Hechos 13:43-52

⁴³Che care'ch rebejṉga, xhidajl rexpejṉ Israel, näjza xhidajl rebeṉzijt nani rusoob xtidx Dios si'c rujn rexpejṉ Israel, birinajlreni Pabl näjza Bernabé. Dxejc balijdxreni rebejṉ ni siädnajlreni, räjpreni lojreni chanuutis chalilajzreni didxlii xcuent Jesucrist.

⁴⁴Che gojlti stee sabd, dxej ni rusilajz rexpejṉ Israel, xhidalduxh rebeṉguejdx bire' te gucuadiajgreni guinii Pabl xtidx Dios.

⁴⁵Che bahuii rexpejṉ Israel guiraa rebejṉ ni bire', bidxechlajzreni, gucnadareni. Dxejc gusloj cadxagdijḻ rexpejṉ Israel Pabl. Che rniini te diidx, laareni rniireni “didxxhiini”. Caniyajzareni Pabl näjza Bernabé, caguereni lojreni.

⁴⁶Luxh di Pabl niclaza Bernabé nidxejb. Gusutijptisreni, räjpreni lo rebejṉ: ―Nungäjḻ ganid lojtu guiniinu xtidx Dios, sa'csi la'tu najctu rexpejṉ Israel. Niluxh ditu chalilajz xtidx Dios, lagajc la'tu caniitu digacdi guibaṉnäjtu Dios par tejpas. Ni'c sibiré loonu, te guiniinu xtidx Dios lo rebeṉzijt ni digac xpejṉ Israel.

⁴⁷Sa'csi si'c agunibee Xtiosnu. Scree caj xtidx Dios lo guijtz: Suxhaḻätu te guluiilu rextidxä lo rebeṉzijt ni digac xpejṉ Israel, te chalilajz rebejṉga xtidxä, te ḻaareni lo xtojḻreni, cadrotis yu'reni lo guedxliuj, räjp Dios.

⁴⁸Che biejn diajg rebeṉzijt rediidxre, bibalazduxhreni, gulä'preni xpala'n xtidx Dios. Renani gule Dios galooli huililajz xtidx Dios. Xhidajl najcreni.

⁴⁹Bire'ch xtidx Dios guideb nez reguejdxga.

⁵⁰Dxejc rexpejṉ Israel balijdx regunaa ni sajcru, näjza reniguii ni sajcru neṉ guedx Antioquía, te bidxechnäjreni Pabl näjza Bernabé, barilaagwreni Pabl näjza Bernabé te biunejzreni guedx Antioquía.

⁵¹Dxejcti Pabl näjza Bernabé gubijb guxhuj ni'reni si'c te seen te gacbee rebejṉ xhet laadi bejnreni. Sä'tireni guedx Iconio.

⁵²Baspaa Dios lajz rexpejṉ Jesucrist guedx Antioquía xten Pisidia. Bazutijpza Sprit Dxan xten Dios lastooreni.