Hechos 15:11-16

¹¹Tan aatz oꞌ, aꞌ nikunima aas tu koꞌn u mam ibꞌaꞌnil u kuBꞌaal Jesuus chitpꞌoꞌ tu qꞌu paav. Utz echat qꞌu puera aanima majte.— Texh u Luꞌ.

¹²Ech itzꞌinbꞌaꞌ tek tibꞌ kajay qꞌu aanima. Aꞌ tek nichtabꞌi u Bernabee tuchꞌ u Pablo. Tan nichmotxtaleꞌ kam qꞌu mamaj xheenya tuchꞌ qꞌu txaichil nichiꞌan u Tioxh kꞌatza xoꞌl qꞌu puera aanima.

¹³Taꞌxh yaꞌ iyolon u Pablo tuchꞌ u Bernabee, aꞌ tek yolon u Jacobo. Tal ech tzaꞌ: —Hermanos, abꞌitaj vaꞌl saval sete tzaꞌ.

¹⁴Vettallu u Luꞌ tziꞌ aas kaniꞌch chit mutaqꞌtu tzii u Tioxh aas soꞌopon viyolbꞌal xoꞌl unjolol qꞌu puera aanima bꞌaxa. Tan antu nitxaa tiꞌ ibꞌens niman tetz.

¹⁵Utz aatz u kam tziꞌ, nikꞌul tibꞌ tuchꞌ qꞌul iyol qꞌu alol tetz u yolbꞌal Tioxh. Ayaꞌ vaꞌl tzꞌibꞌamalka ech tzaꞌ:

¹⁶«Aatz maꞌt ipaal qꞌu kam tzaꞌ, saqꞌaavuꞌlin utz, saqꞌaavunlak u ijlenalil vaꞌl echaꞌ u tetz u Daviid. Tan echaꞌ maꞌj kuꞌnaj otzotz aas sunsikꞌ qꞌul ichanaj utz, saqꞌaavvaqꞌ bꞌens vatinbꞌal tixoꞌl.