HECHOS 11:5-19

⁵―Daa ngo le'n ciuda Jop. No láth ngue bezen Diox thìb bzyè, mxyo'f loo thìb con' loon. Gunèen nde làa thìb con' co' ñaa xal thìb le' mant loo bé' loon. No natedó' mant dyap punt.

⁶Co'se' mbui'en co' huenleque' le'n mant cón nzo le'n mant, gunèen nzo má' co' nzi'f thap nii le'n mant co' nac má' huan. Nzo mbel'. No nzo mbin le'n mant.

⁷No mbìnen thìb di's co' gunee loon: Goo too, Pedr. Lùu nee xá ñaa má' co' hual. Beth má' par hual.

⁸Per daa ndxab loo Tad: Aa'a, Tad. Ne'lidena tataa tac daa tarte hua nec thìb nítyèth má' co' nac má' nazab no co' nac má' co' inambìide.

⁹Sya, mbere di's che'n Tad. Mbyèn di'sa tedib vez loo bé'. Gunee di'sa loon: Rye má' co' mtembìi Diox, ne'gabtel má' zab má'a.

¹⁰Mbyon vez tataa gunee Tad loon. Ngoloa, mbere mant. Nguáp mant loo bé' tedib vez.

¹¹Leque hora, mzin son xa'bi' liz Mon co'te' nzon. Yon xa'bi'a nde axta ciuda Cesar par mbi'th cua'n xa' daa.

¹²Sya, mtel' Xpii Natú' daa, nda non yon mèna. No mnibe' Xpii Natú' loon ne'gàcte chop loo chop la's daa par ga non mèna liz Cornel. Ngua no xop mèn ciuda Jop, co' ndxàc hues na' por cón che'n Jesucrist, daa liz mbi' co' lèe Cornel ciuda Cesar, ne.

¹³Mbi' co' lèe Cornela mda'guè' cuent loo nu' xá mod gunèe mbi' ngua thìb angl loo mbi' liz mbi'. Ndxab angl loo mbi': Ftel' mèn par ya mèn ciuda Jop par ya xi mèn thìb mbi' co' lèe Mon co' ne' tedib lèe co' lèe Pedr.

¹⁴Mon ñee lool xá mod lil par gàc lyá'l loo con' ryes con ryete mèn gulizl.

¹⁵Co'se' mtlon, ngue toodiz non mèn guliz Cornel liz Cornel, Xpii Natú' ngulàa loo mèna no ngòo Xpii Natú' loo mèna par tlo ñibe' Xpii Natú' loo mèna xalque' ngulàa Xpii Natú' loo na' co'se' ngòc huiz co'se' nerleque' ngulàa Xpii Natú' loo na' no ngòo Xpii Natú' loo na' par tlo ñibe' Xpii Natú' loo na', ne.

¹⁶Axta syare' mte' lezon xal gunii Tad Jesús loo na': Lìcque', Juàn Bautist mbli bautizar mèn con nít per le'n taaplá huiz lin par lyàa Xpii Natú' che'n Diox loo ryete gu' co' ngola'sle' loo cón chenen no loon, co' nee di's, thidte ngòo gu' loo cón chenen por cón che'n Xpii Natú' co' lyàa loo gu' xal co'se' ndxòo mèn le'n nít par ndxàc bautizar mèn.

¹⁷Pues, chele' Diox mbli ngulàa Xpii natú' no ngòo Xpii Natú' loo mèn co' inacte mèn nación Israel par mtlo ñibe' Xpii Natú' loo mèna, ne, xalque' ngulàa Xpii Natú' loo na' no ngòo Xpii Natú' loo na' par mtlo ñibe' Xpii Natú' loo na' co' ngola'sle' loo Jesucrist, ¿chó nac daa hora par gàc daa thìb xa' co' cà' di's, no thìb xa' co' nac ngolo ngola's loo con' ngue li Diox par yila's taamas mèn, sya, à'? Yende mod gác lin tataa, ¿lé'?

¹⁸Le' sya, co'se' mbìn mèn co' ndxàc hues por cón che'n Jesucrist co' nac mèn ciuda Jerusalén tataa ndxab Pedr, xèegà mbyau' ro mèna. Más quee lezo' mèna ndxab mèna di's roo di's xèn no di's natú' loo xtàa mèn cón che'n Diox no loo Diox. Ndxab mèna: ―¡Ay, Dio's! Nase non na' no nanee na' axta loo mèn co' inacte mèn nación Israel mbli Diox par mxyal' ned mxyal' yó' par ngulàa yéc mèna no ngulàa lezo' mèna par mse' mèna mod co' ngòp mèna loo Diox. No tataa mod tyon' xtol mèna par gàc loo mèna yòo ban no mèna Diox thidtene yiloa.

¹⁹Anon mbeth mèn thebol Steb mtlo mèn, ndub ngu's mèn mèn co' ngola'sle' loo cón che'n Jesucrist. Ngo ndxep mèn co' nzo ne'ñee lezo' mxon' axta par le'n yèezya' co' nac làaz mèn fenis, no axta par le'n yèezya' co' nac làaz mèn chipr co' nac thìb yòo biiz co' nziri' le'n níttó'. No axta le'n ciuda Antioqui mxon' rye mèna. Mblo mèna yalbàn rye ned mxon' mèna cón che'n di's ndac che'n Diox. Per ante loo mèn nación Israel mblo mèna yalbàn. Ne'ngode mèna yalbàn loo mèn co' inacte mèn nación Israel.