HECHOS 10:8-24

⁸U laj tz'aycäbijob upete cua'tac u chäni, de ya'i u täsquijob xic tä Jope.

⁹Päscab, jinq'uin xämba to u chenob tä bij ni ajc'äncan, tz'ita' yo ta c'oticob ti' caj, aj Pedroba t'äbi pat otot isqui tänxin q'uin tä c'änti'ya.

¹⁰Tä' jitz'o u chen, u yoli c'uxnan. Mu'to u yute cua' u c'uxe'. De ya'i u chäni ca' tan u naja

¹¹cache' cielo jäbä. Ya' jini u te tä jaque ca' a wälä ump'e noj noc', t'oc chäntz'it u täbi tu ch'ixma jäcsinti tä cab.

¹²Tama jini noc' ya'an upete ajchäntec oc, y ni u jolän uba tä cab täcäba, y mut ajwile isqui.

¹³U yubi ump'e t'an que u yälben ca'da: ―Ch'oyen Pedro, tzämsen, y c'uxu.

¹⁴Aj Pedro u yäli: ―Mach une Cajnoja. Mach bay cä c'uxi niump'e cua' mach utz c'uxcacba, niump'e cua' xilaw.

¹⁵Sutwäni u yubin ni t'an tä cha'num u yälben ca'da: ―Jini Dios u yäle' que utz c'uxcacba, mach a wäle' ane cache' xilaw.

¹⁶Ca'da uti uxpetz'. De ya'i jini noj noc' ch'ämqui cha'num tä cielo.

¹⁷Aj Pedro mu'to u ch'e' u c'ajalin cua' ti jini ni u chäniba, ajc'äncanob jini u täsquijob aj Cornelioba, tä bij tä bij ti u c'atänob ixta que c'otijob tu yotot aj Simón.

¹⁸C'otijob u pecän ti' otot, u c'atänob si ya'an ya'i untu aj Simón u chap'elib u c'aba' aj Pedroba.

¹⁹Aj Pedro mu'to u ch'e' u c'ajalin cuaxca jini u chäni, u yälbi ni Ch'u'ul Pixan ca'da: ―Ya'an uxtu winic u sacänet.

²⁰Ch'oyen, jaquen. Mach a wäle' mach xiquet t'oc. No'on acä täsquijob.

²¹Jaqui aj Pedro bajca an ni winicob u täsqui aj Cornelioba u yälbijob ca'da: ―No'on ni a sacänonlaba. ¿Cua' a t'an atetla?

²²Unejob u p'alijob: ―Cajnoja t'ocob, aj Cornelio une, ajmanda ta cien soldado. Uneba untu winic que u chen tu toja, y mach yo u säte' t'oc Dios. Upete aj judíosob u yäle'ob cache' utz u c'ajalin. Untu ch'u'ul ángelo ta Dios u yälbi u täscunet tä jo'can tu yotot uc'a u yubin a t'an ya'i.

²³U yälbijob ochic u ch'e' ubajob. Päscab ch'oyi, bixijob t'oc une. U lotob tä Jope tulaj bixijob t'oc, u lotin.

²⁴Päscab c'otijob tä Cesarea. Aj Cornelio u woyi u familiajob y jini u lotob mäx nämä t'ocba u pijnanob aj Pedro.