Hechos 15:1-18

¹Pablo, Bernabé kledu una Antioquíage kwian Jesu gerua ganga chudaboi Jesu geruadi gire chui ege kwian gweale israelita Jesu gerua ganga nga kweri Judeage jo chke una Antioquíage Pablo, Bernabé kledu ngwadi. Kwian israelita e daba na nu Jesu gerua gaba tku tangle, ama gerudu: —Ba me mo ta gbe mo kwara tkangenga sidri kwian israelita ulita kle age kare Moisés chadalla gerule kare, ba me ñage tien gitiru ji chugege agedu me no gdale.

²Pablo, Bernabé ka bo mno kwian kle daba tke tangle geru e giti ole, Pablo gerudu: —Ba me kle gerule ulia kwian ole mo kwara tkangenga giti, age ene giti che me ña tien gitiru ji chugege, agwa Jesu gai mo tale alin e giti che tien gitiru ji chugege. Gire kwian me Pablo kerua gau dage Pablo kle gerule kare Jesu giti. Bdagli kwian ulita Jesu gerua gaba una Antioquíage Pablo, Bernabé gau kagale una Jerusalénge geru mo kwara tkangenga giti trage no kwian Jesu gerua ketanga gdataboko giti gdaboke ole kaire kwian Chubenu chugagwalla ulita una Jerusalénge ole. Kwian ulita Jesu gerua gaba una Antioquíage Pablo, Bernabé kagu una Jerusalénge, ama kwian na Chubenu una Antioquíamu kagu ule Pablo ole Bernabé ole ama gatedi.

³Pablo kaire Bernabé kaire kwian ama gatangadi ulita jo chage una Jerusalén ngnagu, ama ulita jo tangle nga Feniciage nga Samariage. Nga ege ulita Pablo, Bernabé geru tragu kwian Jesu gerua ganga nga ege ole, Pablo gerudu: —Nga ulita cha chagedu ngwadi geru Jesu giti trage, kwian me israelita geru ulita ngeru ngwale chugu ngwadi gire ama geru Jesu giti ulia gau, ama mo ta blitu ulita Chube ole. Kwian Chubenu nga Feniciage nga Samariage Pablo keruchugu gerule no kwian me israelita Jesu gerua gau ulia giti, gire nga chegu suga noare ama ulitadi.

⁴Pablo, Bernabé kaire kwian ama gatangadi ulita jo chke una Jerusalénge, gire kwian Jesu gerua ketanga gdataboko giti gdaboke kaire kwian Chubenu chugagwalla ulita kaire kwian na ulita Jesu gerua gaba, kwian e ulita Pablo kaire Bernabé gau ngwange no kaire kwian Pablo, Bernabé gatangadi ulita gau ngwange no. Gire Pablo, Bernabé geru tragu daba Chubenu una Jerusalénmu ole Chube agedu giti ama alin ulita, Pablo kaire Bernabé gerudu: —Cha chagedu Jesu gerua trage kwian me israelita tanreske, gire cha giti Chube kwian me israelita tanre ta gbu Jesu gerua gai ulia.

⁵Kwian fariseo gweale nu Jesu gerua gaba kledu Pablo keruchuge gerule no kwian me israelita kle Jesu gerua alin gai ulia giti, Pablo me kle gerule mo kwara tkangenga giti malen kwian fariseo gerudu: —No kaire kwian me israelita ulita Jesu gerua gaba mo kwara tkangenga, ene kwian me israelita be age diali Moisés chadalla gerule kare, kwian Jesu gerua gai me ña e mlienga. Gerudale kwian me israelita ole ama Jesu gerua gai kaire ama agedale ulita Moisés chadalla gerule kare.

⁶Kwian fariseo e gerudu ene gire kwian Jesu gerua ketanga gdataboko giti gdaboke mo litu kwian Jesu gerua gaba chugagwalla ulita ole geru trage mo kwara tkangenga giti, ama gerudu modi: —¿Che kwian me israelita tkadale tangle age Moisés chadalla gerule kare o me?

⁷Kwian israelita ta daba na me israelita gbakalin mo kwara tkangenga kwian israelita kle age kare, e giti kwian Jesu gerua ketanga gdataboko giti gdaboke kaire kwian Jesu gerua gaba chugagwalla ulita geru tragu tanre. Gire Pedro chku gdate, Pedro gerudu kwian kle mo litaba mangire batre ole ene: —Cha daballa Jesu giti, uñale ba ulitage sbali Chube cha gau ba ulitaske cha kagu Chube gerua Jesu giti trage kwian me israelita ole. Ene kwian ulita me israelita Jesu gerua gai ulia gire ama ñage tien gitiru ji chugege agedu me no gdale Jesu giti.

⁸Chube kwian ulita talla uñe malen kwian me israelita ama gerua gau ulia gire Chube mo Oña gbu ama tale salengwli ama mo Oña gbu che tale kare. Ene chke uñale kwian ulitage Chube no kwian me israelita ole kaire agwe.

⁹Che chudalla israelita kaire kwian na chudalla me israelita, Chube gwage che ulita salengwli. Kwian me israelita Jesu gerua gau ulia gire Chube ama ta blitu Chube che ta blitu kare.

¹⁰¿Mineade ba mo ta gbakalin ma kweri Chubege? Jesu giti Chube agedu ulita kwian alin, kwian me israelita Jesu alin gadale ulia, ene ama chege no trate Chube gwa giti. Me no che kwian israelita gerule kwian me israelitage ama che suia ulita jwandale mo alin ene ama chege no trate Chube gwa giti. Che kaire che enusulian unsuialin me ñadu age ulita Moisés chadalla gerule kare, malen che me ñage daba na me israelita gbe age che takalin ama agedale kare Moisés chadalla gerule kare.

¹¹Me ene. Chege sugedale che Jesu alin gai ulia, ama giti che tien gitiru ji chugege, che me tañachugadale daba me israelita lle na gweale boadale, ene ama tien gitiru ji chugege, me dale. Chugagwalla Jesu lle ulita ulita no dodadu che alin kaire kwian na chudalla me israelita alin. Che kwian israelita kaire kwian na chudalla me israelita Jesu giti alin allabi che ulita chege trate Chube gwa giti.

¹²Pablo gerudu ene kwian kle mo litaba ole, gire kwian ulita chegu tañachuge kamne, ama ulita chegu Pablo, Bernabé keruchuge gerule dare Chube agedu giti kwian me israelitaske, Chube kiralla giti Pablo kaire Bernabé lle daga ngwale no tanre dodadu kwian me israelita tanre gwa giti.

¹³Pablo, Bernabé geru e ulita tragu kwian kle mo litaba ole, gire Santiago gerudu: —Cha daballa Chubenu, ba cha keruchuge.

¹⁴Simón-Pedro geru tragu che ole Chube agedu no no gwangea kwian me israelitaske, kwian me israelita chudallaske Chube kwian gweale gau mo alin.

¹⁵Kle boi ulita Chube gerudu kare unsuialin be boi giti, kwian Chube gerua ketanga dabage kada Amós Chube gerua degu kwian me israelita be Jesu gerua gai ulia giti, chada e gerule:

¹⁶“Chube gerudu: ‘Cha David chudalla chugu ngwadi gire ama oindalla me chegu kwian chugagwallale dare, ama chegu u skianbada kare. Agwa gire chui be chke gire cha be age no nakwaiteni David chudalla alin kwian kle u skianbada gbeni no naskuni kare. David oindallaske cha be kwian gdaite gbe kwian ulita Chugagwallale David kare gire kwian David chudalla be cha gai dage ama cha gau dage David toidu suiale kare.

¹⁷Chugagwalla e giti kwian me David chudalla nga ulitage be cha uñe, cha kwian ene gau mau alin, cha be ama ta gbe no cha ole, ama be cha gai ulia gire ama ulita be chege kwian chanu.’

¹⁸Chube gerudu ene ulita. Unsuialin uñadu ulita Chubege bdagli giti kle boi nege tangle giti e ulita uñadu Chubege ama be age ene kwian alin.” Chube gerua degaba unsuialin gerule ene.