Hechos 13:29-47

²⁹Chube gerua degaba unsuialin gerule Jesu giti kwian be age me no ene Jesu ole, boidu ulita chada degaba gerule kare. Kwian Jesu guda kruge gire ama jaba junlen dbige kruge, jaba jo tkaba keugage,

³⁰agwa Chube ama gbuni gwadeni.

³¹Gire bigwa kwian bai Jesu gatudi jonkare nga Galileage joge una Jerusalénge Jesu bebi jogeda gire, kwian e ulitage Jesu medu gwadeni chui tanrege chui cuarenta gire Jesu joni nga ngaña giti. Nege kwian e ulita kle geru Jesu giti kete kwian na ulitage.

³²Pablo gerudu dare kwian ulita ole: —Cha kle chage modi cha geru no Jesu giti ulita ketakalin ba ulitage, ene chke uñale ba ulitage Chube gerudu cha israelita enusulian unsuialin ole Chube be age no ama alin kaire ama oindalla alin. Nege Chube agedu cha enusulian oindalla ulita alin cha amaña alin Chube gerudu kare, Chube Jesu gbuni gwade naskuni Chube gerua degaba unsuialin kada Salmos gerule kare, chada Salmo gdabokedale gerule: “Chube gerudu: ‘Nege cha ba kaite nate kwian ulitage cha Kirollale, ene chke uñale kwiange ulia ba cha Kirolla cha ba Ñenua.’ ” Chube gerua degaba unsuialin gerule ene Jesu giti.

³⁴Chube gerudu unsuialin tangle cha israelita chugagwalla ole Chube mi Jesu jaba chuge ngwadi tugeda, agwa Chube be ama gbeni gwade. Isaías Chube gerua degu unsuialin gerule Chube be age ene ulia, chada e gerule: “Chube gerudu: ‘Cha be age ulia no trate ulita cha gerudu kare David ole.’ ”

³⁵David chada degu unsuialin David gerudu kare Chube ole Jesu giti, chada e gerule: “Ba mi lle boanga no trate ba alin jaba chuge ngwadi tugeda.” David chada degu ene unsuialin Jesu giti.

³⁶Nege cha gerule ba ulita ole, cha takalin geru suge ba ulitage. David chada degu, ¿chada e kle gerule chema giti? Me kle gerule David giti agwa Jesu giti David chada degu. David lle bo no ulita ama kledu toi gwade gire diali Chube ama ta gbu age Chube takalin kare. Bdagli ama jokeda, ama jaba jo tkaba keugage ama bitalla ulita jaba ogakle ngwadi, ama jaba tugeduda ulita.

³⁷Agwa Chube jaba gbuni gwade jaba e me tugeduda dale, e Jesu. E giti chada degaba unsuialin kle gerule.

³⁸Ba ulitage chkedale uñale trate Jesu giti alin allabi Chube kwian age me no talla mlienga. Kwian agenga me no ulita bai kaire Jesu gerua gai ulia Chube be kwian ene agedu me no talla mlienga ene kwian be chege trate Chube gwa giti. Age Moisés chadalla alin gerule kare, e giti Chube me kwian age me no ulita talla mlienga dale, kwian ene me chege no trate Chube gwa giti.

⁴⁰’Ba ulita kledale ta giti, ba tañachugadale no, ene ba me boi kwian Chube gerua ketanga chada degu unsuialin kare, chada e gerule:

⁴¹“Cha Chube, sugedale ba ulitage ba kle cha ibade ba me kle cha gai ulia. Ba chuga giti nga chkedale suge ba tañachugadale, ba me cha gau ulia malen ba be jogeda ba ulita be chege sugekare chage. Ba toi suiale cha be age tanre mo kiralla giti, agwa e giti ba mi cha gai ulia. Kwian gweale cha trage ba ole, ni ba be cha gai ulia cha traganga giti.” Chube gerua degaba unsuialin gerule ene kwian me Jesu gai ulia giti, ba me ta boikalin chada degaba gerule kare, ba mo ta gbadale Jesu gerua gai ulia.

⁴²Pablo kwian ulita tku tangle ene Chube geruage, Pablo, Bernabé kledu joge siere u mo litangwage, gire kwian ulita gerudu Pablo ole: —Ba chie kwaite undege chuia nage cha ulita tke tangle dare geru Jesu gitige. Pablo gerudu: —Ima, ba cha manade ngwange, cha be chieni.

⁴³Pablo kaire Bernabé jo chage gire kwian israelita tanre chagedu ama nate kaire kwian me israelita sui jwanba israelitage chagedu Pablo nate Bernabé nate. Kwian chagedu ama nate kwian e ulita kle Jesu gerua gai biale gire Pablo, Bernabé ama kira gbu Jesu geruadi gerudu no ama ulita ole: —Mo ta gbadale chage diali no ngerugu ba ta sugedu ba Chube gerua Jesu giti gau gwangea kare, Chube agedu no ba alin ba me talla mlienga.

⁴⁴Undege chuia na chku gire Pablo, Bernabé joni u mo litangwage kwian tke tangle kwaite, kwian nglea unaske mo litu Pablodi Pablo keruchuge gerule Jesu gerua giti.

⁴⁵Agwa kwian israelita tanre me Jesu gerua gaba kle mo lite u ege gwagedu kwian na tanre kle mo lite ule, ama semadu tanre kwian giti Pablo ole gire kwian israelita e gerudu me no Pablodi kaire ka bo Pablo ole me no.

⁴⁶Gire Pablo kaire Bernabé me mo ta gbu kennga kwian israelita me Jesu gabadige, ama gerudu: —Chube cha ulita ta gbu geru amanu Jesu giti kete ngeru ba ulita kwian israelitage, agwa ba ulita israelita me jaindu geru ai gai ngwange, geru e gai ulia giti ba ñage toi chui tangle Chube ole agwa ba tañachugu geru e ngwale ba me geru e gau ulia, malen cha ulita kle Chube gerua Jesu giti kete kwian me israelitage.

⁴⁷Chube gerua degaba unsuialin gerule kwian ama gerua dbanga alin, chada e gerule: “Cha ba gbu jichra kare kwian toinga nga ulitage alin ene chke uñale amage ulita cha Chube. Ba cha gerua dbadale kwian nga dba ai giti ulitage, kwian cha gai ulia cha kwian ene jwen siere ji chugege age me no gdale.” Chube gerua degaba unsuialin gerule ene malen cha geru Jesu giti dbadale kwian me israelitage kaire agwe —Pablo gerudu ene kwian ole.