Hechos 10:25-46

²⁵Na' cate' bžin Pedroa' liž Cornelion' ḻa' bchojte Cornelion' bšague'ne' na' bzoa xibe' lagüe'na' benxene'ne'.

²⁶Na' Pedroa' bsože'e ḻe', gože'ne': ―Bezoža'. Ḻecze beṉac̱h neda'.

²⁷Na' ṉe' choe'lente' ḻe' dižan' ca' cate' gwyo'o Pedroa' ḻo' yo'on na' ble'ede' beṉe' zan ba že' ḻo yo'ona'.

²⁸Nach gože' ḻegaque': ―Ṉezeczele ley c̱he neto' beṉe' Israel žan bi cheyaḻa' šo'to' liž beṉe' bi zjanaque' beṉe' Israel, na' žan bi cheyaḻa' gonto' txen len le'e bi nacle beṉe' Israel. Perw bac̱h bzejni'i Diosen' neda' ṉe to beṉe' cbi cheyaḻa' gona' xbab c̱he' naque' beṉe' zban par šo'a liže'na'.

²⁹Da'nan' cate' beṉe' quinga bedesexi'e neda', bi gocžejlaža' še nacle gona', san ba bida' do yic̱hj do laža', na' ṉa'a chaclaža' ṉezda' ¿bixc̱hen' gwṉio' neda'?

³⁰Nach Cornelion' gože'ne': ―Ṉa'a chac tap ža do cheda šoṉe zoa' sin cbibi nagua', na' choḻ güiža' Diosen' liža' nga, cate'cze ble'eda' to beṉe' byo lagua'na' nyaze' to lache' da' chgo'oten be'ni'.

³¹Nach gože' neda': “Cornelio, ca nac da' gwṉabdo' Diosen', bac̱h bzenague' c̱hen, na' ṉezde' chnežjo' da' chyažj da' chc̱hine' beṉe' yaše'.

³²Na' ṉa'a gwseḻa' to c̱hope beṉe' šjasexi'e to beṉe' zoa ciuda Jopen' beṉe' le Simón Pedro. Zoe' liž to beṉe' ḻecze le Simón, to beṉe' chonšagüe' yid. Liž ben' chonšagüe' yiden' zoan gaḻa'ze cho'a nisdao'. Na' cate' la' Pedroa' ližo' nga nach güe'lene' le' diža'.”

³³Nach ḻa' gwseḻa'tia' beṉe' ca' bedesexi'e le', na' chox̱clenteco' bac̱h bido'. Na' ṉezcze Diosen' yogo'to' nita'to' nga gwzenagto' yogo'ḻoḻte dan' ba ben Diosen' mandadw ṉao'.

³⁴Nach Pedroa' gwzolagüe' be'e dižan' gwne': ―Da' ḻi bac̱h ṉezda' nono nḻa' beṉe' ṉacho nzoa Diosen' ḻe' to šḻa'aze.

³⁵Gate'teze beṉe' nación con beṉe' chesonxen Diosen' do yic̱hj do laže' na' chesone' da' güen, Diosen' chbede' ḻegaque'.

³⁶Diosen' gwdix̱jue'ede' neto' beṉe' Israel guac soato' binḻo len ḻe' še šejnilaže'to' Xi'iṉe' Jesucriston' beṉe' naque' X̱an yogo'ḻoḻ beṉe'.

³⁷Ṉezele dan' ba goc doxen distritw Judean' dan' gwzolao distritw Galilean' gwde gwdix̱jue'e da' Juanṉa' xtiža' Diosen' na' bzoe' beṉe' nis.

³⁸Ṉezele Diosen' gwleje' Jesúsen' ben' naque' beṉe' yež Nazaret cont chaclene' chio' beṉac̱h, na' be'ene' Spiritw c̱he'na' na' yeḻa' chnabia'. Na' gwda Jesúsen' bene' da' güen na' beyone' yogo'ḻoḻ beṉe' ca' chsaca'zi' Satanás dan' chnabia' da' x̱igüe' ca', ḻe Diosen' zoe' len ḻe'.

³⁹Neto' ṉezeto' na' choe'to' diža' c̱he yogo' da' güen da' ben Jesúsen' na' dan' bsed blo'ede' distritw Judean' na' ciuda Jerusalénṉa'. Na' choe'to' diža' can' gosote'ne' bosode'ene' to ḻe'e yag cruz.

⁴⁰Perw na' Diosen' bec̱his bosbane'ne' ladjo beṉe' guat ca' beyoṉ ža na' ben Diosen' cont Jesúsen' blo'elagüe' neto'.

⁴¹Gague yogo'ḻoḻ beṉe' besele'ede' Jesúsen' caten' bebane' ladjo beṉe' guat ca', perw Diosen' gwleje' neto' cont choe'to' xtiže'na' na' bene' cont ble'eto'ne'. Na' neto' güe'ej gwdagwlento'ne' txen gwde bebane' ladjo beṉe' guat ca'.

⁴²Jesúsen' bene' mandadw c̱hix̱jue'eto' beṉac̱hen' Diosen' bzoe' ḻe' gone' yeḻa' justisen' len yogo' beṉe' zjamban na' len yogo' beṉe' ba gosat.

⁴³Na' da' ca' bosozoj yogo' beṉe' goso'e xtiža' Diosen' cani'te zjanyojen chesenan note'tez beṉe' yesejnilaže' Jesucriston', Diosen' yezi'xene' xtoḻa'gaque'na'.

⁴⁴Ṉe' cho'ete Pedroa' diža'na' cate' Spiritw c̱he Diosen' gwyo'on ḻo' yic̱hjlaždao' yogo' beṉe' ca' chosozenag diža' dan' cho'ena'.

⁴⁵Na' beṉe' Israel ben' chesejnilaže' Jesucriston', beṉe' ca' zja'ac len Pedroa' liž Cornelion', besyebande' dan' gwyo'o Spiritw c̱he Diosen' ḻo' yic̱hjlaždao' beṉe' ca' cbi zjanaque' beṉe' Israel.

⁴⁶Gosacbe'ede' gwyo'o Spiritw c̱he Diosen' ḻo' yic̱hjlaždao' beṉe' ca' že' liž Cornelion', ḻe gosende' gosonxen beṉe' ca' Diosen' goso'e diža' da' bi gosejni'ide' na' ḻecze gosonxene' Diosen' len xtiža'gaque'na'.