Hechos 13:7-27

⁷Ja yobé iká iki, ja joni koshi Sergio Paulo betan iká. Ja iká iki shinanya joni; ja joni koshira Diossen joi ninkátinin keena iki. Jaskáxon ja Bernabé betan Saulo kenamaa iki.

⁸Jatian jato kenamaa bekankebi, ja yobé Barjesús, jawen wetsa jane Elimas, Diossen joi yoikantin keenyamaa iki, jawen joi ninkáxon ja joni koshin ikonhanaketian.

⁹Jaskataitian, ja Saulo, Pablo janeyaton, Diossen Shinanman iboa ixon, kikinhakin jainbikon oinxon,

¹⁰yoia iki: —¡Mia riki janso, yoshinman bake, itan jatíbi jakon jawékibo akantinin keenyamai! ¿Jawekopiki ja non Ibon shinanna keská ikainbi, jaki yoitimakin jakonmabires shinankin min jeneyamai?

¹¹Mia jaskata kopíra, rama non Ibon jawetio basikamanres mia masá tenemai, nete oinyamaira mia benche banetai —akin. Jaskáatianbi yamekan mapókiranxon, moa jawe netebi oinyamaa iki. Jaskatax metsonxon iwekanon ikax, meshkáaketana iki, moa benche ikax.

¹²Jaskáketian oinnax, itan non Ibo yoii iká joi ninkatax, ratéxon ja joni koshin Dios ikonhaa iki.

¹³Jatian Pablo jabé boaiboyabi Pafossainoax pishíbaini boax ja Panfilia main iká Perge jeman nokókana iki. Ikaxbi Juan jato potabaini moa, Jerusalénhain karibaa iki.

¹⁴Ja Pergeainoax, Antioquíain tekíribikana iki, ja jema iká iki Pisidia main iká. Jatian ja tantiti nete iketian, jain tsinkíti xobo meran jikiax, yakábekona iki.

¹⁵Jatian ja esé kirika meran ja *profetabaon wishanibo yoyo akin senenhaa pekáo, ja tsinkíti xobo koirannai koshibaon jato yoikana iki: —Ja joi yoixon jato shinanmeemati ixon, jato yoireskanwe joi akaibó —akin.

¹⁶Jaskáakana Pablon jikitaanan, netékanon ixon jato meken chankanxona moa netékanketian yoia iki: —*Israelitabo, itan Diossakin shinannai judíomabo, en mato yoiaipari ninkákanwe:

¹⁷Noa Israel jonibaon Diossenra non reken papashokobo katota iki; jaskáara ja Egiptoain maei boax ikánontian, kikinbiresi kaikana iki. Iikinra, jawen atipana koshin ja maimea jato Diossen pikonike.

¹⁸Pikoa boaxa ikana iki, jain joni jayamainko, chosko chonka baritiabira, jainoaxa jakonma axekan iki yoitimakanaibi Diossen jato jaweayamaa iki.

¹⁹Jaskáaxon ja Canaánhain iká kanchis main jemabo jato keyoxona iki, jain non reken papashokobo jakanon ixon.

²⁰Ja main jakana iki, chosko pacha pichika chonka baritiabira. Jainxonra jan jato ikinti koshibo jato jikimaxona iki; ja Samuel *profeta jikii kaai kaman.

²¹Iikinbi, apoya itin keenkin Dios yokákana iki. Jaskáakin yokákanketian, Benjamínman rarebo Quis janeya jonin bake Saúl jato jikimaxona iki. Janra chosko chonka baritia senen jato ikinna iki.

²²Jaskáa iikin, Diossen jakiribi Saúl pikoxon, jawen toan David jaton apo iti jikimaxona iki. Ja yoiira iká iki Dios neskati: ‘Enra oinke ja Isaíkan bake David westíora joni, ea keenai keskati jaa. Janra jatíbi en shinannai jawékibo ea axonti iki’, iki.

²³Ja Davidkan rareboboainoara, moabi jato jaskáaxonti yoini ixon, ja Israel jonibo jato kishpinmati Diossen jato raanxona iki, ja riki Jesús.

²⁴Jesús joámapari inontianra, Juanman jatíbi *Israel jonibo jato joi yoikatitai, jaton jakonma shinanbo akonkin jeneax bautizanmeekanti.

²⁵Jainxonribi jawen tee senenhati ochóma iken, Juanman jato yoia iki: ‘Ea riki jan jato kishpinmati iki ixon, maton shinannabira ea jama iki. Ikaxbi jara epekao joái. Já iki ea xewina, jaskara ikenra ea já namanbires ixon, jawen zapato risbitanibobi en choroxonti jisáma iki’, akin.

²⁶Jaskara iken nokon wetsabó: Mato Abrahamman rarebobaon bakebo itan ja Dios akin shinannai judíoma jonibo. Nato jan kishpinti joira matona iki.

²⁷Jaskara ikenbira, jaton joni koshiboyaxonbi ja Jerusalénhain ikábaon Jesús onanyamakana iki; jainxon ja *profetabaon wishani meran yoiai joibo, ja tantiti netetiibi yoyo akinbi, onanyamareskana iki. Jaskáakin onanyamaxonra. Jesús retekana iki, ja Wíshakan yoiai keskábo senenmakin.