Hechos 10:23-35

²³Tiquina sa nigʉ̃ Pedro pehe tiquinare sajã ta duti, ihyaye oho, tiquiro ijiri wʉhʉpʉ carĩ dutiahye tiquinare. Sa yero ape deco Pedro wahcã, tiquina mehna wahaa wahahye. Sa ye apequina Cristo yequina Jope cjẽna Pedrore piti ti cãhye.

²⁴Ape deco tiquina Cesareapʉ esahye. Sa yero Cornelio pehe tiquiro acayere, tiquiro mehna cjẽna gʉ̃hʉre piji cahmecoa, Pedrore cohteahye.

²⁵Sa yero Pedro Cornelio ya wʉhʉ cahapʉ tiquiro ahtagʉ̃ ihñano Cornelio pehe tiquirore piti ca wijia, tiquiro dahpocãri cahapʉ quehe sahye.

²⁶Sa yepegʉ̃ta Pedro tiquirore ne wahcõ doco ohõ saha niahye: —‍Ducuya mʉhʉ. Yʉhʉ gʉ̃hʉ mʉhʉ yero saha ijigʉ ijiaja. Cohãcjʉ̃ ijieraja yʉhʉ, niahye Pedro tiquirore.

²⁷Tiquiro sa ni tuhasari bato Cornelio tiquirore ne sajãa wahahye tiquiro ya wʉhʉpʉ. Topʉ sajã saro masa pari ti wʉhʉpʉ cahmecoa, tiquirore cohteyequinare ihñahye Pedro.

²⁸Sa yero Pedro tiquinare yahuahye: —‍Judio masʉ ijiepegʉta ape curua cjẽna mehna ijigʉ ʉsã dutiyere yʉhdʉdʉcagʉ niaja yʉhʉ. Tire quehnoano masine mʉsa. Sa ijiepegʉ̃ta ape curua cjẽnare “Ñañequina ijire”, yʉhʉre ni dutierari Cohãcjʉ̃. Sa ni yahuri yʉhʉre tiquiro.

²⁹Tiquiro sa nigʉ̃ tʉhogʉ ohõpʉre mʉsa cahapʉre ahtaʉ. Mʉsa yʉhʉre pijiogʉ̃ “Ne wahaeraja”, niedʉ yʉhʉ. “¿Dʉhse ijiro boro yʉhʉ ohõpʉ ahtagʉ̃ cahmeari mʉsa?” niahye tiquinare Pedro.

³⁰Tiquiro sa nigʉ̃ tʉhoro Cornelio pehe ohõ saha niahye: —‍Tres hora ijigʉ̃ waro mari Pacʉ yaquiro angel yʉhʉre bajuari. Pititia deco wahare yʉhʉre tiquiro bajuari bato. Ti decota mari Pacʉre yʉhʉ sinini watoa angel asi siteri suhtiro sañariquiro yʉhʉ cahapʉ ducuri.

³¹Sa yero tiquiro yʉhʉre ohõ saha nidi: “Cornelio, mʉhʉ mari Pacʉre mʉhʉ sinigʉ̃ tiquiro tʉhori. Sa yero pejecʉoyequinare tiquina cahmeñene mʉhʉ ohogʉ̃ ihñano mari Pacʉ wacũno mʉhʉre yedohorota.

³²Sa yegʉ Jopepʉ mʉhʉ cahacjẽnare ohoya, Simore, Pedro wame tiriquirore mʉhʉ cahapʉ tiquina ne cãhtagʉ̃. Tiquiro apequiro Simo wahiquina cahseri quehnoriquiro ya wʉhʉpʉ pajiri ma dʉhtʉ cahapʉ ijiri wʉhʉpʉ ijire tiquiro”, ni yahuri yʉhʉre tiquiro.

³³Tiquiro sa nigʉ̃ tʉhogʉ yʉhʉ cahacjẽnare mʉhʉre ne cãhta dutigʉ ohou yʉhʉ. Sa yegʉ quehnoano yegʉ ahtari jiri mʉhʉ ʉsã cahapʉre. Sa yena ʉsã ijipihtina ohõre mari Pacʉ tiquiro ihñonopʉ ijina niaja ʉsã. Ijipihtiyere mari Pacʉ mʉhʉre tiquiro yahu dutirire tʉho duana, cohtei ʉsã, niahye Cornelio Pedrore.

³⁴Tiquiro sa nigʉ̃ tʉhoro, Pedro ohõ saha ni yahuahye: —‍Yojopʉ masiaja. Ijirota ijire. Cohãcjʉ̃ ihcãno saha quehnoano yere marine.

³⁵Sa yero ijipihtiye macari cjẽna Cohãcjʉ̃re cua pesaro tiquina ihñagʉ̃, quehnoañene tiquina yegʉ̃ Cohãcjʉ̃ pehe tiquina mehna bucuere.