Hechos 13:22-47

²²Tupujutu Yusura bijidama bacuare Saúl ecuari juishu. Turatu mepecuare David ecuari iyacuaque juishu. ‘Pana adeba tuque David aya, Isaíja ebacuaque. Tumeque ecuita tu ecue bijidaque. Turatu aya dutya era amereyaque’ jadya patu Yusu jucuare, David jadya ayaque.

²³Icuenetadya patu Yusu jucuare: ‘Cuadishabuque tuque israelita cuana queja David eque juracanayaque tuna inajacamere ishu’.

²⁴Jesús, Yusuja quisarati bahuitya catibutima jarijutu Juanra israelita cuana acuare: ‘Necacuareticue inime. Necutsamereticue Yusu queja nimee jadique ejitaju juishu’ jadya tujatu ecana acuare.

²⁵Jucuaretu Juan tuque Yusura amerehuaque atillahuie: ‘Ique ama micuanara ihuayaque. Mesías ama ique. Tsunutaya amatu peya junayaque. Tujatu dyaque casa aniya, ecue bucha ama. Tuque baatsu ique ni aishuquedya jutidya; mere puji tuja patrón tsehue beta tupu ama ejuu bucha jutidya ique’ jadyapa tuna Juanra acuare, —jadyatu Pablora isaracuare Antioquiaju cuanaque.

²⁶Isaranucacuare tujatu ecana: —Ecue ata cuana Abraham eque ejuracana cuanaque, nebacacue ique. Micuana israelita ama cuanaque Yusu neri muiqui cuanaque, nebacacue ique quisaratiyaju. Yusura micuana bahue amerecara aya eje bucha tuaqueja judirue juishuque.

²⁷Dutya jujeri Jerusalénju cuanaque tuna baecua jucuare Jesús Ijahua quejaque inajacamere ishu ecuadishaque. Tunaja huaraji cuana tuna baecuadya jucuare. Canajara huecacaju cama tunajatu caradati ishuque etare cuanaju Yusuja quisarati isaranicuare. Isaracuare tunajatu Yusu equeque quisarati cuejaqui cuanara huenecuare cuanaque. Jadya ama bucha tunajatu adebacuare ama isarayaque.

²⁸Jerusalénju cuanaratu Pilato bacacuare tuja iyemere ishu, arepa tuna eje bucha iyemere aishuque dadicuare ama ama bucha, arepa tuja ni ejeque jucha aijama jucuare ama bucha.

²⁹Icuenetadyatu Yusu equeque quisarati cuejaqui cuanara huenecuare Jesús jadya ayaque. Yusuja quisaratiju tunajatu huenecuare tuque eje bucha judadiyaque. Dutya judadicuare tunara cuejacuare eque cuitadya. Jesús curusuju majuhuajutu Joséra emajuque butyamerecuare. Butyatsu tujatu cani ducu ishamerecuare.

³⁰Yusuratu yudijidya nityatsuranuca acuare tuque quimisha huecaca majuhuaju.

³¹Netitsuranucatsutu Jesús cabamereticuare tura mepecuare cuana queja. Tuque iyetanama jariju tuna junenicuare tuatsehue jetiama epu cuana juque bahuiya, Galilea eque Jerusalén tupu. Chacha netitsuranucatsu tuna Jesúsra cabamereti ishu acuare. Juneninucacuaredyatu tuna tsehue eje uma huecaca. Iyacuatu tuque enityatsuratanaque baqui jucuare cuanara tuja quisarati cuejaya dutya queja. Tunaratu tuja quisarati cuejaya Israel eque ejuracana cuanaque.

³²“Yatsera micuana tumebaedya cuejaya Jesús eje buchique quisarati. Tudyatu Yusura ecuanaja baba cuana cuadisha ana acuarequedya.

³³Tura aana ahua bae cuitadyatu jucuare. Ecuana ecuana tuna eque ejuracana cuanaque. Ecuanaja ishutu Yusura acuare tura aana ahuaque Jesús yudijidya nityatsuranuca ahuaque. Yuequedyadyatu Yusu jucuare, Jesús emajuquepa nityatsuranucaya jadya. Tura quisarati acuareque tu ehuene Yusuja quisarati beta ishuque Salmosju: “Miquemi ecue ebacua. Iyacua tuquemi ecuita cuana bamereya, ique micue tataque”.

³⁴“Tumebaedyatu béru Yusura cuejacuare emajuque patu nityatsuradadiya, tuja ecuita riri ishu ama jadya. Jadyatu Yusu jucuare, jadya quisarati ayaque: “Jida tuque ameredadiya miatsehue. David tsehue ique jida jucuare bucha, jadidya judadiya miatsehue. Yuneridya jadidya judadiya”.

³⁵Peya tu Salmo quiricaju ehuene jadya: “Ririshabuque amami micue iyuhuedaja ecuita, mique merequi juhuaja ecuita”, jadyatu Davidra quisarati acuare béru.

³⁶“Adebayadya ecuana David tuta taca ama jadya caticuareque. Davidtu majucuare. Tuque majuma jarijutu Yusuja biji eque anicuare. Jida tujatu israelita cuana narucuare. Majuhuaju tunajatu emaju caniju ishacuare. Tuja ebaba cuanaque majuhuaju ishatanacuarejudya tunajatu ishacuare. Davidtu majutsu ririterecuare.

³⁷Jesús bacue riricuare ama, Yusura yudijidya emajuque nityatsuranucacuare tibu, —jadya tuna Pablora cuejacuare.

³⁸Pablora Antioquiaju cuanaque cuejanucacuare: —Ecue ata cuana, bahue micuana yatsera amerecara aya; Jesús equetu Yusura jucha cuana apupashaya. Riyaque Jesúsdya micuana cuejaya.

³⁹Jesús queja catyatitsu cuita camadya tuque micuanaja jucha cuana etillatanau. Moisésja cacuatsashati eque juatsu amatu jucha cuana apupashatanaya, Jesús queja catyatitsu cuita camadya.

⁴⁰Beru patu Yusu equeque quisarati cuejaqui cuanara quisarati acuare, tuque bijidamaduraquiquepa canerecatidadibuque jadya. Necanaruticue micuana, tunara cuejacuare eque ejuuju.

⁴¹“Micuanaratu ecue quisarati ejeneya ama. Micuana micuana quijaribati arida cuanaque. Inime tilla nejucue. Baji micuanaja paani. Iyetanadadiya micuana, ecue quisarati ejenecarama aya tibu. Idya Yusu. Micuanaja yacuajudya tuque aya ejeja ataquique ama. Jadya ama bucha micuanara ejenedadiya ama. Peya cuanara era ahuaque cuejayaju tuque micuana ejenebuque ama”, jadyatu Yusura quisarati acuare béru tuja quisarati cuejaqui cuana eque, —jadya tuna Pablora acuare.

⁴²Jadya aatsutu Pablo tuatsehue juneniya cuanaque jadya tuna caradati ishuque etare juque cuinanacuare. Tuna cuinanayaju tuna ecuita cuanara acuare: —Peya canajara huecacaju ecuana Jesús eje buchique necuejananucacue, —jadya tunajatu ecana acuare.

⁴³Tume caradatihuaque diruterehuajutu umada israelita cuanara tajicuare Pablo, Bernabé jadya. Tumebaedya tatse jetiama israelita ama cuana Yusu muiqui cuanara tajicuare. Tatsera tuna casaturacuare. —Yusura micuana dyaque iyuhueda bayaque caadebatitsu tuque pureamaturayaque neaniajecuedya jutidya, —jadya tatsejatu ecana acuare.

⁴⁴Semanape piji cuitadya tuna canajara huecacaju dutya jujeri epu ebariju cuanaque casitaticuare Ecuana Cuatsashaquija quisarati baca ishu.

⁴⁵Jetiama ecuita ecaradatique baatsutu israelita cuanaja huaraji cuana cahuaiticuare Pablo, Bernabé jadya tsehue. Tuna cuita camadya quisaratiyaju bacatacara tuna jucuare tatse jetiama ecuitara quisaratiyaju bacayaju. Tume tunajatu Pablo ecatse dyaque cuita jishatsu quemitsape ijillahuana jadya atibunecuare: —Pablo ecatsera micuana pusha pusha cuejaya, —jadya tunajatu ecana acuare.

⁴⁶Tumetu Pablo, Bernabé jadya quisaraticuare casada tsehue, bajida tsehue ama: —Micuanadya micuana ecuanaja icuene cuita Jesúsja quisarati bacameretaqui jucuare micuana israelita cuana. Jadya ama buchatu micuanara bijidamaduraya. Micuanaratu micuanaja mere equedya jutidya Yusu queja judirutaqui ejuu bucha adebaya. Jadya tibudya tuque tuque yatse iyacua israelita ama cuanaque Jesúsja quisarati cuejaya.

⁴⁷Yusuratu béru quisarati acuare: “Micuana micuana era iyahua, ecue quisarati dutya quejaque cueja ishu. Hueca bucha micuana jubuque, eje bucha inajacameree era eauque cueja. Dyaque japada micuana cuabuque, ique eje buchique bahue amereyaque”, jadyatu Yusura quisarati acuare béru. Jutaquiju tuque yatse israelita ama cuanaque cuejaya, —jadyatu Pablora israelita cuana acuare.