Hechos 14:5-22

⁵Nach beṉe' Israel ca' gosone' yeḻa' güexi'a len beṉe' ca' cbi zjanac beṉe' Israel na' len justis c̱hegaque' cont yesone' contr Pablon' len Bernabén' na' yosoc̱hele' ḻegaque' yej.

⁶Perw cate' gwṉeze Pablon' len Bernabén' dan' chesaclaže' yesone' len ḻegaque', bosyoxoṉje' jaya'aque' yež Listra na' yež Derbe na' yezica'chle yež ca' zjachi' distritw dan' nzi' Licaonia.

⁷Na' ḻecz goseyix̱jue'ede' xtiža' X̱ancho Jesucriston' len beṉe' ca' že' na'.

⁸Na' yež Listran' besežague' to beṉe' golje' nxiṉj ṉi'e ca', cate' gocte' bidao' bi goc se'e.

⁹Con chi'teze' chzenague' choe' Pablon' dižan'. Nach Pablon' gwṉe'e ḻe' na' gocbe'ede' bena' chejḻe'e Diosen' nape' yeḻa' guac cont yeyone' ṉi'en'.

¹⁰Nach Pablon' boḻ güiže'ne' gože' ḻe' zižje: ―Gwzoža'. Na' ḻa' gwzoža'te' na' gwzolao chde'.

¹¹Na' že' beṉe' zan cheseṉe'e can' goquen' na' ḻegaque' bososye'e goseṉe' diža' Licaonia: ―X̱ancho beṉe' ca' chejnilaže'cho ba gosetje' nga chesone' yeḻa' guac, na' chle'etecho ḻegaque' ca beṉac̱h.

¹²Gosene' Bernabén' naque' x̱angaque' ben' zjansi'e Júpiter, na' Pablon' naque' x̱angaque' ben' zjansi'e Mercurio. Gosene' ca' ḻe Pablon' choe'che' dižan'.

¹³Na' yodao' gan' chesonxene' x̱angaque' Júpiteren' zoan cho'a yež. Na' bx̱oz c̱he Júpiteren' jax̱i'e go'ṉ be ba zjanone' xdan zjanžie' ḻegacba' corona yej. Nach bx̱oza' gwc̱he'e beṉe' zan cho'a yežen' gan' zoa puert c̱he ze'e dan' nyec̱hj yežen' na' goclaže' yesote' go'ṉen' yesonxene' postlw ca'.

¹⁴Na' Pablon' len Bernabén' cate' gosacbe'ede' can' yeson beṉe' ca', gosec̱heza' xagaque' dan' bi gosaclaže' yesonxen beṉe' ca' ḻegaque'. Nach gosedie' gachoḻ beṉe' ca' gose'e ḻegaque' zižje:

¹⁵―Beṉe', ¿bixchen' chonḻe ca'? Ḻecz beṉac̱h neto'. Za'to' cont chyix̱jue'eto' le'e cheyaḻa' gwša' yic̱hjlažda'olen' na' cuejyic̱hjle costumbr quinga dan' bibi zaca' na' gonxenḻe Dios ben' zoa toḻi tocaṉe. Ḻe' bene' yaban', yežlion', nisdaon', beṉac̱h, be ca' chesaš na' bite'tezechle da' chle'echo ḻe'e yaban', ḻo yežlion' na' ḻo' nis.

¹⁶Cani' Diosen' bi bžone' gon beṉac̱hen' bite'tez da' mal da' žan yesone'.

¹⁷Perw zoacze' chone' da' güen len yogo' beṉac̱h cont yeseṉezde' zoe' naque' Dios. Chone' cont chac yejw cont chac dan' chazcho na' chata' da' che'ej chagwcho cont zoacho mbalaz.

¹⁸Na' ḻa'czḻa' Pablon' len Bernabén' gosene' yogo' da' ca', caṉe gosezoede' bosožone' yesot beṉe' Listra ca' go'ṉna' yesonxene' ḻegaque'.

¹⁹Nach besežin baḻ beṉe' Israel beṉe' nita' yež Iconio na' ciuda Antioquía dan' chi' distritw Pisidian', na' beṉe' ca' gosego'oyeḻe' beṉe' Listra ca' cont gosaque'ne' txen bosoc̱hele' Pablon' yej. Na' cate' gosone' xbab bac̱h gote' nach gosexobe' ḻe' cho'a yeža' na' bosyocua'aṉe' ḻe' na'.

²⁰Perw na' beṉe' ca' chesonxene' Jesucriston' besedobe' gan' de Pablon', nach Pablon' beyase' beyeje' ḻo ciudan' da' yoble. Nach beteyo beza' Pablon' len Bernabén' jaya'aque' yež Derben'.

²¹Nach cate' besežine' Derben' bosozende' beṉe' ca' že' na' diža' güen c̱he Jesucriston', na' beṉe' zan gosone' txen len ḻegaque' gosejḻe'e c̱he Jesucriston'. Na' gwdena' gosa'aque' ja'aque' da' yoble Listran' na' Iconion' na' Antioquían'.

²²Na' to to yež gan' ja'aque' gosone' c̱hac̱h laže' beṉe' ca' chesonxene' Jesucriston' na' gose'e ḻegaque' yesenite' yesonxene' ḻe' do yic̱hj do laže', na' gose'e ḻegaque' da' zan da' gac da' saca'zi'cho šlac chbezcho yeyejcho yaban' gan' zoa Diosen' chnabi'e.