HECHOS 15:10-21

¹⁰Joon nano, ¿'ee lɨ' jo jo'¹ lɨ́ɨ²naa' tsá² Israel jilaa'²¹ 'e nigajmaa¹a Dios? Cwoo²oo' coon²¹ to² 'ii²¹ 'e jo lí² jmáa¹a. Ca 'lɨɨ²¹² tsacøøi'¹³ tyi' coon'¹³ jna' jo mo galɨ'¹ɨ'.

¹¹Lɨ' cɨɨ'¹²ɨ nitiin'¹³mo' jiin'¹³ la lɨ́² 'e nigatiin'¹³ 'in tsá² catyaai² do. Jo 'ee gacɨ́ɨin² tyi'. Untiin'¹³mo Ña'ñʉ'¹ʉ' Jesucristo jna' tsʉ 'wii'¹³ 'iin²¹²mo jna'.

¹²Mo ngayuui'¹³ joon jmai'² 'in gajaan¹an tii². Joon ganúu²o la 'ɨɨ²¹² tyaa¹ Bernabé coon'¹³ Poo² júu³ jilaa'²¹ li² coon'¹³ milagro 'e nigajmaa¹a Dios jee²¹² 'in jo seein²¹ Israel do.

¹³Mo ngayuui'¹³ gafaa'²¹a joon gajin'² Jacobo sɨɨ'²¹ɨ 'in tsá² sɨcaain²¹ do: ―Tsaru'¹u', nʉ́ʉ²duu' júu³ tyiia:

¹⁴Simóoi¹³ Tʉ́³ lo nigatyaa¹a coon²¹ júu³ xiiala nigatyii'¹³in Dios nifu 'in jo seein²¹ Israel 'e galɨtsáa¹mo‑tsi 'ii. La joon galɨ́ɨ¹mo tsá² tya' Dios.

¹⁵Jilaa'²¹ 'elo lɨ la lɨ 'e gatón¹ mo'jí² tya' 'in gafaa'²¹a júu³ tyʉ́² tya' Dios calɨɨ. La nigajin'² ni jí² tya' Dios:

¹⁶Yiia²oo tún¹ mi tyá² jilaa'²¹ 'elo. Jon jmaa'¹³oo tún¹ 'nʉ́¹ David 'e nisɨcɨɨi'¹³ no. Un'mɨɨ'²moo jilaa'²¹ 'e sá²gɨ joon isaa'¹³oo, jin'² Dios.

¹⁷Joon la joon jileei'²¹ 'in seein²¹gɨ lí²‑i 'naa'²¹i Ña'ñʉ'¹ʉ' Dios. Joon jilee'²¹ tsá² jo seein²¹ Israel 'in nityi'²na lí²‑i fee'¹i jna.

¹⁸Ca la mo jée²mo Dios gajmaa¹a júu³ jilaa'²¹ ijmáa¹a. Jin'² jí² tya' Dios jin'² Jacobo.

¹⁹Faa'²¹gɨ Jacobo jin'²in: ―'Wii'¹³ joon, tsaru'¹u', la lo‑o lɨ́ɨ²na: 'E tyʉ́²gɨ wa'a jo untyíi²ingɨ' 'in jo seein²¹ Israel 'in nigatʉ́² tɨɨ² tsáai² tya'a joon nigatsáa¹‑tsi Dios.

²⁰Liin¹mo wa'a jiin'¹³ 'e táan³a' ni jí² 'e jo lí²‑i dø'¹ø 'uunñi² 'e nisii'²¹ tsá² tyani dioses tya'a. Joongɨ jiin'¹³ coon'¹³ 'oo²¹o lí² cwuui²¹ tsá². La joongɨ 'oo²¹ tsá² jiin'¹³ coon'¹³ ñʉʉ'¹ tya'a. Joongɨ jo lí² dø'¹ø ngú¹ joo'²¹ 'in nigawuuin'²¹ tyí², jon'gɨ jmɨ¹ li²‑i dø'² tsá².

²¹Tsʉ ca mo lɨɨ la coon²¹ mo tɨ́² jmɨɨ²¹² 'ii'²¹ 'woo'²¹ tsá² 'e'²e tsá² inʉʉ cwo'¹ sinagoga la coon²¹ fuu²¹ jiin'¹³ ley tya' Moisés ―jilaa'²¹ 'elo gajin'² Jacobo.