Hechos 15:10-21

¹⁰Jatian ¿Jawekopiki ja nonbi itan non rekebaonbi senenhati atipanyamaa esébo, ja joi akaibo amakaskin Dios tanai mato iitai?

¹¹Jaskáyamakanwe, nonra ikonhai noixonres jawe kopímabi non Ibo Jesussen noa kishpinmaabo. Jatian jabaonra jaskáakinribi ikonhakanai —akin jato aká iki.

¹²Jatianra jain tsinkíkanabo jatikaxbi netékana iki. Jainxonra ja judíomabo xaran ikanaitian, jato meranxon, Diossen ratéti jawékibo itan ja oinxon onanti jawékibo aká Bernabé betan Pablon yoiaitian, ninkáxonkana iki.

¹³Moa jato yoikin senenhaketian, Jacobonbiribi jato neskaa iki: —Eapari ninkáxonkanwe ebé joi akaibo:

¹⁴Simónmanra noa yoike, jaskáakin ja judíomabo xaranmearibi jawen jonibo inon ixon, jato Diossen katota.

¹⁵Jaskara iti yoikinra, *profetabaon Diossen kirika meran yoikana iki:

¹⁶‘Jaskata pekáora, ea joríbati iki. Joxonra ja Davidkan peota poxota en weninti iki, jainxonra ja chiké ras ikabo en jakonhati iki.

¹⁷Jaskáxon wetsabaonribi ja eki menikaata jatíbiainoa jonibo betanbi non Ibo benakanon ixon.

¹⁸Ja moatianbi neskara jawékibo jato onanmaa non Ibonra, jawen joi jato onanmaa iki’, ikira ikai Diossen joi meran.

¹⁹Jaskara iketian, ja Dios ikonha judíomabo ja jakon esé jenemakaskin jaton shinan onantimaanankaskin maton tearesti yamake.

²⁰Jato jaskáayamakinkayara, kirika wishaxonres non jato bomati iki. Ja ikonma dios menikana piti pikin moa jenekanon ixon, itan wetsabo betanbires yorantibo akí moa jenékanon ixon. Jainxon ja joinman retea yoinabo itan jimi bomaama yoinabo moa pikin jenekanon ixonribi.

²¹Moatianbira jake jemabotiibi ja Moiséssen jato yoini esé jan senenhaibo. Jara tantiti netenbo tsinkíxon, jain tsinkíti xobonkoxonbo yoyo akanai —akin.