Hechos 11:16-26

¹⁶Jaskáketian ja non Ibon yoini joi en shinanna iki: ‘Ikon riki, Juanmanra onpaxenres jato bautizana iki, ikaxbi matora ja Diossen Shinanman bautizanoxiki’, iki iní.

¹⁷Jaskara iken, ja non Ibo Jesucristo ikonhaketian noa menia keskáakinribi, ja Shinan jato Diossen menikenki ¿Tsoa iki ea, ja Diossen akai jawékibo bechitenti? —akin jato aká iki.

¹⁸Jatian jaskáakin jato yoia ninkatax, ja Jerusalénhainoa joi akaibo, moa jawebi yoyo iamai Dios rabii neskákana iki: —¡Ja judíomaboribira Diossen ikonhamataanan jato jati nete menia iki! —ikibo.

¹⁹Jatian ja Esteban retekanontianribira, ja jatíribi joi akaibo masá tenemakin peokana, jabati bokana iki: Feniciain, Chipreain, jainoax Antioquíainbo. Jainbo boxonbi, judíomabo ayamakin ja judíobobichores ja jakon joi yoikana iki.

²⁰Jaskákenbi Chipreainoa betan Cireneainoa jawetii joi akaibo Antioquíain bokana iki. Jain boxonra, ja non Ibo Jesúskiriti iká jakon joibo ja judíomaboribi yoikana iki.

²¹Ja Ibon atipana koshi jato betan iketianra, ichaxon ja moatian jaton jakonma axébo jenetaanan, non Ibo ikonhakana iki.

²²Jatian ja Jerusalénhain iká joi akaibaon, jaskara joi ninkáxon, Bernabé Antioquíain raankana iki.

²³Nokóxon, Diossen jatoki jakonhakin shinannai onanax, ikonbiresi Bernabé raroa iki. Jatíbira jato eseanan yoia iki, ponté shinanyaxon non Ibo chibankin jeneyamakin, jan yoiai keskábo senenhaxonkanon ixon.

²⁴Bernabé iká iki jakon shinanya joni, Diossen Shinan naikia itan oinxomabi, ikonhaax koshia joni. Jaskara iketianra, icha non Ibo ikonhaa jonibo kaikana iki.

²⁵Jaskata pekáo, Bernabé Tarsoain kaa iki, Saulo benai.

²⁶Jatian ja Antioquíainoa meraxon ioa iki. Jain westíora baritia senen joi akaibo betan ixon, icha joni jato esea iki. Ja Antioquíainxonra jaonmea onannaibo peokin janekana iki, Cristianos akin.