꞌijil icom scotolic. Jaꞌ jech xtoc tey tsꞌetel schiquin laj yaꞌiic cꞌalal ta xloꞌilaj ti Bernabee, ti Pabloe ti cꞌu sꞌelan laj yacꞌ iluc smucꞌul stsatsal ti Dios ta stojolique ti cꞌalal iꞌayic ta stojol ti jyanlumetique.

¹³Cꞌalal laj yoꞌntonic ta cꞌopojele, jaꞌ o jech lic yal ti Jacoboe: ―Quermanotac, aꞌyio avaꞌiic lec liꞌe.

¹⁴Ti Simón Pedroe laj xa yalbotic caꞌitic ti cꞌu sꞌelan ti Diose lic yichꞌ ta cꞌux ti jyanlumetique, ti laj stꞌuj loqꞌuel xtoc yoꞌ jech ta xcom ta yalab snichꞌnabe.

¹⁵Ti jech taje, jaꞌ coꞌol schiꞌuc jech chac cꞌu chaꞌal laj stsꞌibaic comel ti jꞌalcꞌopetic ta voꞌne ti ta scꞌop Diose:

¹⁶Tsꞌacal to ta xital yoꞌ jech ta jchaꞌmeltsanbe sna ti ajvalil David ti ililij xae. Ta jchaꞌmeltsan ta achꞌ ti cꞌu yepal icom stꞌujbenale.

¹⁷Jaꞌ jech ta jpas yoꞌ jech scotol ti yane ta xlic saꞌic ti Cajvaltique, jaꞌ ti cristianoetic ti oy ta sjoylej banomile ti laj yichꞌicun ta muqꞌue.

¹⁸Ti jech ta xal ti Cajvaltic taje, ta voꞌne xa laj yacꞌbotic jnaꞌtic ti jech onoꞌox ta spase, xi.

¹⁹’Jech o xal ti vuꞌun ta xcale, chꞌancutic ti jyanlumetique. Yuꞌun laj xa yictaic comel ti cꞌusi xchꞌunojic to oxe, yoꞌ ta stsꞌacliic ti Diose.

²⁰Jaꞌ noꞌox laꞌ calbetic yaꞌiic ta carta ti mu xa stiꞌic ti beqꞌuet ti acꞌbil ta smoton ti cꞌusi meltsanbil ta cꞌabale, ti mu xmulivajique, ti mu stiꞌbeic sbecꞌtal ti cꞌusi michꞌbil snucꞌ ta xchamique, ti mu stiꞌic ti chꞌichꞌ xtoque.

²¹Jech ta xcaltic, yuꞌun ta voꞌne onoꞌox, buꞌyuc noꞌox ta jujun lum ta xalic smantal ti Moisés ti ta jujun chꞌul na ti cꞌalal scꞌacꞌalil ti cuxob oꞌntonale ―xi ti Jacoboe.

²²Jech ti jcholcꞌopetique, ti ancianoetique, ti jchꞌunolajeletique lic stꞌujic jayibuc jchꞌunolajeletic ti oy ta stojolique, yoꞌ jech ta staquic batel ta jteclum Antioquía schiꞌuc ti Pabloe, ti Bernabee. Ti buchꞌu ti laj stꞌujique, jaꞌ ti Judas Barsabase, ti Silase, ti jaꞌ ichꞌbilic ta mucꞌ yuꞌun ti jchꞌunolajeletique.

²³Tey laj yichꞌic batel ti carta ti laj smeltsanic ti jech ta xale: “Ti jcholcꞌopuncutique, ti ancianouncutique, chabanucoxuc ta xcalboxuc avaꞌiic ti voꞌoxuc jyanlum jchꞌunolajeloxuc ti nacaloxuc ta Antioquíae, ti ta Siriae, ti ta Cilicia banomile.

²⁴Ti vuꞌuncutique laj caꞌicutic ti tey icꞌot ta atojolic viniquetic ti maꞌuc tacbil batel cuꞌuncutique. Ti viniquetic taje ta xilbajinoxuc, ta xacꞌoxuc ta vul oꞌnton yuꞌun ti scꞌop ti ta xalique ti tsots scꞌoplal ta xavichꞌic ti circuncisione, ti ta xapasic smantal ti Moisese.

²⁵Jech o xal lec laj caꞌicutic ti laj jcomonop jcotolcutic ti ta jvaꞌancutic viniquetic yoꞌ jech jmoj xtal sqꞌueloxuc schiꞌuc ti quermanotic Pabloe, ti Bernabee.

²⁶Jaꞌic ti buchꞌutic stenojic ti scuxlejal ta sventa ti Cajvaltic Jesucristoe.

²⁷Jech o xal tey ta jtaccutic talel ta atojolic ti Judase, ti Silase, yoꞌ jech ti stuquique ta xalboxuc avaꞌiic ta asatic ti cꞌu sꞌelan laj xa jcomonopcutic liꞌ ta cartae.

²⁸Lec laj yaꞌi ti Chꞌul Espíritue schiꞌuc ti vuꞌuncutique ti mu xcacꞌcutic avicatsic más. Yuꞌun jaꞌ noꞌox jech yepal ta scꞌan xapasic:

²⁹Mu xatiꞌic ti beqꞌuet ti acꞌbil ta smoton ti cꞌusitic meltsanbil ta cꞌabale. Mu xatiꞌic ti chꞌichꞌe. Mu xatiꞌic sbecꞌtal ti animaletic ti michꞌbil snucꞌ ta xchame. Mu xamulivajic. Ti mi jech ta xapasique, lec ta xapasic. Jaꞌ noꞌox jech yepal ta xcalboxuc avaꞌiic. Acꞌo xchiꞌinoxuc ti Diose”, xi ti cartae.

³⁰Cꞌalal jech itacatic batele, batic ta Antioquía. Tey laj stsobic ti jchꞌunolajeletique. Laj yacꞌbeic ti cartae.

³¹Cꞌalal laj sqꞌuelic ti cartae, xmuyubajic xa yuꞌun ti jech ipatbat yoꞌntonique.

³²Ti Judase, ti Silase ta sventa ti xuꞌ yuꞌunic ta xalic ti cꞌusi ta xꞌacꞌbat snaꞌic yuꞌun ti Diose, tey laj spatbe laj stsatsubtasbe yoꞌntonic ti jchꞌunolajeletique.

³³Cꞌalal ilaj yoꞌntonic ti cꞌu sjalil ijocꞌtsajic teye, tey iꞌalbatic yuꞌun ti jchꞌunolajeletique ti junuc yoꞌntonic acꞌo baticuque, yoꞌ jech ta sutic batel ta stojol ti buchꞌutic itacatic talele.

³⁴Yan ti Silase tey lic snop ti tey ta xcome.

³⁵Jaꞌ jech xtoc ti Pabloe, ti Bernabee tey icomic ta Antioquía. Jech o xal ti stuquique schiꞌuc ti yan jchꞌunolajeletique tey laj yaqꞌuic persa ta chanubtasvanej, ta yalel scꞌop ti Cajvaltique.

³⁶Tsꞌacal to un, ti Pabloe jech laj yalbe ti Bernabee: ―Batic yan velta ta sqꞌuelel ti jchꞌunolajeletic tey ta jteclumetic ti bu echꞌ caltic scꞌop ti Cajvaltique, yoꞌ ta jnaꞌtic cꞌu sꞌelanic quil ―xi.

³⁷Ti Bernabee oy ta yoꞌnton ti ta xicꞌ batel ti Juane, ti sbiinoj Marcos xtoque.

³⁸Pero ti Pabloe mu lecuc ta xaꞌi ti ta xiqꞌuic batele. Jaꞌ ti ictavan comel ta Panfilia banomile. Muꞌyuc ichiꞌinvan ta stsutsesel ti yabtelique.

³⁹Tey tsots laj svul sbaic. Jech o xal laj xchꞌac sbaic. Ti Bernabee laj yicꞌ batel ti Juan Marcose. Iꞌochic batel ta barco. Ibatic cꞌalal to Chipre.

⁴⁰Yan ti Pabloe jaꞌ lic stꞌuj ti Silase. Cꞌalal muꞌyuc to ta xloqꞌuic batele, ti jchꞌunolajeletique laj yalbeic ti Cajvaltique ti acꞌo cꞌuxubinaticuc yuꞌune. Tsꞌacal to tey ibatic.

⁴¹Tey echꞌ stsatsubtasbe yoꞌntonic ti jchꞌunolajeletic ti oyic ta Siriae, ta Cilicia banomile.