Text copied!
CopyCompare
Xtidxcoob Dios ni biädnä dad Jesucrist - Hechos - Hechos 10

Hechos 10:8-37

Help us?
Click on verse(s) to share them!
8Dxejc bij Cornel diidx lojreni xcuent ni gusajcni, dxejc baxhaḻni redade'ga guedx Jope.
9Che bara yääl, sääreni lo nezyuj. Asiäddzuṉgajxhreni guedx Jope, pet si'cti läidxejni. Lagajc oṟga huä'p Pedr yecyu' te guininäjni Guejb Dios.
10Calanduxh Pedr, rlajzni gauni. Laḻ ni cayujnreni xhi gauxhuejni, gusloj canixcaḻni.
11Bahuiini bixal xhaguibaa, bahuiizani biäjt te bariadro nani naliib guidap xi'ni. Siädjiätchäiini gajxh nez loj Pedr.
12Neṉ bariaadga yu' guiraa reman ni yu' lo guedxliuj nani rsianäj guidap ni'ni, näjza renani rxeeb si'c bäḻ, näjza renani rutajt.
13Gunii Dios lo Pedr, räjpni lojni: ―Pedr, huisu te ju'tlu man gaulu.
14Dxejc räjp Pedr lojni: ―Na'c Dad. Nunc gauä sa' remandxuudxga, abia'a dina gauä reman nani rnii xleiilu najc mandxuudx.
15Gunisac Dios loj Pedr, räjpni: ―Na'cru guiniilu nacdxuudx reman nani abasia.
16Che gujc choṉ huält gujc si'c, huä'psac bariaadga xhaguibaa.
17Laḻ ni cayujn Pedr xhigab xhichani'c säloj nani bahuiini, bidzujṉ reniguii ni baxhaḻ Cornel ro' yu'ga, sa'csi agunabdiidxreni caro rbäjz Simón nani ruscoodz guijd.
18Che bidzujṉreni rolä'ga canabdiidxreni la ro'c rbäjz te dade' ni laa Simón Pedr.
19Laḻ ni cayujn Pedr xhigab xcuent ni bahuiini, gunii Sprit Dxan xten Dios lojni, räjpni: ―Bahuii, choṉ dade' caguiillu.
20Biäjt yejc yu're te jinälureni. Na'c gunlu xhi stee xhigab, sa'csi lagajc narä baxhaḻäreni lojlu.
21Dxejcti biäjt Pedr jiaaga, bidzujṉni cadro suga' redade'ga, räjpni lojreni: ―Narä nacä ni caguiiltu. ¿Xhi siäädtu?
22Räjp reniguiiga lo Pedr: ―Cornel, nani rnibee te gayuu soldaad, te beṉsa'c, te bejṉ ni rajṉ Dios, te bejṉ ni sanälajz rexpejṉ Israel, laani baxhaḻ nuure lojlu, sa'csi räjp angl xten Dios lojni, jiopxiinu luj te jiejn diajgnu xtiidxlu.
23Dxejcti gurejdx Pedr rebejṉga, biu'reni neṉ yu'. Ro'c bia'nreni te guxhijṉ. Che bara yääl, Pedr näjza sgaii beṉ Jope ni najc xpejṉ Jesucrist, sanä redade' ni baxhaḻ Cornel.
24Che bara yääl, bidzujṉreni guedx Cesarea. Abatojp Cornel resa'ni näjza rexamigwni rolijzni. Cabäjzreni guidzujṉ Pedr.
25Che bidzujṉ Pedr ro yu', huichagloj Cornelni, bazuxhijbni lo Pedr.
26Dxejc gunaaz Pedr ṉaani, guläsnini, räjpni lojni: ―Huisulii, sa'csi narä nacä te niguiitis sigajc najclu.
27Cayuiireni diidx, biu'reni neṉ yu'. Che biu'ni bahuii Pedr nadxagsa' rebejṉ neṉ yu'.
28Räjp Pedr lojreni: ―Anajntu xhi caj lo leii xten rexpejṉ Israel: digacdi guchaag te xpejṉ Israel loj beṉzijt nani digac xpejṉ Israel, digacdiza jiu'ni rolijzreni. Niluxh agunii Dios loä lo te bacaḻ, te gacbeä digacdiru jiuä releiire. Abaluii Dios narä sajc guchagsa'ä chutis bejṉ.
29Ni'cni, che gurejdxtu narä biälgacä. N̲aj rniabdidxä, ¿xhicuent gurejdxtu narä?
30Dxejcti räjp Cornel loj Pedr: ―Gudajp dxej si'cti rcachoṉ gudxej, cabedx-canabä lo Dios rolizä chela baluiloj te niguii najcw te ladnol ni rdimbicha'.
31Najni loä: “Cornel, che rbedx-rniablu lo Dios, riejn diajg Dios xtiidxlu, che rudeedlu meel lo rebeṉ proob, racbee Dios, di lajzni jiäḻ luj.
32Ni'cni ṉaj baxhaḻ tiop dade' chää guedx Jope te chaxiireni Simón Pedr nani rbäzlaa rolijz Simón ni ruscoodz guijd. Rolijzni sojb gajxh ro' nisdoo. Che guidzujṉni, laani gusule'ni xtidx Dios lojtu.”
33Dxejc baxhaḻä chu biädxiilu. Xquixtiostelu biäädlu. N̲aj anadxagsa'nu ree nez loj Dios te jiejn diajgnu rextidx Dios ni baniidxni lojlu guiniilu loonu.
34Dxejcti räjp Pedr lojreni: ―N̲aj gucbeliä tebloj rinälajz Dios guiraa bejṉ; rebeṉzijt sigajc rexpejṉ Israel.
35Niluxh rinälajz Dios chutis beṉ guedxliuj nani ruzuxhijb lojni, nani rusoob rextiidxni, nani laaca nabajṉ.
36Badeed Dios xtiidxni loj rexpejṉ Israel, basule' Dios biääd Jesucrist te gac chanälaaznu Dios te cuedxilajznu, sa'csi Jesucrist rnibee guideb guedxliuj.
37Che gulujx baluii Juan ni rutiobnis xcuent yäḻrobnis, dxejc gusloj basule' Jesucrist xtidx Dios nez reguedx Galilee. La'tu najntu xho bire'ch xtidx Jesucrist guideb nez neṉ reguedx Judea.

Read Hechos 10Hechos 10
Compare Hechos 10:8-37Hechos 10:8-37