Hechos 10:6-15

⁶Ye mokalotijtok icha n ok se Simón, non kintekiti kuítlaxteh, iwa chantitok itempa n atl, ye mitsilis tlan tikchiwas.

⁷Ijkuak n ángel oyá, Cornelio okínnotski ome itlakawah iwa se isoldado akin okitlakitaya iwa okimopantiaya Dios.

⁸Cornelio okinmatilti nochi tlan otlamochijka, iwa satepa okintítlanki kan altepetl de Jope.

⁹Ijkuak owalmostlatik kemi tlajko tonati, ijkuak oyayah itech ojtli iwa yoonajsiah Jope, Pedro otlejkok omotiotsajtsilito ikpak kali.

¹⁰Non ora oxitlatlatoka iwa okinekia tlakuas. Pero ijkuak okichijchiwilijtokah tlan kikuas, okitak se tlawilnextílistli kemi ijkuak se tejtemiki,

¹¹iwa okitak n ilwikak omotlapo iwa itla kemi se patlawak manta non oilpitiwalaya ik nawi ipuntajwah, owaltemoaya ixko tlali.

¹²Itech non manta owalayah miakeh yolkameh de nawi inmikxiwah, yolkameh non motilanah ixko tlali iwa totomeh.

¹³Ijkuakó okikak se tlájtoli non okili: —Ximoketsa Pedro, xitlamikti iwa xitlakua.

¹⁴Pedro otlanankili: —Amó, Noteko, porke ayik nikuajtika itla tlan amo chipawak nion itla pitsotik.

¹⁵N tlájtoli oksepa okínotski iwa okili: —Tlan Dios yokichipa, amo xikijto amo chipawak.