HECHOS 10:7-20

⁷Cuahn che cona̱hn ángel me ne, cah Cornelio o sa̱hn deca̱hya yahn se nduco a̱ma sanda̱do che quenan se ndeva̱co se che namin ritahno se Dendiohs.

⁸Chihno neca̱h cuande se sa̱hn nducuahn ne, dechuh se sa̱hn ya̱n Jope.

⁹Ta̱ma ro me ne, tenduh na̱n inguiya̱hn ne, cuahn che a cuahn nino sa̱hn chahn ya̱n Jope ne, cocha Pedro tin vah yuto na̱n che quenan ye, ca̱va che cova̱h ye.

¹⁰A̱ma chi cuico ye, ne numanahn che rindah che cheh ye ne, chinahn a̱ma vederihno na̱n ye.

¹¹Ndihchero ye na̱n ro a̱ma che deca̱ ro a̱ma tino chahte tihca̱ ro che nechiche nduh che cun esquina yahn, ne cochahn cua̱hn ndiya̱hn nino na̱n ye.

¹²Min chete tino me chenun nducoya̱ca na̱n ite che cun ca̱h te ma̱n, cu ma̱n, ya̱hda ma̱n.

¹³Tuhme chihnevan ye a̱ma ndudo che ra̱hn: ―Pedro, cuihne ite sih, cocheh ite.

¹⁴Ate ndahconan Pedro: ―Dihvé, hua, te u ne, nde menahn metah chéh nde a̱ma na̱n ite che chihnga̱ te.

¹⁵Ndaconan ndudo me: ―Cha che a nedin dave Dendiohs ne, hua quendi ndedecadine che chihnga̱.

¹⁶Ino yune ndaconan ndihchero ye vederihno me. Tuhme conda̱ tino me cua̱hn na̱n ro.

¹⁷Nahmin che a̱ma rendedecadino Pedro deh conahn vederihno me ne, sa̱hn che dechuh Cornelio ne, a nda̱ se chendevah, retumerune se ti che va̱co Simón.

¹⁸Tuhme tumerune se a min quenan a̱ma ihyan che duche ye Simón che namin duche ye Pedro.

¹⁹Rendedecadino ca Pedro yahn vederihno me cuahn che ya̱hve Vaco Ndah yahn Dendiohs ihyan: ―Nda̱ ino se, rinuhn se di.

²⁰Cuenchehn, ne cuehn nduco se. Dehve rahque, te u dechúh sa̱hn.